1Jop ua kamaghɨn mɨgei:
2“Oio. Kɨ uabɨn apangkufi, kɨ fomɨra deragha ikezɨ moghɨn ikiasa ifonge.
3A lamɨn mɨn itima, an angazangarim na gisira.
4Fomɨra, God nan roroamɨn mɨn ikia, deravɨra nan purirpenimɨn aven itir ikɨzimɨn gari.
5Fomɨra, Godɨn Gavgaviba Bar Itim, na ko ikiavɨra itima,
6Ezɨ nan bulmakauba ko memeba oter eborir avɨrim na ganɨngi,
7“Kɨ faragha nguibar ekiamɨn gumazir dapanir mamɨn ikia,
8Gumazir igiaba nan gari kɨ izima, me uari amɨkɨrvagha ghua saghon iti.
9Ezɨ gumazir dapaniba uaghan uan akabar kumigh,
10Ezɨ gumazir bar ekiaba uaghan nan akam baraghsɨ,
11Gumazamizir kɨran oveghangɨn ovengamiba, kɨ men akurvasi, ezɨ me na mɨnabi,
12Kɨ zurara Godɨn damazimɨn arazir aghuibagh amua, guizɨn araziba igharaz darazir akakasi,
13Kɨ mati damazir kurabar damazim, egha kɨ tuavim men akakasi,
14Kɨ mati onganarazibagh amir gumazibar afeziam, egha men akurvasi.
15Gumazir arazir kurabagh amiba, kɨ men gavgaviba agɨva,
16“Kɨ ghaze, kɨ ti dughiar ruarimɨn nguazir kamɨn ikiam,
17Kɨ ghaze, kɨ ti gavgavigh, temer dɨpar mɨriamɨn dɨkarazimɨn mɨn,
18Gumazamiziba nan ziar ekiam fɨvɨra ikiam.
19“Gumazamiziba damuamin araziba kɨ dar me mɨgeima,
20Nan mɨgɨrɨgɨaba men navir averiabar ghuaghiri,
21Me kuariba arigha bar deravɨra nan akam barasi.
22Kɨ dughiar aghuim me ganɨga me ko mɨgeima, me igharagha nɨghnɨsi,
23Kɨ men gumazir dapanimɨn mɨn ikiava, arazir me damuamiba bagha, nɨghnɨziba me ganɨdi.