ኔሄሚያ ማፃኣፖ 1

¹ሃካሊያ ናኣዚ፥ ኔሄሚያ ኬኤዜ ባካ ያዺኬ፦

²ዒማና ታ ጌርሲንሢዳፓ ፔቴ ሃናኒ ጎዖሢ ሜሌ ዓሲና ዎላ ዪሁዳ ዓጫፓ ታ ኮራ ሙኬኔ፤ ዬሩሳላሜንታ ዲዒንቲ ባብሎኔ ዔውቱዋዖ ዓቲ ዓኣ ዓይሁዶ ዓሶንታ ዎዚ ዓኣቴ ታኣኒ ዔያቶ ዖኦጬኔ።

³ዬያሮ ዔያታ፦ «ዲዒንቲ ባብሎኔ ዔውቱዋዖ ዓቲ ዓኣ ዓይሁዶ ዓሳ ዼኤፒ ሜቶና ዻውሲንቲናይዳ ዓኣኔ፤ ሃሣ ዬሩሳላሜኮዋ ዲራ ሻሂንቲ ዶዒ፥ ማርሾ ካራኣ ታሚና ሚቺንቴኔ» ጌይ ታኣም ኬኤዜኔ።

⁴ታኣኒ ዬያ ቢያ ዋይዛዖ ዴዒ ዬኤኬኔ።

⁵«ናንጊና ናንጋ ጎዳ ማዔ ጫሪንጮ ፆኦዛሢዮ! ኔኤኒ ዼኤፒኬ፤ ኑኡኒ ዒጊቹሞና ኔ ቤርታ ዔቃንዳኔ፤ ኔኤኒ ኔና ናሽካዞንሢንታ ኔኤኮ ዓይሢፆ ካፓዞንሢንታ ዎላ ቢያ ጫኣቃ ጫኣቁሞ ኔ ካፓኔ።

⁶ፆኦሲዮ! ኔኤኮ ዓይሎ፥ ዒስራዔኤሌ ዴሮኮ ዻቂንቶሮ ሮኦሮና ዋንቶና ታ ሺኢቃ ሺኢጲፆ ዋይዜ፤ ታኣም ማሌ፤ ኑኡኒ፥ ዒስራዔኤሌ ዴራ ማዼ ጎሞ ታኣኒ ቡኡፃኔ፤ ጎኔና ታናንታ ታኣኮ ቤርታኣ ዓዶንሢንታ ኑ ዻቤኔ።

⁷ኔኤም ዋይዞ ዒፂ ኔኤኮ ዓይሢፆዋ ቢያ ኑ ሄርቄኔ፤ ኔኤኮ ዓይላሢ፥ ሙሴ ዛሎና ኔ ኑም ዒንጌ ዎጎና ዳምቦና ኑ ካፒባኣሴ።

⁸«ናንጊና ናንጋ ጎዳሢዮ! ሃኣታ ኔኤኮ ዓይሎኬ፥ ኔ ዴሮኬ፤ ሃያኮ ቤርታ ኔኤኮ ዼኤፖ ዎልቆና ዶዶ ኩጮና ዓውሲ ኔ ዔያቶ ዻቂሼኔ።

⁹ሃሢያ ኔ ታ ሺኢጲፆ ዋይዜ፤ ሃሣ ኔና ቦንቻኒ ናሽካ ሜሌ ኔ ዓይሎኮዋ ሺኢጲፆዋ ዋይዜ፤ ሃኖ ታኣኒ ማዻኒ ማሌ ማሊፃ ጊኢጋንዳጉዲ፥ ሃሣ ካኣቲኮዋ ዒና ሚጪንታንዳጉዲ ማሂ ታና ማኣዴ።»