1Wo rɔ, ikomin ai ni Mɔɔ Ɲenematɔmɔnin da wuli saya rɔ, ai ye harijeene koilu ɲinin, Ɲenematɔmɔnin siini Alla bolokininma yɔrɔ mɛn dɔ.
2Ai ye ai miri harijeene koilu ma, ai kana ai miri dunuɲa koilu ma.
3Ka a masɔrɔn ai ra sa, ai la dunuɲa ratɛɛ dokonni Mɔɔ Ɲenematɔmɔnin dɔ Alla fɛ.
4Mɔɔ Ɲenematɔmɔnin wa bɔ kɛnɛma, ale mɛn ye ai la dunuɲa ratɛɛ ri, ai fanan di bɔ a tɔrɔfɛ a la gbiliya rɔ.
5Wo le rɔ, dunuɲa kojuu mɛnilu ye ai rɔ, ai ye woilu faa ai jusu rɔ: kaninkɛ, kɔsɔ koilu, kunfan juuilu, diyana kojuuilu, a ni nata, mɛn kɛni joo bato ri.
6Sɔn su ɲinilu ye Alla la duɲa lanala kuma mirabaliilu ma.
7Ai fanan jɛrɛ tɛrɛ taamala wo ɲa le ma ai tɛrɛ ai la dunuɲa ratɛɛ kɛla a rɔ.
8Kɔni sisen, ai ye wo koilu bɛɛ boloka: mɔnɛ, jusumaya, juuya, mɔɔ tɔɔtiɲanni, a ni kuma juu mɛn ye bɔla ai da rɔ.
9Ai kana wuya fɔ ai ɲɔɔn yɛ ka a masɔrɔn ai ra ai cɛɲa kɔrɔman bila a ni a kɛwaliilu.
10Ai ra cɛɲa kura damira mɛn ye tola rabɛnna Alla lɔn dɔ, haan a ye kɛ a danɲa munuɲa ri.
11Wo danni kura rɔ, Kirɛkikailu ni Yahudiyailu, kanbarenilu ni faanintakɛbaliilu, londanilu ni ɲamakabaliilu, jɔnilu ni hɔrɔilu, Ɲenematɔmɔnin ye fen bɛɛ le ri bɛɛ yɛ, fanka ye a la ko bɛɛ rɔ.
12Wo le rɔ, baa Alla ra ai ɲenematɔmɔn, ka ai kɛ a diyana jama sɛniman di, ai ye kininkinin ni juumaya ni fanmajii ni jusu ɲumaya ni sabari ta.
13Ai ye diɲɛ ai ɲɔɔn yɛ, ka ai ɲɔɔn makoto, ni do ka ko kɛ a duɲɔɔ na. Ai ye ai ɲɔɔn makoto ikomin Maari Alla ra ai makoto ɲa mɛn ma.
14Ai ye kaninteya la woilu kan, mɛn ye ii bɛɛ dafala.
15Mɔɔ Ɲenematɔmɔnin na jususuma ye sabati ai jusu rɔ. Baa Alla ka ai kili wo le fɛ, ka ai kɛ faribanku kelen di. Ai ye kɛ waliɲuma lɔnna ri.
16Mɔɔ Ɲenematɔmɔnin na kuma ye to ai bɛɛ jusu rɔ, a diya bɛɛ rɔ, ka ai ɲɔɔn karan, ka ai ɲɔɔn nali lɔnnin bɛɛ la, a ni Yaburi kumailu ni kalamanilu ni Alla tando kalaman sɛnimanilu la, ka baraka bila Alla yɛ ai jusu rɔ.
17Ai ye mɛn bɛɛ kɛla wala ka a fɔ, ai ye wo bɛɛ kɛ Maari Isa tɔɔ rɔ, ai ye baraka bila Fa Alla yɛ a baraka rɔ.
18Musoilu, ai ye kolo ai cɛɛilu ma ikomin a bɛnni musoilu ma ɲa mɛn ma Maari ɲakɔrɔ.
19Cɛilu, ai ye ai musoilu kanin, ai kana juuya ii la.
20Denilu, ai ye ai sɔrɔnbailu la kumakan mira ko bɛɛ rɔ, ka a masɔrɔn wo le duman Maari yɛ.
21Den failu, ai kana ai denilu lamɔnɛ kosa ii kana tunnagboya.
22Jɔnilu, ai ye ai tiilu kumakan mira ko bɛɛ rɔ mɛnilu ye ai kun na dunuɲa rɔ. Ai kana baara ii ɲakɔrɔ gbansan ma, kosa ai ye diya ii yɛ, kɔni ai ye baara jusu ɲuma la Maari gbiliya ko rɔ.
23Ai wa kɛ ko ko kɛla, ai ye a kɛ ai jusu bɛɛ rɔ ikomin ai ye a kɛla Maari yɛ ɲa mɛn ma kɔni mɔɔilu tɛ.
24Baa ai ka a lɔn, ko ai ri ai sara sɔrɔn Maari bolo, a ka cɛ mɛn namara a la jama yɛ. Ai tii le Mɔɔ Ɲenematɔmɔnin di ai ka kan ka baara mɛn yɛ.
25Mɛn wa baara telenbaliya rɔ, a ri telenbaliya sara sɔrɔn, baa Alla tɛ mɔɔilu lafisayala ii ɲɔɔn ma.