1Nambi'yambi' utange panga, masu'ba ga kuundi'la kwalu'a baa na nsimu wa tabu.
2Kwa mwanjaa bandu baalu'a kwipenda bene, baapenda mbanje, baalu'a kwilumba, babaa bene umbu'ku'su', balu'a baa atukani, bangali kwayu'wa abelei babe, bangali sukulu, bangali kumwisimu Nnu'ngu',
3bangali kwapenda ayabe, bangali penda awana, abai, bangali li'ngi'lya, akali', babakana manogau,
4asongi, kingayu'wa, babaipuna, babapenda muno maminyikio ga dunia kulikoni kumpenda Nnu'ngu'.
5Babonekana kati bandu bababi'ngi'ya gapala Nnu'ngu', lakini bagakana makakala gake. Kwa nyo utame kuutalu na bandu kati bo.
6Nkati yabe babile babayingya mumayumba ga bandu na kwakonga alwawa alalo babatopilwe na masambi kabautilwa na maminyikio ga kila sampuli.
7Alwawa bo bapala kwiyi'gana kila lisu'ba, lakini bakombwali kuutanga ukakape.
8Bandu ba bautaukya ukakape kati mwabantauki Musa ki Yane na Yambre. Bandu bo malango gabe gatitindigana na imani yabe ipwaikali.
9Lakini baayendelyali muno, kwa mwanjaa ulogeloge wabe waabonekana kwa bandu mpu'la, kati mwaubonekine ulogeloge wa balu' analu'me abi'li'.
10Ila wenga ukoleyite mayi'gano gangu', nnyendo wangu', binia kwangu', imani yangu', ukomeyi wangu', upendo wangu', na uli'ndi wangu'.
11Utangite bandu mwabaniawiye na siki yaniipatike panaabile muilambo ya Antiokia, Ikonio na Lustila. Naatikomea goti, na Bwana Yesu nganikosopolya mu ago goti.
12Kakape, boti babamwu'bi'lya Kilisitu Yesu no pala panga maisa gapala Nnu'ngu' baalu'a ku'su'mbu'lwa.
13Lakini bandu alau na akongi baayendelya muno panga ulau, baalu'a kwakonga no kongelwa.
14Lakini wenga uyendeli tama mu'lu' muukakape wauyi'ganilwe na kuuyi'ki'tya, kwa mwanjaa utangite wiyi'ganiye go bu'ka kwa nyai.
15Bu'ka kuunangu'ta, ugatangite Maandiko Mapeleteu. Ago gakupanga utange panga ukosopoli upatikana kwa kumwu'bi'lya Kilisitu Yesu.
16Maandiko Mapeleteu goti gaandikilwe kwa ulongosi wa Nnu'ngu' na gapwaika kwo yi'gana ukakape, kwi'li'ka no goloya mayi'gano, no longoya bandu batame mumaisa ga aki.
17Maandiko gano gaapanga bandu ba Nnu'ngu' baibi'ke wiso no timya kwo panga manogau goti.