ዒሲያሴ ማፃኣፖ 15

¹ሞዓኣቤ ዓጮም ኬኤዚንቴ ፆኦሲ ቃኣላ ያዺኬ፤

²ፂቦኦኔ ዴራ ዔያቶኮ ሜሌ ፆኦዞ ካኣሽኮ ማኣሮይዳ ዬኤካኒ ሌካ ጌሜሮ ኬስካኔ፤ ሞዓኣቤ ዴራ ዔያቶኮ ኔኤቦና ሜዳባ ካታሞናሮ ሚርጌ ዖዪ ዬኤካኔ፤ ዬያ ዖዪፆና ፔኤኮ ቶኦኮ ጋሞና ቡኡጮዋ ሜኤዲ ጉኡሊንቴኔ።

³ጎይፃ ጴዻ ዓሳ ሲዬ ፓቲሌ ማይንቴያኬ፤ ዔያቶኮ ኩቦ ማኣሮ ዑፃ ዓኣ ቤዞና ዓሳ ቡኪንታ ጶኦካ ቢያ ዓቢቲ ዓቢቲ ዔያታ ዬኤካኔ።

⁴ሃሴቦኦኔንታ ዔልዓሌ ዴራ ዒላታኔ፤ ዔያቶኮ ዒላታ ያሃፄ ጌይንታ ቤዞ ሄላንዳኣና ዋይዚንታኔ፤ ሞዓኣቤ ፖኦሊሳኣ ዓቱዋዖ ጫርሹማ ዔያቶኮ ባይቂ ዒጊቹሞና ጎጋይቄኔ።

⁵ሞዓኣቤ ዓጮ ዛሎ ዒናፓ ታ ዬኤኬኔ፤ ዴራ ዒዞኮ ፆዓሬና ዔጊላቴሼልሺያ ቤቴኔ፤ ዛሎንሢ ሌካ ሉሂቴ ሴኤሮ ኬስኬኔ፤ ዒማና ዔያታ ኬዞ ኬስካዖ ዬኤካኔ፤ ዛላ ሃሣ ዑኡዞ ፔኤሲ ዼጊዲ ፔኤኮ ባይሲንቶ ዛሎ ዬኤኪ ዬኤኪ ሆሮናይሜ ጌይንታ ቤዞ ቶሊ ዓኣዻኒ ማሌኔ።

⁶ዒማና ኒምሪሜ ዎራ ሚጬኔ፤ ዓይጎዋ ዓኣዔ ባኣዚ ዓቱዋዖ ዓጮይዳ ዓኣ ማኣታ ቢያ ሜሌኔ።

⁷ዴራ ቡኩሴ ቆሎ ዔኪ ዓሃያ ጌይንታ ሚፃ ዓኣ ዶኦጮና ፒንቂ ዓኣዼኔ፤

⁸ሞዓኣቤ ዓጮኮ ዛጳኣ ቢያ ቤዛ ዒላቲ ዋይዚንታኔ፤ ዬይ ዒላታ ዔጊላይሜንታ ዴንዲ ቢዔርዔሊሜያኣ ሄሌኔ።

⁹ዲቦኔ ጌይንታ ካታሞ ዎራ ዓሲ ሱጉሢና ኩሜኔ፤ ጋዓንቴ ዲቦኔይዳ ፆኦሲ ዬያይዳፓ ባሼ ባኣዚ ዔኪ ሙካንዳኔ፤ ሞዓኣቤይዳፓ ፑኒንቲ ቶላዞንሢና ሃይባፓ ዓቴንዞንሢያ ቢያ ዞቢ ዳኪ ዒ ባይዛንዳኔ።