ኮኦኪንሢ ማፃኣፔ 29

¹ሚርጌ ዎዴ ጎሪ ዞሮናንቴ ዋይዞ ዒፄ ዓሲ ዔርቲባኣንቴ ሜቃኔ፤ ፓሣንዳ ባኣዚያ ባኣያ ማዓኔ።

²ኮዦ ዓሳ ሱኡጌ ማዒ ዶኦሪንቴ ዎዶና ዴራ ዎዎዛዻኔ፤ ፑርቶ ዓሳ ሱኡጌ ማዒ ዶኦሪንታኣና ጋዓንቴ ዴራ ማሊ ሜታዻኔ።

³ዔራቶ ናሽካ ዓሲ ፔ ዓዶ ዎዛሳኔ፤ ዞኦዛ ኮኦማ ላኣሎ ጊንፆ ሃንታሢ ጋዓንቴ ፔኤኮ ቆሎ ላላኣላኔ።

⁴ካኣታ ፒዜ ዎጌ ዎቡዋጉዲ ማሃ ዎዶና ዓጮ ፔኤኮ ዶዲሻኔ፤ ዴሮ ቡራ ሱኡጌ ጋዓንቴ ዓጮ ፔኤኮ ባይሲንታ ባንሢ ዔኪ ዓኣዻኔ።

⁵ፔኤኮ ላጎ ሳልማሳ ዓሲ ዬያቶኮ ቶኮም ፒሮ ፒራኔ።

⁶ፑርታ ዓሲ ዒዛኮ ጎማ ፒሮ ማዒ ዓርቃኔ፤ ኮሺ ዓሲ ጋዓንቴ ፆኦሲ ቦንቾም ዓይናዺ ዓይናዺ ዎዛዻኔ።

⁷ኮሺ ዓሲ ማንቆ ዓሶም ፒዜ ዎጌ ዎጊንታንዳጉዲ ማሊ ሜታዻኔ፤ ፑርቶ ዓሳ ጋዓንቴ ዬያጉዴ ባኮ ዔኤቢኬ ጎዑዋሴ።

⁸ሜሌ ዓሶ ዛሎ ዔኤቢኬ ጎዑዋ፥ ቦሂ ሺራ ዓሳ ካታሞይዳ ዣሎ ማዣኔ፤ ዔሮ ዓሲ ጋዓንቴ ዱኡላዼ ናንጎ ማሂ ጊንሣ ጊኢጊሻኔ።

⁹ዔራ ዓሲ ዔኤያ ዓሲ ዎጌና ዓይሢሲ ዎጎ ማኣሪ ሺኢሼቴ ዔኤያሢ ጎሪንቲ፤ ሃንጎ ሚኢጪ ጌኤዞ ፑርቲሳኔ።

¹⁰ሼምፔ ዎዻ ዓሳ ጌኤዦ ዓሶ ዒፃኔ፤ ኮዦ ዓሶዋ ዎዻኒ ኮዓኔ።

¹¹ዔኤዮ ዓሢ ፔኤኮ ዻጎ ዒኖ ፔጋሲ ዔርዛኔ፤ ዔራ ዓሲ ጋዓንቴ ፔኤኮ ዻጎ ጊቢ ዳንዳዒሢና ቃዛኔ።

¹²ፔቴ ሱኡጌ ሉኡዙሞ ሃይሴ ዔካያ ማዔቴ ዒዛኮ ዶንዞ ማዔ ቢታንታ ዓኣ ዓሳ ቢያ ጌኔ ማዻ ዓሲ ማዓኔ።

¹³ማንቃሢና ዒዛ ሄርቂ ዎይሣሢናም ዓኣፖ ፖዖ ዒንጋሢ ፆኦሲ ማዔሢሮ ቢያሢ ፖዖና ሄኮ ዛጋኔ።

¹⁴ፔቴ ካኣቲ ማንቆ ዓሶም ፒዜና ዎጋያ ማዔቴ ሚርጌ ሌዔ ዒዚ ዎይሣኔ።

¹⁵ናይ ጎሪሢና ሻርሺሢና ዔራቶ ዴንቂሳኔ፤ ናይ ዳኪ ሃሾም ዲጫያ ማዔቴ ጋዓንቴ ፔ ዒንዶ ቦርሲሳኔ።

¹⁶ፑርታ ዓሲ ቢታንቶ ዓርቃዛ ዎጌ ሄርቂሢ ሚርጋኔ፤ ኮሺ ዓሲ ጋዓንቴ ፑርቶ ዓሶኮ ሎኦማሢ ዛጉዋዖ ሃይቁዋሴ።

¹⁷ናዖ ኔኤኮ ሻርሼ፤ ሃውሾና ኮሹሞና ኔኤኒ ዴንቂ ዎዛዻንዳኔ።

¹⁸ፆኦሲ ፔጋሲ ዻዋ ባኣዚ ባኣቴ ዴሬ ዳኪ ሃሾናያ ማዓኔ፤ ፆኦሲኮ ዎጎ ቦንቻ ዓሢ ጋዓንቴ ዓንጂንቴያኬ።

¹⁹ፔቴ ዓይሌ ዻንጋ ዞሪሢና ሌሊ ኮሻኒ ዳንዳዒንቱዋሴ፤ ኔ ዒዛም ጋዓ ባካ ዔርቴታቶዋ ዒ ኔኤም ዓይሢንታዓኬ።

²⁰ማሊ ዔኩዋዖ ሩኡሪና ጌስታ ዓሲዳፓ ባሼ ዔኤያሢኮ ሃጊ ማዓ ዎዛ ዓኣኔ።

²¹ፔቴ ካራሚ ናኣቱሞፓ ዓርቃዖ ዖቶርቂ ዲጬቴ ጋፒንፃ ዒዛኮ ኮሽኩዋሴ።

²²ዻጋ ዓሲ ዑራ ማዣኔ፤ ዑኬና ዻጋዻ ዓሲ ሚርጌ ዻቢንቲ ማዾ ማዻኔ።

²³ሄርሺንቲ ሎሎንሣኔ፤ ሼሌዔ ኔኤኒ ማዔቴ ጋዓንቴ ቦንቺንታንዳኔ።

²⁴ዉሲና ዎላ ፔቴ ማዓ ዓሲ ፔና ዒፄ ዓሲኬ፤ ዒዚ ጫኣቄቴያ ጎኔ ባኣዚ ዒ ኬኤዙዋሴ።

²⁵ዓሲ ዒጊጫሢ ሜቶይዳ ኬዳኔ፤ ናንጊና ናንጋ ጎዳ ጉሙርቃሢ ጋዓንቴ ኮሺና ናንጋኔ።

²⁶ሚርጌ ዓሲ ቢታንታ ዓኣ ዓሶፓ ማኣዶ ኮዓኔ፤ ፒዜ ዎጌ ጴዻሢ ጋዓንቴ ናንጊና ናንጋ ጎዳይዳፓ ሌሊኬ።

²⁷ፑርቶ ዓሶ ኮዦ ዓሳ ዒፃኔ፤ ሃሣ ኮዦ ዓሶዋ ፑርቶ ዓሳ ዒዒፃኔ።