ዒሲያሴ ማፃኣፖ 31

¹ሚርጌ ፓራሢንታ ሳርጌሎ ዖይቶንታ ፖኦሊሳኣ ዓኣ ዶዶ ማዔ ጊብፄኮ ዖሎ ዓሶ ጉሙርቂ ማኣዳሢ ዴንቃኒ ዒኢካ ዴንዳ ዓሶም ባዴዔ! ዔያታ ዒስራዔኤሌኮ ዱማዼ ናንጊና ናንጋ ጎዳ ማኣዶ ሺኢቁዋሴ፥ ሃሣ ዒዛኮ ዳምቦዋ ዔያታ ዔኩዋሴ።

²ጋዓንቴ ናንጊና ናንጋ ጎዳ ዔሮኬ፤ ዱማ ዱማ ባይዛ ባኣዚያ ዒ ዔኪ ሙካኔ፤ ዒ ኬኤዜ ቃኣሎ ጊንሢም ማሁዋሴ፤ ፑርቶ ዓሶ ማኣሮና ዬያ ፑርቶ ዓሶ ማኣዳ ዓሶ ባይዛኒ ዒ ዔቃኔ።

³ጊብፄ ዓሳ ዓሲ ማዓንዳፓዓቴም ፆኦሲቱዋሴ፤ ፓራሢያ ዔያቶኮ ሃይቃ ሼምፔና ዓኣያ ማዓንዳፓዓቴም ዓያናቱዋሴ፤ ናንጊና ናንጋ ጎዳ ዻጋዺ ዔቃ ዎዶና ማኣዳያ ማዔ ካኣቲ ዹቂንታንዳኔ፥ ማኣዲንታ ካኣቲያ ዶዓንዳኔ፥ ላምዓሢ ዎሊ ዔኪ ባይቃንዳኔ።

⁴ናንጊና ናንጋ ጎዳ ታኣም ሂዚ ጌዔኔ፦ «ዞቢ ቆልሞ ዎዺ ጉዻ ዎዶና ቆልሞ ሄንቃ ናኣታ ዎሊ ዔኤሊ ዎዚ ዒላቴቴያ ዔያቶኮ ዒላታ ዞባሢ ዒጊቹዋሢጉዲ ታኣኒያ ቢያ ባኮ ዎይሣ ጎዳ ፂዮኔ ዹኮና ጌሜሮናይዳ ዖልዚሮ ኬዳንዳኔ።

⁵ካፒ ፔኤኮ ማኣራ ዓኣ ናኣቶ ዔኤቢ ዔካያይዳፓ ቃዛኒ ባራኒ ዓጮ ሺራሢጉዲ ታኣኒ ቢያ ባኮ ዎይሣ ጎዳ ዬሩሳላሜ ዔኤቢ ሄሉዋጉዲ ቃዛንዳኔ፥ ላኣጋንዳኔ፥ ዓውሳንዳኔ፥ ዑፃኣ ሺሪያ ታ ዒዞ ዻቂሻንዳኔ።

⁶«ዒስራዔኤሌ ዴሬዮቴ! ጋፒ ዒንሢ ዒፄሢ ባንሢ ማዑዋቴ!

⁷ዒንሢኮ ጎሞ ኩጮና ቢሮንታ ዎርቆንታይዳፓ ዒንሢ ኮሼ ሜሌ ፆኦዞ ቢያ ዢቢ ዒንሢ ሃሻንዳ ዎዴ ሙካንዳኔ።

⁸ዓሶኦሬ ዓሳ ዓሲሮ ማዒባኣ ጬንቻ ዓፓሮና ሃይቃንዳኔ፤ ዬያ ጬንቾ ዓፓሮ ቤርታ ዔያታ ዔቃዓኬ፤ ዔያቶኮ ዼጌ ዓሳ ዎልቄና ማዺሾ ማዾ ማዻንዳኔ።

⁹ዲቃሣ ባኣዚ ሙካ ዎዶና ዔያቶኮ ዋርዲያ ዶዓንዳኔ፤ ዔያቶ ዖሎ ዓሶኮ ሱኡጋ ፔኤኮ ባንዴሮ ሃሺ፥ ጎጋይቂ ጎጋይቂ ጳሽካንዳኔ።» ታማ ፂዮኔይዳ፥ ናኣባና ዬሩሳላሜይዳ ማዔ ናንጊና ናንጋ ጎዳሢ ሃያ ኬኤዜኔ።