1Kar Atrivim Solomonɨn aghuzir akar oteviba, da dabirabir aghuimɨn arazimɨn gun mɨgei:
2Nɨ arazir kuramɨn gɨn mangɨva egh dagɨaba bar izɨvaghtɨ, nɨn dagɨaba nɨ damutɨ nɨ deraghvɨra ikian kogham. Eghtɨ nɨ arazir aghuimɨn gɨntɨghtɨ, God nɨn akurvaghtɨ nɨ dughiar ruarimɨn ikiam.
3Ikiavɨra Itir God gumazir aghuiba ataghrazi me mɨtiriaba sara itir puvatɨ. A gumazir kuraba ataghɨrazi, me bizir me ifongeziba isir puvatɨ.
4Nɨ ingarir puvatɨ, nɨ biziba puvatɨgham. Egh nɨ bar puvɨra ingarɨva, egh nɨ bizir avɨriba ikiam.
5Gumazir nɨghnɨzir aghuim itim, a dagheba asir dughiamɨn a da isa da akufi. Ezɨ dughiar kamɨn gumazir akua ingarir puvatɨzim, an adarazi a bangɨn bar aghumsɨgham.
6God gumazir aghuiba deraghavɨra me gami. Ezɨ gumazir kuram, gumazir igharazibagh asɨghasɨghasa nɨghnigha, nɨghnɨzir kurar kaba modi.
7Gumazir aghuitam aremegham, gumazamiziba a gɨnɨghnɨgh egh bar akuegham. Ezɨ gumazir kuraba ariaghiri, gumazamiziba zuamɨram me bakɨnɨghnɨsi.
8Gumazir nɨghnɨzir aghuim itim, a gumazir igharazibar akar aghuiba barasi. Ezɨ gumazir onganigha puram akam araim, a bar ikuvigham.
9Gumazir aghuiba deraghvɨra ikiam. Ezɨ gumazir arazir kurabagh amim, a uan arazir kuraba mongɨva avegham, God adagh fogham.
10Gumazir guizɨn akam avaragha a modim, an osɨmtɨzibagh ami da otifi. Gumazir pura guizɨn akaba bɨgha mɨgeim, a gumazamizibagh amizɨ, me navir amɨrizimɨn ikia deravɨram apia.
11Gumazamizir aghuibar akaba, mati dɨpar ikɨrɨmɨrir aghuim anɨdim. Ezɨ gumazamizir kuraba me gumazir igharazibagh asɨghasɨghasa nɨghnɨsi, ezɨ men akaba men nɨghnɨzir kurar kaba modi.
12Navir kuramɨn arazim osɨmtɨziba fema da otifi. Ezɨ igharaz darazigh ifongezir arazim, an arazir kuraba bar da ave.
13Gumazir nɨghnɨzir aghuim itim, a zurara uan nɨghnɨzir aghuimɨn gun mɨgei. Ezɨ gumazir nɨghnɨzir aghuiba puvatɨziba, me fidizimɨn an akɨragharim mɨsuegham.
14Gumazir nɨghnɨzir aghuim itim zurara fofozir avɨrir igharaziba isa egha zuamɨra dar gun mɨgeir puvatɨ. Eghtɨ gumazir nɨghnɨzir aghuim puvatɨzim, a pura tintinibar akabav kɨm mangɨtɨ, osɨmtɨzim zuamɨram otogham.
15Gumazamizir dagɨar avɨriba itiba, men dagɨar avɨriba me geghuva men garima, me deraghvɨra iti, mati nguibamɨn dɨvazir gavgavim anekɨaruzɨ an gumazamiziba deravɨra iti. Ezɨ onganarazibagh amir gumazamiziba biziba puvatɨ, kamaghɨn me ikuvigham.
16Gumazir aghuim ikɨrɨmɨrir aghuim iniam, mati gumazim uan ivezir aghuim isi. Ezɨ gumazir kuraba arazir kurar avɨribagh amima da otifi.
17Gumazim, gumazir igharaziba ateghtɨ me anerkɨram, eghtɨ a ikɨrɨmɨrir aghuimɨn tuavimɨn ikiam. Eghtɨ gumazim, me anerkɨrasav amima ana aghua, a tuavir kam gitagha gɨfa.
18Gumazim igharaztavɨn aghuagha navir kuram an ikia, egha bizir kam mongasava ami, kamaghɨn a zurara akar ifavaribav gei. Ezɨ gumazim igharaztavɨn gɨrakɨrangɨn a mɨgei, a mati gumazir bar onganim.
19Gumazir akar avɨribav geim, an akar kabar arazir kuraba otifi. Ezɨ gumazim akar avɨribav geir puvatɨ, a nɨghnɨzir aghuim iti.
20Gumazir aghuimɨn akaba mati guizɨn silva. Ezɨ gumazir kuramɨn nɨghnɨziba pura biziba, egha da bar derazir puvatɨ.
21Gumazir aghuimɨn akaba zurara gumazamizir avɨribar akurvasi. Ezɨ gumazir nɨghnɨzir aghuiba puvatɨziba, men nɨghnɨziba bar paza zui, kamaghɨn me arɨmɨghiram.
22Ikiavɨra Itir God uabɨ bizir aghuiba e ganɨdi, egha an osɨmtɨziba e ganɨdir puvatɨ.
23Gumazamizir nɨghnɨzir aghuiba puvatɨziba, me arazir kurar igharazibar amuasa bar akonge. Ezɨ gumazamizir nɨghnɨzir aghuiba itiba, me arazir aghuibar amuasa bar akonge.
24Gumazamizir kuraba bizir avɨribar atiati, eghtɨ bizir kaba me bativigham. Eghtɨ gumazamizir aghuiba bizir aghuir me bar ifongeziba iniam.
25Dughiar kuram gumazamizir kuraba batogham, bizir kam bar me agɨvagham, mati amozir ekiam izima aperiam me avigha ghu. Ezɨ gumazamizir aghuiba zurara gavgavigha egha deraghvɨra iti.
26Nɨ gumazir amɨrazim inightɨ a nɨn ingangarim damuan markɨ. Guizbangɨra, nɨ bar an aghuagham, mati nɨ dagher avivizim amezɨ a nɨn akam mɨsosi, egha mati avir mɨgharim nɨn damazimningɨn zui.
27Nɨ Ikiavɨra Itir Godɨn atiating an apengan ikɨva egh nɨ dughiar ruarimɨn nguazimɨn ikiam. Ezɨ gumazamizir kuraba dughiar otevimɨn ikegh, egh me aremegham.
28Gumazamizir aghuiba Ikiavɨra Itir God mɨzuamtɨ, a dughiar aghuim me danɨngam, eghtɨ me bar akuegham. Eghtɨ gumazamizir kuraba pura mɨzuamɨva, dughiar aghuimɨn ganighan kogham.
29Ikiavɨra Itir God bar deraghavɨra gumazamizir aghuibar gari. Egha a gumazamizir arazir kurabagh amiba gasɨghasɨsi.
30Gumazamizir aghuiba deraghavɨra uan nguibamɨn ikɨvɨra ikiam. Eghtɨ gumazamizir kuraba kamaghɨn ikeghan kogham.
31Gumazamizir aghuiba nɨghnɨzir aghuir avɨriba ikia, egha me dar gun gumazamizibav gei. Ezɨ gumazir akar kuram mɨgeim, me an mɨgɨrɨgɨam atugham.
32Gumazir aghuim bar fo, akar manaba gumazamizibar akurvasi. Ezɨ gumazir kurabar akaba gumazamizibar navibagh amima me osei.