ሂዚቄኤሌ ማፃኣፖ 6

¹ናንጊና ናንጋ ጎዳ ታኣም ሂዚ ጌዒ ኬኤዜኔ፦

²«ዓሲ ናዓሢዮ! ዒስራዔኤሌ ዓጮ ዹኮ ባንሢ ዛጌ፤ ዔያቶም ፆኦሲ ማሊሢ ኬኤዜ።

³ዒስራዔኤሌ ዓጮ ዹካ ዼኤፖ ጎዳሢኮ ቃኣሎ ዋይዛንዳጉዲ ኬኤዜ፤ ታኣኒ ዼኤፖ ናንጊና ናንጋ ጎዳ ኬኤዛሢ ዹኮንታ ጌሜሮንታ ማጋዻ ጊንፆ ዶኦጫ ቢያ ዋይዞንጎ፤ ዴራ ሜሌ ፆኦዞም ዚጋ ዼጌ ቤዞ ቢያ ባይዛ ጬንቼ ዓፓሮ ታ ዳካንዳኔ።

⁴ዬያቶኮ ዒንጎ ባኮ ሺኢሾ ቤዛ ቢያ ሻሂንታንዳኔ፤ ሃሣ ዑንጆ ጩቢሾሢያ ቢያ ጋኣጪንታንዳኔ፤ ዎዺንቴ ዓሳ ዔያቶኮ ካኣሽኮ ፆኦዞ ቤርታ ኬኤሪንታንዳኔ።

⁵ዒስራዔኤሌ ዴሮኮ ሌዛ ዔያቶኮ ፆኦዞ ቤርታ ኬኤሪንታንዳጉዲ ታ ማዻንዳኔ፤ ዬያቶኮ ሜጌፆዋ ዔያታ ዒንጎ ባኮ ሺኢሻ ቤዞኮ ዓጮ ሺርሺ ታኣኒ ዜርቃንዳኔ።

⁶ዒንሢ ናንጋ ካታማ ቢያ ጉሪ ማዓንዳኔ፤ ዒንሢ ዚጋ ዼጌ ቤዛኣ ሻሂንታንዳኔ፤ ዒንጎ ባኮ ሺኢሻ ቤዛ ሻሂንቲ ዒንሢኮ ጉሪ ማዓንዳኔ፤ ዒንሢኮ ካኣሽኮ ፆኦዛ ሜቂ ዶዓንዳኔ፤ ዑንጆ ጩቢሾሢያ ጋኣጪንታንዳኔ፤ ዒንሢ ማዼ ባካ ቢያ ቤሲ ባይቃንዳኔ።

⁷ዎዺንቴ ዓሳ ዒንሢኮ ቢያ ቤዛ ኬኤሪንታንዳኔ፤ ዬካፓ ዒንሢ ታኣኒ ናንጊና ናንጋ ጎዳ ማዔሢ ዔራንዳኔ።

⁸«ጋዓንቴ ዒንሢዳፓ ዻካ ዓሲ ታ ዓይሳንዳኔ፤ ዒንሢኮ ዛላ ዓሲ ሜሌ ዴሮ ዓጮ ዓኣዺ ዖሎይዳፓ ቶሊ ዓታንዳኔ።

⁹ሃይባፓ ቶሌ ዓሳ ዲዒንቲ ዓኣዼ ሜሌ ዴሮ ባኣካ ዓኣዖ ታና ማሊ ጶቂሣንዳኔ፤ ዔያታ ታና ጶቂሣንዳሢ ታ ጊዳፓ ሃኬ፥ ዳምቤ ባኣያ ማዔ ፑርቶ ዒኖንታ ዳምቤ ባኣያ ማዔ ዓኣፓኣ ዔያቶኮ ሜሌ ፆኦዞ ዛጊሢና ታና ዔያታ ዖዪሴሢሮኬ፤ ሃሣ ዔያቶኮ ዒኢቴ ማዾና ዔያታ ማዼ ፑርቶ ባኮሮ ዔያታ ፔና ሻኣኪንታንዳኔ።

¹⁰ታኣኒ ናንጊና ናንጋ ጎዳ ማዔሢና ባይሲንታ ዔያቶይዳ ዔኪ ሙካኒ ‹ዒንሢና ዔሩዋቴ› ጌዔ ላቲፃ ቢያ ታኣኮ ጉሪ ዚርቂሢ ማዒባኣያታሢ ዔያታ ዔራንዳኔ።»

¹¹ዼኤፖ ናንጊና ናንጋ ጎዳ ኬኤዛዖ፦ «ዖልዚና ናይዚና ዱማ ዱማ ዎዻ ሃርጌናኣ ሃይቃንዳ ዒስራዔኤሌ ዓሶኮ ፑርቶ ዒኢቴ ማዾ ዛሎሮ ቢያ ‹ኑና ባዴዔ!› ጌዒ ጌዒ ኩጮና ቤኤዚንቲ፥ ቶኮናኣ ሳዖ ዓኪ ዓኪ ዖዪፆ ዒንሢኮ ፔጋሲ ዻውዋቴ!

¹²ሃኬ ዓኣ ዓሳ ሃርጊንቲ ሃይቃንዳኔ፤ ዑኬ ዓኣ ዓሳ ዖልዚና ሃይቃንዳኔ፤ ዬካፓ ዓቴ ዓሳ ናይዚና ሃይቂ ጋፓንዳኔ፤ ዬያይዲ ታኣኮ ዎልቃዻ ዻጎ ዔያቶ ዑፃ ታ ኬይሳንዳኔ።

¹³ሌዛ ዔያቶኮ ሜሌ ፆኦዞና ዒንጊፆ ሺኢሾ ቤዞኮ ኮይላ ኩሊንታንዳኔ፤ ዼጌ ጌሜሮና ዹኮ ቶኦኮና፥ ዬያጉዲ ሃሣ ዋላዣ ዋርቄ ሚፆና ዼኤፖ ሻኣቦ ዴማ ዔያቶኮ ካኣሽኮ ፆኦዞም ቃራ ሳውቃ ቲዦ ሺኢሾ ቤዞይዳ ቢያ ሌዛ ዔያቶሲ ኬኤሪንታንዳኔ፤ ዬኖ ዎዶና ዓሳ ቢያ ታኣኒ ናንጊና ናንጋ ጎዳ ማዔሢ ዔራንዳኔ።

¹⁴ጎኔና ታኣኒ ኩጮ ታኣሲ ዔቂሲ ዓጮ ዔያቶኮ ባይዛንዳኔ፤ ዾኦሎ ዛሎይዳ ዓሲ ናንጉዋ ዳውላፓ ዓርቃዖ ኬዶ ዛላ ዓኣ ዲቢላ ካታሞ ሄላንዳኣና ጉሪ ሳዓ ታ ማሃንዳኔ፤ ዒስራዔኤሌ ዓሳ ናንጋ ቤዞ ቢያ ፔቴታዖ ዓይሱዋዖ ታኣኒ ባይዛንዳኔ፤ ዬኖ ዎዶና ታኣኒ ናንጊና ናንጋ ጎዳ ማዔሢ ዓሳ ቢያ ዔራንዳኔ።»