ሩኡቴ ማፃኣፖ 3

¹ፔቴ ኬሊ ናዖሚ ሩኡቴ ኮይላ፦ «ታ ናዔሌ! ኔ ሌዒ ማኣሪ ዓርቃንዳጉዲ ኔና ዎይሣንዳ ዓሲ ታ ኔኤም ኮዔቴ ቃራኬ።

²ኔኤኒ ዚንጋሢ ዚንጋኣና ኔኤና ዎላ ዔልዖ ጮኦራ ላኣላ ዒዛም ማዻ፥ ቦዔዜ ኑ ማኣሪ ዓሲኬ፤ ዒዚ ሃኖ ዒባናኣና ዔልዖ ሺርካኔ፤

³ዬያሮ ኔኤኮ ዑፆ ማስቲ ሳውቃ ቲዦና ቲሽቲ፥ ሚዛጶ ማኣዓሢያ ማይንቴ፤ ዬካፓ ዒዚ ዔልዓሢ ሺርካ ቆይዶ ዴንዴ፤ ጋዓንቴ ዒዚ ሙዖ ባኣዚ ሙዒ ዑሽኮ ባኮዋ ዑሽኩዋንቴ ዒዛ ቤርታ ኬስኪ ጴዺፖ።

⁴ዒዚ ላሃ ቤዞ ኮሺ ዛጊጋፓ ዒ ጊንዓዛ ዒዛ ኮይላ ሙኪ ቶኮ ዛላፓ ዓፒሎ ዔኪ ቶኮ ዴማ ዒዛኮ ላሄ፤ ኔ ዓይጎ ዎዳንዳቴያ ዒ ኔኤም ኬኤዛንዳኔ» ጌዔኔ።

⁵ሩኡቴ ዒማና፦ «ኔ ጌዔ ባኮ ቢያ ታ ማዻንዳኔ» ጌዔኔ።

⁶ዬያሮ ሩኡቴ ሃኣኮ ሺርኮ ቆይዶ ዴንዲ፥ ዓሃ ዒዞ ዞሬ ዞሮ ጎይፆማ ማዼኔ።

⁷ቦዔዜ ሙይ ዑሽኪ ዑፃኣ ዒዛም ጊኢጌስካፓ ዔልዖ ናቶ ኮይላ ዴንዲ ላሂ ጊንዔኔ፤ ዬካፓ ሩኡቴ ቃኣፂ ዒዛ ኮይላ ሙካዖ ዓፒሎ ዒዛኮ ቶኮ ዑፃፓ ቡጊ ቶኮ ዴማ ላሄኔ።

⁸ሳዓ ጊዲሚሺ ማዓኣና ቦዔዜ ዲቃቲ ጴጫዖ፥ ሺሪ ላሃንቴ ቶኮ ዴማ ዒዛኮ ፔቴ ላኣሊ ላሂ ዓኣሢ ዴንቂ፦

⁹«ኔኤኒ ዖናዳይ?» ጌይ ዖኦጬኔ።

¹⁰ዒማና ቦዔዜ ዒዞም፦ «ናንጊና ናንጋ ጎዳ ኔና ዓንጆንጎ! ሃሢ ሃይ ኔ ማዼ ባካ ሃያኮ ቤርታ ኔ ዓሆም ኔ ማዼ ኮዦ ማዻፓ ዑሣ ዓኣዼ ባኣዚኬ፤ ኔ ሄኤዶ ኮዔቴ ዖርጎቺ፥ ሃንጎ ማንቆ ዼጌም ሌዔያ ናንዳኔ፤ ጋዓንቴ ኔ ዬያይዳኒ ኮይባኣሴ።

¹¹ሩኡቴ! ሃይካፓ ሴካ ዓይጎ ባኣዚሮዋ ማሊ ሜታዺፖ፤ ካታሞይዳ ዓኣ ዓሳ ኔኤኒ ኮሺ ላኣሊ ማዔሢ ዔራኔ፤ ኔ ኮዔ ባኮ ቢያ ታ ኩንሣንዳኔ።

¹²ታኣኒ ጎኔ ኔኤኮ ማኣሪ ዓሲኬ፤ ጋዓንቴ ታጊዳፓ ባሼ ኔኤኮ ዑኬ ማዔ ዒጊኒ ዓኣኔ፤ 3፡12 ሩኡቴ 2፡20።

¹³ሃሢ ካራንዳያ ሄላንዳኣና ሃይካ ዎርቄ! ሳዓ ካራዛ ዬይ ዓሢ ኔና ዎይሣንዳቴያ ዎይሢንዱዋቴያ ታ ዖኦጫንዳኔ፤ ዒዚ ‹ዋይሣንዳኔ› ጌዔቴ ኮሺኬ፤ ዒፃያ ማዔቴ ጋዓንቴ ኔና ታ ዎይሣንዳያታሢ ናንጊና ናንጋ ጎዳ ሱንፆና ታ ኔኤም ጫኣቃኔ፤ ሃሢ ሳዓ ካራንዳያ ሄላንዳኣና ሃይካ ላሄ» ጌዔኔ።

¹⁴ዬያሮ ሩኡቴ ቦዔዜ ቶኮ ዴማ ላሄኔ፤ ጋዓንቴ ዒዛ ሃኣኮ ሺርኮ ቆይዶ ሙኬሢ ዓሲ ዔሩዋጉዲ ቦዔዜ ኮዔሢሮ ዓሲ ዴንቂንዱዋ ዎዴይዳ ጉቴ ዹማ ላሄ ቤዛፓ ዒዛ ዔቄኔ።

¹⁵ቦዔዜ ዒማና ሩኡቴ ኮይላ፦ «ዓፒሎ ኔኤኮ ዑፃፓ ዔኪ ሃንጋ ሂኢሤ» ጋዓዛ፥ ዒዛ ዓፒሎ ሂኢሤም ዒዚ ላማታሚ ኪሎ ማዓንዳ ዔልዓ ማኪ ዋሂ ዒዞ ባሲሴኔ፤ ዬካፓ ዒዛ ዔልዖ ባሲ ካታሞ ዴንዴኔ።

¹⁶ዬያይዲ ዒዛ ዓሆ ኮይላ ሙካዛ ዓሃ፦ «ታ ናዔሌ! ዬና ኑ ጌዔ ባኬላ ዎይቴይ?» ጌይ ዖኦጬኔ፤ ዬያሮ ሩኡቴ ቦዔዜ ዒዞም ማዼ ባኮ ቢያ ኬኤዜኔ።

¹⁷ሃሣ ዒዚ፦ « ‹ኔ ዓሆ ኮራ ኩቺ ጉሪ ዴንዲፖ› ጌዒ ሃያ ላምዖ ሻምቦ ማዓ ዔልዖ ታኣም ዒንጌኔ» ጌዒ ኬኤዜኔ።

¹⁸ናዖሚ ዒማና፦ «ታ ናዔሌ! ዬይ ባካ ዎይታንዳቴያ ጊቢ ካፔ፤ ቦዔዜ ሃኖ ዬኖ ባኮ ኩንሡዋዖ ሃውሻዓኬ» ጌዔኔ።