ሂዚቄኤሌ ማፃኣፖ 2

¹ዬይ ዓሢ፦ «ዓሲ ናዓሦ! ሌካ ዔቄ፤ ታ ኔኤና ጌስታንዳኔ» ጌዔኔ።

²ዒዚ ጌስታኣና ዓያና ታ ዒኖ ጋሮ ጌሊ ታ ቶኮና ታና ዔቂሴኔ፤ ዒ ጋዓ ባኮዋ ታ ዋይዜኔ።

³ዒማና ዒዚ ሂዚ ጌዔኔ፦ «ዓሲ ናዓሢዮ! ታኣም ዋይዞ ዒፄ ዒስራዔኤሌ ዴሮ ባንሢ ታ ኔና ዳካኔ፤ ዔያቶንታ ዔያቶኮ ቤርታኣ ዓዶንሢንታ ሃኖ ሄላንዳኣና ታኣም ዋይዞ ዒፄ ጎይሣኬ።

⁴ዬና ዴራ ዋይዚ ዒፃያ፥ ባቃና ዴይሤያኬ፤ ታኣኒ ኔና ዔያቶ ኮራ ዳካንዳኔ፤ ኔኤኒያ ዔያቶም፦ ‹ናንጊና ናንጋ ጎዳ ሂዚ ጋዓኔ› ጌዔ።

⁵ዔያታ ዋይዚ ዒፃ ማኣሪ ማዔሢሮ ኔኤም ዔያታ ዋይዜቴያ ዋይዚባኣቴያ ዔያቶ ባኣካ ፆኦሲ ማሊሢ ኬኤዛይ ዓኣያ ማዔሢ ዔያታ ዔራንዳኔ።

⁶«ኔኤኒ፥ ዓሲ ናዓሢዮ! ዔያቶ ማዔቴያ ዔያቶኮ ዑኡዞ ዒጊጪፖ፤ ጋውዲ ዓንጊሢና ሜሌ ዓንጊሢናጉዲ ኔኤም ዔያታ ማዒ፥ ጊንሣ ሃሣ ኮርኖ ባኣካይዳ ናንጋያ ኔኤም ማሊ ጴዼቴያ ዔያቶኮ ዑኡዞዋ ማዖም ዬንሢ ዋይዞ ዒፃዞንሢኮ ቲርኪንቴ ዓኣፖ ካሮ ዒጊጪፖ።

⁷ዔያታ ዋይዚ ዒፃ ዴሬ ማዔሢሮ ኔኤም ዋይዜቴያ ዋይዚባኣቴያ ታኣኒ ኔኤም ኬኤዛ ቃኣሎ ዔያቶም ኔ ኬኤዛንዳኔ።

⁸«ዓሲ ናዓሢዮ! ታ ኔኤም ጋዓ ባኮ ዋይዜ፤ ኔኤኒያ ዔያቶጉዲ ዋይዞ ዒፃያ ማዒፖ፤ ዻንጎ ኔኤኮ ሾኦኬ፤ ታ ኔኤም ዒንጋሢያ ሙዔ።»

⁹ዬካፓ ቁሪንቴ ቢራኖ ማፃኣፖ ዓርቄ ኩቺ ታኣም ማፃኣፖ ዒንጋንቴ ታ ዛጌኔ።

¹⁰ዬና ኩጬላ ዬኖ ቁሪንቴ ቢራኖ ማፃኣፔሎ ታ ቤርታ ቡሌኔ፤ ዬይ ማፃኣፓ ላምዖ ዛሎና ቢያ ፃኣፒንቴያታሢ ታኣኒ ዛጌኔ፤ ዬያይዳ ዬኤፒንታ ዖዪሢንታ ዒላቲ ቃኣላ ፃኣፒንቴያኬ። 2፡10 ዮሃ. ፆፔዻ 5፡1።