ኮኦኪንሢ ማፃኣፔ 31

¹ሃካፓ ሊካ ኬኤዚንታሢ ማኣሳ ዓጮ ካኣቲ፥ ሊሙዔኤሌም ዒንዳ ዞሬ ዞሮኬ።

²«ናኣቢና ታኣኒ ሾዔ ናኣዚዮ፥ ሊሙዔኤሌ! ሂንዳ ኮሺ ዒናፓ ዋይዜ፤

³ሚርጌ ላኣሊ ዔኪ ዎልቆ ኔኤኮ ጋፒሲፖ፤ ዬያጉዴ ማዻ ካኣቶዋ ዓይሱዋዖ ዻውሲሴኔ።

⁴«ሊሙዔኤሌ! ካኣታ ዎይኖ ዑዦ ዑሽካኒ፤ ሱኡጋኣ ካፄ ዑሺ ዑሽካኒ ሱኡካዻንዳያ ኮይሱዋሴ።

⁵ዔያታ ዑሽኪ ማሢንቴቴ ዎጎ ዋላኔ፤ ሜታዼ ዓሶኮዋ ጌኤዞ ቄል ጋዓኔ።

⁶«ሃይቃኒ ሳዛ ጋሽካ ዓሶና ዋኣዪ ናንጋ ዓሶናም ዎይኖ ዑዦንታ ማሣ ዑዦንታ ዒንጉዋቴ።

⁷ዔያታ ፔኤኮ ዋኣዪፆና ማንቃቶና ዋላንዳጉዲ ዑሽኮንጎ።

⁸«ታ ናዓሢዮ! ፔ ሜታሢ ዛሎ ኬኤዛኒ ዳንዳዑዋ ዓሶ ዛሎ ኔኤኒ ጌስቴ፤ ፒዜ ዎጌ ዴንቁዋዖ ሜታዼ ዓሶ ዛሎ ኔኤኒ ሞኦቲንቴ።

⁹ዔያቶ ዛሎ ኔ ጌስቴ፤ ፒዜ ዎጌ ዔያቶም ዎጌ፤ ማንቆና ሜታዼ ዓሶ ዛሎናሮ ሞኦቴ።»

¹⁰ኮሺ ላኣሊ ዖኦኒ ዴንቃኒ ዳንዳዓይ? ዒዛ ቦንቺንታያ ማዔ ሹጮፓ ባሼ ቦንቺንቴያኬ።

¹¹ዓኒ ዒዞኮ ዒዞ ጉሙርቃኔ፤ ዒ ኮዔ ባኣዚ ቢያ ዒዞይዳፓ ዴንቁዋ ዓቱዋሴ።

¹²ዒዛ ናንጋ ዎዶ ቢያይዳ ኮሺ ባኣዚ ዒዛም ማዻንዳኣፓዓቴም ፑርታ ባኣዚ ማዺንዱዋሴ።

¹³ማራይ ጋፓኔና ጉኡፂሲ ሱኮና ፓቲሌና ዓፒላ ዹይሲ፥ ዒዞም ኮሽኬያ ማዔም ማዾ ሌሊ ማዻኔ።

¹⁴ኮርሞ ኮርማ ዓሶኮ ዋኣፆ ካኣሚሎጉዲ ሃኬ ቤሲ ዓኣዺ ዱማ ዱማ ሙኡዚ ዒዛ ቡኩሳኔ።

¹⁵ዒዛ ፔ ማኣሮ ዓሶም ሙዖ ጊኢጊሻኒና ዒዞኮ ማዾ ማዻ ዓሶም ማዾ ጊሽካኒ ሃጊ ሳዓ ካሩዋንቴ ዔቃኔ።

¹⁶ኮሺ ሳዓ ኮይ ዒዛ ሻንቃኔ፤ ዒዛ ማዺ ዴንቃ ሚኢሾና ዎይኔ ቱኮንዶ ቤሲ ጊኢጊሻኔ።

¹⁷ዒዛ ጪንጫ ማዻያ ማዒፆ ሌሊቱዋንቴ ማዾናኣ ዶዲኬ።

¹⁸ዒዛ ማዻ ባካ ቢያ ዒዞ ማኣዳያ ማዔሢ ዒዛ ዔራኔ፤ ዋንቶ ማዼ ጎይሣ ዒዛ ዎርቃሢሮ ፖዓ ዒዞኮ ሃይቁዋሴ፤

¹⁹ዒዛ ፔኤኮ ቢላቢጮና ሱኪ ዓፒሎ ዹይሳኔ።

²⁰ማንቆና ሜታዼ ዓሶናም ዒዛ ዒንጋኔ።

²¹ዒዞ ማኣሮ ዓሶኮ ቢያ ዖይዻ ማኣዓ ዓኣሢሮ ሻቺ ዋርቄቴታዎ ዒዛ ዓልቱዋሴ።

²²ሻኣሎ ዑፃ ሂኢሦ ዓፒሎ ዒዛ ማዣኔ፤ ዞቄ ዲንኪ ሼኤሜና ኮሾና ሚዛጲ ማኣዖ ዒዛ ማኣዓኔ።

²³ዓኒ ዒዞኮ ዓጮ ጋርቻ ቡኪንታ ጶኦካ ቦንቺንታያኬ።

²⁴ሻኣዣሲ ሱኪ ዹይሶና ዓፒሎ ዒዛ ሻንቻኔ፤ ኬርና ቱኮ ቃልሾዋ ኮርሞ ኮርማ ዓሳ ዒዞ ኮይላፓ ዔኪ ዴንዲ ኮርማኔ።

²⁵ዒዛ ዶዲ፥ ሃሣ ቦንቺንታያኬ፤ ሙካ ዎዶይዳ ቢያ ዒዛ ዎዛዺ ናንጋኔ።

²⁶ዒዛ ዔራቶና ጌስታኔ፤ ጊንሣ ሃሣ ኮሺ ዞሮዋ ዞራኔ።

²⁷ቢያ ዎዴ ማዾ ማዺ ማኣሮ ዓሶ ቶኦኮ ዒዛ ዛጋሢሮ ቤልፁሞ ዒዞኮ ባኣሴ።

²⁸ናኣታ ዒዞኮ ዒዞ ሄርሻኔ፤ ሃሣ ዓኒያኣ ዒዞ ጋላታኔ።

²⁹«ኮሺ ማቾ ማዔ ሚርጌ ላኣሊ ዓኣኔ፤ ኔኤኒ ጋዓንቴ ቢያፓ ባሼኬ» ዒዞም ጋዓኔ።

³⁰ሚዛጱሞ ጉሪኬ፤ ሱጉሢ ዴንቃ ዓሲ ማዒፃኣ ባባይቃኔ፤ ናንጊና ናንጋ ጎዳ ዒጊጫ ላኣሊ ጋዓንቴ ጋላቲንታንዳያ ኮይሳኔ።

³¹ዒዛ ማዻ ባኮ ቢያ ዛጊ ዒዞ ጋላቱዋቴ፤ ዒዞኮ ኮዦ ማዾና ዓሲ ቢያ ቤርታ ዒዛ ቦንቺንታኒ ኮይሳኔ።