ዔርሚያሴ ማፃኣፖ 7

¹ናንጊና ናንጋ ጎዳ ዔርሚያሴም፦

²«ናንጊና ናንጋ ጎዳ ማኣሮ ካራ ዔቂ፥ ሂዚ ጌይ ዴሮም ዒላቲ ኬኤዜ» ጌዔኔ።

³ዒስራዔኤሌ ፆኦዛሢ ማዔ ቢያ ባኮ ማዤ ጎዳ ሂዚ ጋዓኔ፦ ‹ዒንሢ ናንጋ ናንጎና ማዻ ማዾና ጊኢጊሹዋቴ፤ ዒንሢ ዬያይዴቴ ሃይካ ታ ዒንሢ ናንጊሻንዳኔ።

⁴ሃይ ናንጊና ናንጋ ጎዳኮ ጌኤዦ ማኣሮኬ! ሃይ ናንጊና ናንጋ ጎዳኮ ጌኤዦ ማኣሮኬ! ሃይ ናንጊና ናንጋ ጎዳኮ ጌኤዦ ማኣሮኬ፤ ዬያሮ ኑኡኒ ኮሺ ናንጊ ናንጋኔ!› ጌይ ጌይ ጉሪ ዒንሢ ጌስታ ጌኤዞና ጉሙርቂንቲ ዴይፖቴ።

⁵«ዒንሢ ናንጋ ናንጎንታ ማዻ ማዾንታ ላኣሚ ጊኢጊሹዋቴ፤ ዎላ ሴካና ሃንጋና ኮሺ ማዒ ናሹሞና ዎላ ቱኡቲ ናንጉዋቴ፤

⁶ሜሌ ዓጫፓ ሙኬ ዓሶንታ ዜኤሮ ናኣቶንታ ዜኤሮይንዶንሢንታኮ ካራ ባይዚ ቡሪ ዔያቶ ሙይ ሺሪፖቴ፤ ሃያ ዓጮይዳ ናንጋ ፒዜ ዓሶ ጌኔ ጎይሢና ዎዺፖቴ፤ ዒንሢ ባይቁዋጉዲ ሉኡዚ ማዔ ፆኦዞ ዚጊ ካኣሽኪፖቴ።

⁷ዬያይዲ ናንጎ ዒንሢሲ ዒንሢ ላኣሚ ጊኢጊሼቴ ዒንሢኮ ቤርታኣ ዓዶንሢም ናንጊና ዔያቶ ዴኔ ማሂ ታ ዒንጌ ሳዖይዳ ታኣኒ ዒንሢ ናንጊሻንዳኔ።

⁸«ዛጉዋቴ! ዒንሢ ጉሪ ጌጌሾ ጌኤሲ፥ ሎንሦ ኬኤዚንቲባኣ ባኣዚ ጉሙርቃኔ።

⁹ዒንሢ ዉዉኡቃኔ፥ ዓሲያ ዎዻኔ፥ ዓኒ ሃሣ ማቾ ማዒባኣያና ላሃኔ፥ ሉኡዙሞና ዒንሢ ጫኣቃኔ፥ ባዓኣሌ ጌይንታ ፆኦዞም ዒንጎ ባኣዚ ዒንሢ ዒንጋኔ፤ ሃያኮ ቤርታ ዒንሢ ዔሩዋ ፆኦሲ ዒንሢ ካኣሽካኔ።

¹⁰ታ ዒፃ ባኮ ዬያ ጉቤ ማዻዖ ታ ሱንፃ ካኣሽኪንታ ጌኤዦ ማኣሪ ሙኪ ታ ቤርታ ዒንሢ ዔቂጋፓ፦ ‹ኑ ባይሲንታፓ ቶሌኔ!› ጋዓኔ።

¹¹ታኣኮ ሱንፃ ካኣሽኪንታ ጌኤዦ ማኣራ ዉሲ ዓኣሺንታ ቤሲ ዒንሢ ኮይላ ማሊያ? ዒንሢ ማዻ ባኮ ቢያ ሃይሾ ታኣኒ ታ ቶኦኪና ዛጌኔ፤ 7፡11 ማቲ. 21፡13፤ ማር. 11፡17፤ ሉቃ. 19፡46።

¹²ታኣኒ ካኣሽኪንታንዳጉዲ ቤርታዺ ታኣኒ ዶኦሬ ቤዜሎ፥ ሴኤሎ ዴንዱዋቴ፤ ታ ዴሮ፥ ዒስራዔኤሌ ዓሶ ጎሞሮ ጌይ ታኣኒ ዒኢካ ማዼ ባኮ ዛጉዋቴ።

¹³ዒንሢ ሃያ ዻቢንቶ ቢያ ማዻዖ ላሚ ላሚ ታ ዒንሢም ኬኤዜም ዋይዛዓ ዒንሢ ጌዔኔ፤ ታ ዒንሢ ዔኤላዛኣ ዒንሢ ዬሂባኣሴ።

¹⁴ዬያሮ ሴኤሎይዳ ታ ማዼ ባኮ ሃያ ዒንሢ ጉሙርቃ፥ ታኣኮ ጌኤዦ ማኣሮይዳ ታ ማዻንዳኔ፤ ሴኤሎይዳ ታ ማዼማ ጊንሣ ላሚ ዒንሢኮ ቤርታኣ ዓዶንሢንታ ዒንሢንታም ታኣኒ ዒንጌ ቤዛ ማዻንዳኔ። 7፡14 ዒያ. 18፡1፤ ዓይኑ. 78፡60፤ ዔር. 26፡6።

¹⁵ዒንሢኮ ጌርሲንሢ ማዔ ዔፕሬኤሜ ዴሮ ቢያ ታኣኒ ዳውሲ ባይዜሢጉዲ ዒንሢያ ታኣኒ ታ ቤርታፓ ዳውሲ ባይዛንዳኔ፤ ዬያ ጌዔሢ ታና፥ ናንጊና ናንጋ ጎዳኬ።»

¹⁶ናንጊና ናንጋ ጎዳ ሂዚ ጋዓኔ፦ «ዔርሚያሴ! ሃያ ዴሮም ሺኢቂፖ፤ ሃያ ዓሶም ሺኢቃኔ ጌይ ዒላቲፖ፤ ታ ኔኤም ቃይሺንቲንዱዋኣሢሮ ኔ ታና ቃይሺ ሺኢቃንዳያ ኮይሱዋሴ፤

¹⁷ዬያ ሃሺጋፓዖ ዬሩሳላሜኮ ሃንቶ ጎይፆና ዪሁዳ ካታሞናይዳ ዔያታ ማዻ ባኮ ቢያ ኔ ዛጉዋዓዳ?

¹⁸ናኣታ ሃንፂሌ ሃኣካኔ፤ ዓዶንሢ ታሞ ዔኤሣኔ፤ ላኣላ ጊንሣ፦ ‹ጫሪንጮ ጌኤሾ› ጌይንታ ፆኦዜሎም ካሣ ካሣኒ ዺኢሎ ዲርካኔ፤ ታና ዻጋሳኒ ሜሌ ፆኦዞም ዔያታ ዎይኖ ዑዦ ዔኪ ሺኢሻኔ። 7፡18 ዔር. 44፡7-19።

¹⁹ዬያና ዔያታ ታና ዻጋሳንዳያ ዔያቶም ማላ? ዔያታ ሜቶይዳ ጌላኒ ቦርሲንቲ ፔ ባንሢ ዔኤላኔ፤

²⁰ዬያሮ ታኣኒ፥ ቢያ ባኮ ማዤ ጎዳሢ ዬያ ቤዞይዳ ዶዶ ዻጎ ታኣኮ ታ ጮኦሽካንዳኔ፤ ዓሶንታ ቆልሞንታይዳ፥ ሚፆንታ ሃኣኮንታ ቢያሢዳ ታኣኮ ዻጎ ታ ዉዻንዳኔ፤ ታኣኮ ዻጋ ዖኦኒያ ዎዻኒ ዳንዳዑዋ ታሚጉዲ ማዓንዳኔ።»

²¹«ታኣኒ፥ ዒስራዔኤሌኮ ፆኦዛሢ ማዔ ቢያ ባኮ ማዤ ጎዳ ሂዚ ጋዓኔ፦ ‹ዒንሢ ዒንጋኒ ጊኢጊሼ ቤዞይዳ ሚቺ ዒንጋኒና ሜሌ ዒንጊፆዋ ዒንሢ ዔኪ ሺኢሼሢኮ ዓሽኮ ቡኩሲ ዔኪ ዒንሢሮ ሙውዋቴ።›

²²ታኣኒ ዒንሢኮ ቤርታኣ ዓዶንሢ ጊብፄ ዓጫፓ ዔኪ ኬሴ ዎዶና ሚቺ ዒንጎ ዒንጊሢንታ ሜሌ ዒንጎ ባኮ ዛላኣ ፔቴታዖ ታ ኬኤዜ ባኣዚ ባኣሴ፤

²³ጋዓንቴ ታኣኒ ዔያቶኮ ፆኦሲ ማዓዛ ዔያታ ታኣኮ ዴሬ ማዓኒ ታኣም ዓይሢንታኒ ኮይሳሢ ሌሊ ታ ዔያቶም ኬኤዜኔ፤ ቢያ ባካ ዔያቶም ጊኢጋንዳጉዲ ዔያታ ኮዔቴ ታ ዓይሤ ዳምቦ ጎይፆማ ዔያታ ናንጋንዳጉዲ ታ ዔያቶ ዓይሤኔ።

²⁴ዔያታ ጋዓንቴ ዋይዛኒ ኮይባኣሴ፤ ዔኤቢኬያ ጌይባኣሴ፤ ዔያታ ፔኤኮ ዋይዞ ዒፃ ፑርቶ ዒና ዓይሣ ጎይፆ ኮይሴ ባኣዚ ማዼኔ፤ ቤርቲምቱዋንቴ ዔያታ ጊንሢም ዴንዴኔ።

²⁵ዒንሢኮ ቤርታኣ ዓዶንሢ ጊብፄፓ ኬስኬማፓ ዓርቃዖ ሃይማ ሄላንዳኣና ታኣም ማዻ፥ ታ ማሊፆ ኬኤዛ ዓሶ ዎሊ ሄሊሲ ሄሊሲ ታኣኒ ዳኪሢፓ ጊንሢም ጌይባኣሴ።

²⁶ጋዓንቴ ታኣም ዋይዜ ዓሲንታ ዓይሢፆዋ ታኣኮ ዔኤቢኬ ጌዔ ዓሲ ባኣሴ፤ ዔያቶኮ ቤርታኣ ዓዶንሢፓ ዑሣ ዓኣዼ ዋይዚ ዒፃ፥ ፑርታ ዓሲ ዔያታ ማዔኔ።

²⁷«ኔኤኒ ዔርሚያሴ! ሃያ ቢያ ቃኣሎ ታ ዴሮም ኬኤዛንዳኔ፤ ጋዓንቴ ዔያታ ዋይዛዓኬ፤ ኔ ዔያቶ ዔኤላንዳኔ፥ ዔያታ ኔኤም ዬሃዓኬ።

²⁸ሃይ ዴራ ታና፥ ናንጊና ናንጋ ጎዳ ዔያቶኮ ፆኦሲም ዋይዙዋያ፤ ሃሣ ታ ዔያቶይዳ ዓጌ ሜታሢዳፓ ፒዜ ዳምቤ ዔሪ ዔካኒ ኮዑዋያ ማዔኔ፤ ዬያ ዛሎና ጎኑሞ ጋፒ ባይቄኔ፤ ዒዞ ዬኖ ጎኑሞ ዛላ ጌስታ ዓሲያኣ ፔቴታዖ ባኣሴ።

²⁹«ዬሩሳላሜ ዴሬዮቴ!

³⁰«ዪሁዳ ዴራ ፑርታ ባኣዚ ማዼኔ፤ ዎዎዴይ ጌዔቴ ታኣኒ ዒፃ ሜሌ ፆኦዞ ጌኤዦ ማኣሪ ዔኪ ጌልዚ ታኣኮ ጌኤዦ ማኣሮ ዒኢሴኔ።

³¹ዓቲንቆንታ ዉዱሮ ናኣቶንታ ታሚና ሚቺ ዒንጋኒ ሄኖሜ ዶኦጮይዳ ‹ቶፔቴ› ጌይንታ ዒንጎ ቤሲ ዔያታ ጊኢጊሼኔ፤ ዬይ ታኣኒ ዔያቶ ዓይሣ ዓቴም ፔቴታዖ ማሊባኣ ባኣዚኬ። 7፡31 ሌዊ. ዓኬ 18፡21፤ 2ካኣቶ. ማ 23፡10፤ ዔር. 32፡35።

³²ዬያሮ ዬኖ ቤዜሎኮ ሱንፃ ቤን-ሄኖሜ ዶኦጮ፤ ሃሣ ጊንሣ ቶፔቴ ጌይንቲፃ ዓቴም ሹፒ ዶኦቺ ጌይንታንዳ ዎዴ ሙካንዳኔ፤ ሜሌ ዱኡፒ ቤሲ ጴዺንዱዋሢሮ ዬና ዶኦጬላ ዴሮኮ ዱኡፒ ቤሲ ማዓንዳኔ።

³³ዔያቶኮ ሌዛ ካፖንታ ቦዖንታኮ ሙኡዚ ማዓንዳኔ፤ ዬያ ባኮ ሙይፆ ላኣጊ ዳውሳንዳ ባኣዚያ ባኣሴ።

³⁴ሳዔላ ጉሪ ሳዓ ማዒ ዓታንዳኔ፤ ዬሩሳላሜኮ ዓሳ ሃንታ ጎይፆና ዪሁዳ ካታሞናይዳ ቢያ ዔፒ ኮሢንታ ዎዛ ዑኡሲያ ፔቴታዖ ዋይዚንቱዋጉዲ ታ ባይዛንዳኔ።» 7፡34 ዔር. 16፡9፤ 25፡10፤ ዮሃ. ፆፔዻ 18፡23።