1ዒዮቤ ኬኤዛዖ፦
2«ታኣኮ ሃሣኣ ናንጋ
3ዬያ ዎዶና ዹማ ታ ዓኣዻኣና
4ፆኦሲ ታኣና ታ ማኣሮ ዓሶና ካፓ
5ቢያ ባኮ ዳንዳዓ ጎዳ ሃጊ ታጊዳፓ ዱማዺባኣሢሮ
6ቶኮ ታኣኮ ታ ዲኢቂና ማስታንዳያ ሄላንዳኣና
7ካታማ ዓሳ ቡኪንታ ጶኦኮ ታ ዓኣዺ
8ዼጌሢ ታና ዛጋዖ ቦንቾና ታ ቤርታፓ ሺሺኢካኔ፤
9ዴሮም ጌስቲ ጌስቲ ዓኣ ሱኡጋኣ ታና ዛጋኣና
10ዓጮኮ ቢቶ ማዔ ዓሳ ታ ዓኣ ቤዞይዳ ዚቲ ጋዓኔ፤
11«ዋይዜ ዓሲ ቢያ ታና ሄርሻኔ፤
12ዬይ ያዺ ማዔሢ፦
13ሃይቃኒ ዑኪ ዓኣ ዓሶ ታ ማኣዴሢሮ
14ፂሉሞ ዓዳ ማኣዖጉዲ ታ ማይንቴኔ፤
15ዓኣፓ ባይቄሢም ዓኣፒ
16ማንቆ ዓሶኮ ታኣኒ ዓዶ፤
17ጌናሢኮ ባንጋሎ ታ ሜንሤኔ፤
18« ‹ታኣኮ ናንጎ ሌዓ ማኣሻላጉዲ ሚርጌም
19ፃጳ ታኣኮ ቢያ ዎዴ ዋኣሢ ዴንቃያና
20ቢያ ዎዴ ቦንቺንቴ ጎይሣ ታ ናንጋኔ፤
21ዓሳ ታኣም ዋይዚ ዚቲ ጋዓኔ፤
22ጌኤዛ ታኣሲ ዔያቶኮ ዼኤቦ ዛኣራያታሢሮ
23ጎሽካ ዓሲ ሌዔ ዒርዚ ዴንቃኒ ኮዓሢጉዲ
24ታ ዓኣፖ ካሮ ፖዒሲ ታኣኒ ሙስታዛ
25ታኣኒ ታ ኮዔሢ ጎይፆ ዔያቶ ዎይሣኔ፤