ማክቢቤ ማፃኣፖ 11

¹ዒንጋኒ ኮይሳሢም ኮሹሞና ዚቲ ጋዓዖ ዒዒንጌ፤ ሚርጌ ዎዴኮ ጊንፃፓ ኔ ዬያ ዛሎ ዴንቃንዳኔ።

²ሴካ ቤርታ ሳዖይዳ ዓይጎ ባኣዚ ማዓንዳቴያ ኔ ዔሩዋሴ፤ ዬያሮ ኔኤኮ ዓኣ ቆሎ ላንካይ፥ ሃንጎ ሳሊ ቤሲ ፓቂ ጌሤ።

³ሻኣሬ ሚርጌ ካርቴ ዎዶና ዒርዚ ዋዋርቃኔ፤ ሚሢ ሊካ ማዔቴያ ሌካ ዶዔቴ ዒኢካ ዶዔ ቤዛ ዓታኔ።

⁴ዢባሬ ካፓሢ ዜርሢ ዜርቁዋሴ፤ ሻኣሬ ዛጋሢ ሃኣኮ ካሢ ዓርሡዋሴ።

⁵ዢባሬ ሃንታ ጎይሢንታ ዓሲኮ ሼምፓ ዒንዶ ጎጶይዳ ማዢንታ ጎይፆዋ ኔ ዔሩዋኣሢጉዲ ቢያ ባኮ ማዣ ፆኦዛሢ ፔ ማዾ ዎማይዲ ማዻቴያ ዔራኒ ኔ ዳንዳዑዋሴ።

⁶ጉቴ ማዔቴያ ዓቦ ጌላ ዜርሢ ዜሪፆ ሃሺፖ፤ ቢያሢ ባቃላንዳሞ ባቃሊንዱዋሞ ዎኖ ዎዶና ዜርቄቴ ባቃሊ ካፃንዳቴያ ዱማሲ ኔ ዔራኒ ዳንዳዑዋሴ።

⁷ፖዒ ዛጊ ሚሽኩዎ ባኣዚኬ፤ ዬያሮ ሮኦሮ ፖዖ ዛጊ ዛጊ ዎዛዺፃ ኮሺኬ።

⁸ዓሲ ዎዚ ሚርጌ ሌዔ ናንጌቴያ ዬንሢ ዒዛም ዒንጊንቴ ዎዶንሢዳ ቢያ ዎዛዻኒ ዒ ዳንዳዓኔ፤ ጋዓንቴ ሚርጌ ዹሚ ኬሊያኣ ዓኣሢ ማሎንጎ፤ ዬይ ኬላ ሚርጌኬ፤ ሙካንዳ ባካ ቢያ ጉሪ ባኣዚኬ።

⁹ዼጌዞ! ኔኤኒ ዼጌ ዓኣ ዎዶማና ዎዛዼ፤ ኔኤኮ ዼጋቶ ዎዶማና ዒኖ ኔኤኮ ዎዛሴ፤ ኔ ሼና ጌዔ ጎይፆ ዓኣፓ ኔኤኮ ዛጋ ባኮ ቢያ ማዼ፤ ጋዓንቴ ዬያ ቢያ ባኮሮ ፆኦሲ ኔና ዎጌ ቤሲ ዔኪ ሙካንዳሢ ዔሬ።

¹⁰ዬያሮ ማሊ ሂርጊሢ ዒናፓ ኔኤኮ ባይዜ፤ ፑርታ ባኣዚያኣ ኔጊዳፓ ሺኢሼ፤ ዼጋቶ ናንጊና ሄርሺንቲሢ ጉሪ ባኣዚኬ።