1N ye lemɛniya jama mɔɔbailu fanan madiyala ai tɛma ka a masɔrɔn n fanan kɛni jama mɔɔba do le ri ikomin iile, a ni Ɲenematɔmɔnin na tɔrɔya sereya do. Gbiliya mɛn natɔ bɔla kɛnɛma, n fanan di wo do sɔrɔn.
2Ai ye ai janto Alla la kolofen kuru rɔ, a ka mɛn karifa ai la. Ai diyagboyanin kana ii mafɛnɛ le, kɔni niilifen ɲuma ye Alla sawo rɔ. Ai kana a kɛ malobaliya koilu tɔnɔ sɔrɔn ma kɔni fo ai sɛbɛ.
3Mɛnilu karifani ai la, ai kana nɔya kɛ woilu la ikomin kuntiilu, kɔni ai ye a kɛ misali ri kuru yɛ.
4Kolofen Gbɛngbɛnna Kuntii wa bɔ kɛnɛma waati mɛn na, ai ri mansaya tɔɔmasere fula sɔrɔn gbiliya rɔ mɛn tɛ tiɲanna muumɛ.
5Kanberenilu, ai fanan ye kolo mɔɔbailu ma. Ai bɛɛ ye ai fanmajii ii yɛ ikomin faanin wa kɛ ai ɲɔɔn kan. Ka a masɔrɔn, «Alla ye a jɛrɛ wulila wasolailu kanma, kɔni a ye sɔli donna jɛrɛ majiilailu la.»5.5 Sandailu suran 3 kuma diya 34
6Ai ye ai majii Alla fanka kɔrɔ, kosa a ye ai mayɛlɛ a diyana waati rɔ.
7Ai ye ai hamin koilu bɛɛ to a ma, ka a masɔrɔn a ri a janto le ai ko.
8Ai ye ai jɛrɛ mira, ka a kɛ ai ye hankilila, ka a masɔrɔn ai juu Ibulusa ye taamala ikomin yara mɛn ye wurundula. A ye mɔɔilu ɲininna a ye mɛnilu dɔɔnna.
9Ai ye ban a rɔ, ka to lemɛniya rɔ gben. Ai ye a lɔn ko wo tɔrɔ suilu ye ai nakelenɲɔɔmailu fanan kan dunuɲa yɔrɔ bɛɛ rɔ.
10Ai wa tɔrɔ waati do rɔ, Alla hina bɛɛ tii mɛn ka ai kili habadan gbiliya rɔ Ɲenematɔmɔnin dɔ, wo jɛrɛ ri ai lawuli, ka ai fanka di ai ma, ka ai kologbɛlɛya, ai ma yɛrɛyɛrɛ.
11Fanka ye to ale le la habadan! Amina.
12Silasi, n ye mɛn jatela nakelenɲɔɔ kɔnɔrɔdi ri, wo le ka n dɛmɛn bataki kundunyanin ɲin sɛbɛla ai ma, kosa n ye ai lalemɛniya, ka sereya bɔ ai yɛ, ko Alla la sɔlini tuɲa le ɲin di, ai ye mɛn dɔ gben!
13Lemɛniya jama mɛn ye Babilɔni so kɔndɔ,5.13 Babilɔni so kɛni gbundu kuma le ri mɛn kɔrɔ ye «Romi So.» N dencɛ Marika: wo kɔrɔ le Piyɛri ye Marika kaninna ikomin a dencɛ. Tumado Piyɛri le Marika karanna lemɛniya ma. Alla ka mɛnilu suwandi ikomin ai le, woilu ye ai tuwala. N dencɛ Marika fanan ye ai tuwala.
14Ai ye ai ɲɔɔn tuwa nakelenɲɔɔya sunbuli rɔ.