ዒዝራ ማፃኣፖ 4

¹ዪሁዳና ቢኢኒያሜና ዴሮኮ ሞርካ ዲዒንቶፓ ማዔ ዓሳ ናንጊና ናንጋ ጎዳ ማዔ ዒስራዔኤሌ ፆኦዛሢም ጌኤሺ ማኣሪ ማዣሢ ዋይዜኔ።

²ዬያሮ ዔያታ ዜሬባቡሌና ቶኦኮ ቶኦኮኮ ሱኡጎ ኮይላ ሙካዖ፦ «ጌኤዦ ማኣሮ ኑ ዎላ ማዦም፤ ሃያ ዒንሢ ካኣሽካ ፆኦዛሢ ኑዋ ካኣሽካኔ፤ ዓሶኦሬ ካኣቲ፥ ዓስራዶኔ ሃንጋ ዓጮ ባንሢ ኑና ዳኬሢዳፓ ዓርቃዖ ዒዛም ዒንጎ ባኮ ኑ ዒንጊ ዒንጊኬ» ጌዔኔ። 4፡2 2ካኣቶ. ማ 17፡24-41።

³ጋዓንቴ ዒማና ዜሬባቡሌንታ ዒያሱንታ ቶኦኮ ቶኦኮኮ ሱኡጋኣ ቢያ ዬንሢ ዓሶም፦ «ናንጊና ናንጋ ጎዳ ማዔ ኑ ፆኦዛሢም ኑ ማዣ ጌኤዦ ማኣሮ ማዾ ዒንሢ ኑና ማኣዳንዳያ ኮይሱዋሴ፤ ዬያ ፓርሴ ካኣቲ፥ ቂኢሮሴ ኑና ዓይሤ ጎይፆና ኑ ኑኡሮ ማዣንዳኔ» ጌይ ማሄኔ።

⁴ዬካፓ ዬኖ ዓጮይዳ ናንጋ ዴራ ዓይሁዶ ዓሶ ዒጊቺሢና ሃሣ ካራ ባይዚሢና ጌኤዦ ማኣሮ ማዢፆ ማዾ ላኣጋኒ ዔቄኔ።

⁵ዔያታ ዎዎዴይ ጌዔቴ፦ ፓርሴ ካኣቲኮ ቢታንታ ዓኣ ዓሶም ዴሚና ዒንጎ ሚኢሼ ዒንጊሢና ማኣሮ ማዡዋጉዲ ላኣጋኒ ማሌኔ፤ ዬያ ዔያታ ካኣቲ ቂኢሮሴ ዎዳፓ ዴንዲ ካኣቲ ዳኣሪዮሴ ዎዶ ሄላንዳኣና ማዺፆ ሃሺባኣሴ።

⁶ዬያ ሌሊቱዋንቴ ዔያታ ካኣቲ ፄሬኪሲሴ ካኣታዼ ቤርታሳ ሌዖይዳ ዪሁዳና ዬሩሳላሜናይዳ ናንጋ ዲዒንታፓ ማዔ ዓሳ ዎጌና ዓርቂንታንዳጉዲ ሃይሶ ፃኣፒ ካኣቲም ሺኢሼኔ። 4፡6 ዓስቲ. 1፡1።

⁷ዓርፄክሲሴ ፓሪሴ ዓጮ ካኣቲ ማዒ ዓኣ ዎዶና ቢሽላሜ፥ ሚትሬዳቴ፥ ፃብዔኤሌንታ ሜሌ ዔያቶና ዎላ ዓኣ ዓሳ ዎጌና ዔያታ ዓርቂንታንዳጉዲ ጋዓ ዋርቃታ ፃኣፒ ካኣቲም ሺኢሼኔ፤ ዬይ ዋርቃታ ፃኣፒንቴሢ ሶኦሪያ ዓጪ ፒዳኣሌና ሙኡቺና ማዔሢሮ ናባቢንቲ ቡሊ ኬኤዚንታንዳጉዲ ዳኪንቴያኬ።

⁸ዬያጉዲ ሃሣ ዓጮ ዎይሣ ሬሁሜና ፃኣፓሢ ሺምሻዬና ዬሩሳላሜ ዛሎ ሃካፓ ዴማ ዓኣ ማሊፆ ካኣቲም ፃኣፔኔ፤

⁹ዓጮ ዎይሣ ሬሁሜና ፃኣፓሢ ሺምሻዬ፤ ሃሣ ዔያቶና ዎላ ዎጎ ዎጋ ዓሶንታ ቲሪፖሊሴይዳ፥ ፓሪሴይዳ፥ ዔሬኬይዳ፥ ባብሎኔና ሱሳናይዳ ናንጋ ቢታንታ ዓኣ ሃንጎ ዓሳኣ ቢያ፤

¹⁰ዎልቆና ዼኤፖ ካኣታሢ ዓሴናፔሬ ሾይንቴ ዓጫፓ ሳማሪያ ካታሞና ዔፕራፂሴኮ ዓባ ጌላ ዛሎ ዳኪ ዱማ ዱማ ቤዛ ናንጋንዳጉዲ ዒ ማሄ ሃንጎ ዴሮና ዎላ ዒ ፃኣፔያ ማዓዛ፥

¹¹ፃኣፒንቴ ዋርቃቴሎኮ ዼኤፖ ማሊፃ ሂዚ ጋዓያኬ፦ ዔፕራፂሴኮ ዓባ ጌላ ዛሎና ናንጋ ኔኤኮ ማዻዞንሢፓ ካኣቲ ዓርፄክሲሴም ዳኪንቴያ፥

¹²«ዼኤፖ ቦንቺንታሢዮ! ኔ ኮይላፓ ሙኬ ዓይሁዶ ዓሳ ዬሩሳላሜይዳ ዴዒ ዬኖ ዋይዞ ዒፃ ፑርቶ ካታሜሎ ጊንሣ ኮሺ ማዢሢዳኬ፤ ዲሮዋ ዓካሲ፥ ጌኤዦ ማኣሮዋ ማዢፆ ዓርቄኔ።

¹³ዬያሮ ካኣቲዮ! ዬና ካታሜላ ጊንሣ ማዢንቲ ዲሮ ማዻኣ ጊኢጊ ጋፔያታቶ ዴራ ጊኢሮ ኔኤም ጪጊፆ ሃሻንዳኔ፤ ሃሣ ኔኤም ዒንጊንታ ካኣቱሞ ማኣሪ ጌላ ባካኣ ፓጫንዳሢ ዔሬ!

¹⁴ኑኡኒ ካኣቲ ማኣራፓ ዴንቃ ባኣዚ ዓኣያታሢሮ ኔኤኒ ቶኦቺንቴም ዚቲ ጌይ ዛጊፃ ኑም ኮሽኩዋኣያ ማዔም ሃያ ኪኢቶ ኑ ኔኤም ዳኬኔ፤

¹⁵ኔኤኮ ቤርታኣ ዓዶንሢ ሃይሶይዳ ፃኣፒንቲ ዓኣ ባካ ዛጊንታንዳጉዲ ኔ ዓይሣንዳጉዲ ኑ ኔኤም ኬኤዛኔ፤ ዬይ ዛጊንታ ዎዶና ዬና ካታሜላ ቢያ ዎዴ ዋይዚ ዒፃያ፥ ሃሣ ሚናኣፓ ዓርቃዖ ካኣቶና ዱማ ዱማ ዓጮ ዎይሣ ዓሶ ዎማይዲ ዔያታ ሜታሳቴያ ማርካ ማዓ ባኣዚ ዬና ዛጋ ዓሳ ዴንቃንዳኔ፤ ሚናፓ ዒዞይዳ ዓኣ ዴራ ዋይዙዋኣያኬ፤ ሃያኮ ቤርታ ካታሜላ ዶዒ ባይቃንዳጉዲ ማዺንቴሢ ዬያሮኬ።

¹⁶ዬና ካታሜላ ጊንሣ ላሚ ማዢንቲ፥ ዲሮ ኮሺፃኣ ዒዞኮ ጋፔስካፓ ካኣቲዮ! ዔፕራፂሴኮ ዓባ ኬስካ ባንፆና ዓኣ ዓጮይዳ ቤሲ ኔኤኮ ባኣያ ማዓንዳሢ ኑ ኔኤም ኬኤዛኔ» ጋዓያኬ።

¹⁷ዬኖኮ ካኣቲ ማሃዖ፦ «ዓጮ ዎይሣ ሬሁሜም፥ ፃኣፓሢ ሺምሻዬም፤ ዬያጉዲ ሃሣ ሳማሪያና ዔፕራፂሴ ዎሮኮ ዓባ ጌላ ባንፆይዳ ዓኣ ዴሮናም ቢያ፥ ዒንሢ ኮሺዳ?

¹⁸«ዒንሢ ታኣም ፃኣፒ ዳኬ ዋርቃታ ናባቢንቲ ቡሊንቴም ታ ዋይዜኔ፤

¹⁹ዬኖ ማሊፆና ዒንሢ ጌዔ ጎይፆ ዔባ ዛጊንታንዳጉዲ ታ ዓይሤኔ፤ ዬያሮ ዛጋ ዓሳ ዒማና ዴንቄ ጎይፆና ዬሩሳላሜ ሚናፓ ዓርቃዖ ካኣቶም ዋይዚ ዒፂ ናንጋያ፥ ሜታሳ ዓሲ ኩሜ ካታማታሢ ዔርቴኔ፤

²⁰ያዺ ማዔያታቴያ ዬሩሳላሜይዳ ዔፕራፂሴኮ ዓባ ኬስካ ባንፆና ዓኣ ዓጮ ቢያ ጊኢራ ጊኢሪሻያ፤ ሃሣ ኮርሞ ኮርማ ዓሶፓ ሚኢሼ ጪጊሻ ዔርቴ ካኣታ ዒኢካ ካኣታዼኔ።

²¹ዬያሮ ታ ላሚ ሃሣ ሜሌ ኪኢታ ዒንሢም ዳካንዳያ ሄላንዳኣና ዬና ዓሳ ካታሜሎ ጊንሣ ማዢፆ ሃሾንጎ ጎዑዋቴ፤

²²ኑኡኮ ካኣቱሞይዳ ዓይጎ ሜታኣ ሄሉዋጉዲ ዬኖ ዛሎ ዒንሢና ዔሩዋቴ!» ጌይ ዳኬኔ።

²³ዬካፓ ካኣቲ፥ ዓርፄክሲሴ ማሂ ዳኬ ዋርቃታ ሙኪ ሬሁሜም፥ ሺምሻዬና ዔያቶና ዎላ ዓኣ ዓሶም ቢያ ናባቢንቴስካፓ ዔያታ ኔጉዋዖ ዬሩሳላሜ ሙኪ ዓይሁዳ ዬሩሳላሜ ጊንሣ ማዢፆ ሃሻንዳጉዲ ላኣጌኔ፤

²⁴ዬያሮ ዳኣሪዮሴ ፓሪሴይዳ ካኣታዼ ላምዓሳ ሌዖ ሄላንዳኣና ጌኤዦ ማኣሮ ማዻ ላኣጊንቴሢሮ ማዻ ዓርቂንቴ ቤዛ ዔቂ ዓቴኔ።