ላሚንቴ ዎጎ ማፃኣፖ 16

¹ሙሴ ኬኤዛዖ፦ «ፆኦሲ ጊብፄ ዓጮ ዓይላቶይዳፓ ዒንሢ ኬሴሢ ዓቢቤ ዓጊኖኮ ፔቴ ኬሊ ዋንቴና ማዔሢሮ ዬኖ ዓጊኖና ዑሣ ዓኣዺፆ ቦንቾ ሜንሢ ናንጊና ናንጋ ጎዳ ማዔ ዒንሢኮ ፆኦዛሢ ቦንቹዋቴ።

²ናንጊና ናንጋ ጎዳ ማዔ ዒንሢኮ ፆኦዛሢ ዒዛ ሱንፃ ካኣሽኪንታዳጉዲ ዶኦሬ ቤዞ ዓኣዺ ዒኢካ ዒዛ ቦንቻኒ ዒንሢኮ ማራቶይዳፓ ማዔቴያ ባኣቶይዳፓ ዶኦሪ ፔቴ ፔቴ ሹኩዋቴ፤

³ዬያ ካዋሢ ዒንሢ ሙዓኣና ሙኑቃ ፃኣዛ ጌሊባኣ ላኣዳ ሙዑዋቴ፤ ጊብፄ ዓጫፓ ሩኡሪ ዒንሢ ኬስካዖ ማዼ ጎይፆ ላንካይ ኬሊ ጉቤ ሙኑቃ ፃኣዛ ጌሊባኣ ላኣዳ ሙዑዋቴ፤ ዬይ ሜቶ ካሣ ጌይንታንዳኔ፤ ዬያሮ ዒንሢ ናንጋ ዎዶ ቢያይዳ ሚርጌ ሜቶ ዒንሢ ዔኬ፥ ጊብፄ ዓጫፓ ኬስኬ ኬሎ ዬያና ጶቂሣንዳኔ።

⁴ዴንዲ ላንካይ ኬሊ ሄላንዳኣና ዒንሢ ዓጮይዳ ዓይጎ ዓሲ ማርካኣ ማዖም ሙኑቃ ፃኣዛ ባኣያ ማዖንጎ፤ ቤርታሳ ኬሎኮ ዋንቶ ዒንሢ ፆኦሲም ጌይ ሹኬ ቆልሞኮ ዓሽካ ቢያ ዒማ ዋንቶ ሙይንቲ ጋጋፓንዳያ ኮይሳኔ» ጌዔኔ።

⁵«ዑሣ ዓኣዺፆ ቦንቾሮ ጌዒ ሹኮ ቆልሞ ናንጊና ናንጋ ጎዳ ዒንሢም ዒንጌ ዓጮ ካታሞ ቢያሢዳ ዒንሢ ሹካንዳያ ኮይሱዋሴ።

⁶ጋዓንቴ ሹኪንታኒ ኮይሳሢ ናንጊና ናንጋ ጎዳ ማዔ ዒንሢኮ ፆኦዛሢ ዒዛ ዒንሢ ካኣሽካንዳጉዲ ዶኦሬ ቤዞማካ ሌሊኬ። ዬይያ፦ ዓባ ጌላኣና ጊብፄ ዓጫፓ ዒንሢ ኬስኬ ኬሎና ኬስኬ ዎዶማ ካፒ ማዻንዳያ ኮይሳኔ።

⁷ዬያ ዓሽኮ ካሢ ናንጊና ናንጋ ጎዳ ማዔ ዒንሢኮ ፆኦዛሢ ዶኦሬ ቤዛ ሙዒጋፓ ዚሮ ጉቴ ዒንሢ ማኣሪ ማኣሪ ማዒ ዴንዱዋቴ።

⁸ዬማፓ ዴንዲ ላሆ ኬሊ ሄላንዳኣና ላኣዳ ሙዑዋቴ፤ ላንካሳ ኬሎና ናንጊና ናንጋ ጎዳ ማዔ ዒንሢኮ ፆኦዛሢ ዚጊ ካኣሽካኒ ቡኪንቱዋቴ፤ ዬኖ ኬሎ ማዾ ማዺፖቴ» ጌዔኔ። 16፡8 ሌዊ. ዓኬ 23፡5-8፤ ፓይ. ማፃ 28፡16-25።

⁹«ማኣሎ ቡሪፆ ዒንሢ ዓርቄማፓ ቃልሾ ኬሊ ኬሊ ላንካይ ፓይዱዋቴ፤

¹⁰ዬካፓ፥ ናንጊና ናንጋ ጎዳ ዒንሢ ዓንጄ ጎይፆጉዴያ ዒንሢ ሼኔና ዒንሢ ዒንጋ ዒንጊሢ ናንጊና ናንጋ ጎዳ ማዔ ዒንሢኮ ፆኦዛሢም ዒንጊ ማኣሎ ቡሪፆና ቦንቾ ቦንቾ ኬሊ ጌሢ ቦንቹዋቴ።

¹¹ዒንሢኮ ዓቲንቆ ናኣቶንታ ዉዱሮ ናኣቶንታ ዒንሢም ማዾ ማዻ ዓቲንቆንታ ላኣሎንታ ዒንሢኮ ካታሞይዳ ናንጋ ሌዊ ዓሶንታ ሜሌ ዓጮይዳፓ ሙኪ ናንጋ ዓሶንታ ዜኤሮ ናኣቶና ዜኤሮ ዒንዶንሢንታ ዎላ ዒዞ ኬሎ ቡኪ፥ ናንጊና ናንጋ ጎዳ ዒዛ ዒንሢ ካኣሽካንዳጉዲ ዶኦሬ ቤዞይዳ ዎዛዹዋቴ።

¹²ዬንሢ ዳምቦንሢ ዛጊ ካፑዋቴ፤ ሃሣ ዒንሢ ጊብፄ ዓጫ ዓይሌ ማዒ ናንጌሢያ ጶቂሡዋቴ» ጌዔኔ። 16፡12 ፓይ. ማፃ 28፡26-31።

¹³«ዒንሢ ማኣሎ ቡሪ፥ ሃሣ ዎይኖዋ ማንፂ ጩኡጲ ጋፒሴስካፓ ላንካይ ኬሊ ሄላንዳኣና ዉልሾ ዴማ ቦንቾ ኬሊ ጌሢ ቦንቹዋቴ፤

¹⁴ዬያ ቦንቾ ዒንሢኮ ዓቲንቆ ናኣታ፥ ዉዱሮ ናኣታ፥ ማዾ ማዻ ዓቲንቆንታ ላኣሎንታ፥ ዒንሢኮ ካታሞይዳ ናንጋ ሌዊ ዓሶንታ፥ ሜሌ ዓጮይዳፓ ሙኪ ናንጋ ዓሶንታ፥ ዜኤሮ ናኣቶንታ ዜኤሮ ዒንዶንሢታ ዎላ ቡኪ ዎዛዺ ቦንቹዋቴ።

¹⁵ናንጊና ናንጋ ጎዳ ማዔ ዒንሢኮ ፆኦዛሢ ዒዛ ዒንሢ ካኣሽካንዳጉዲ ዶኦሬ ቤዞይዳ ላንካይ ኬሊ ሄላንዳኣና ዴዒ ዒዛ ቦንቹዋቴ፤ ናንጊና ናንጋ ጎዳ ማዔ ዒንሢኮ ፆኦዛሢ ዒንሢ ጎሽኬ ሃኣኮና ዒንሢ ማዼ ባኮና ቢያ ዓንጃንዳሢሮ ዬኖ ቦንቾ ዎዛዺ ቦንቹዋቴ» ጌዔኔ። 16፡15 ፓይ. ማፃ 29፡12-38።

¹⁶«ዒንሢኮ ዓቲንቃ ቢያ ሌዖይዳ ሃይሢ ማይንቲ ዑሣ ዓኣዺፆ ቦንቾንታ፥ ማኣሎ ቡሪፆ ቦንቾንታ፥ ዉልሾ ዴማ ቦንቺንታ ቦንቾ ቦንቻኒ ናንጊና ናንጋ ጎዳ ማዔ ዒንሢኮ ፆኦዛሢ ዶኦሬ ቤዞይዳ ቡኪንቶንጎ፤ ቦንቾሮ ዔያታ ሙካ ዎዶና ኩቺ ጉሪ ሙኮፓ፤

¹⁷ዔያታ ዒንጋኒ ዔኪ ሙካንዳ ባካ ናንጊና ናንጋ ጎዳ ዔያቶም ዒንጌ ጎይፆ፤ ሃሣ ዓንጄ ጎይፆጉዴያ ማዖንጎ» ጌዔኔ።

¹⁸«ናንጊና ናንጋ ጎዳ ማዔ ዒንሢኮ ፆኦዛሢ ፔቴ ፔቴ ፃጶም ዒንጋ ዓጮኮ ካታሞይዳ ካታሞይዳ ዎጌ ዎጋንዳ ዓሲና ዎይሣንዳ ሱኡጌና ዶኦሩዋቴ፤ ዬንሢ ዓሶንሢ ዓሲ ዱማሲ ዛጉዋዖ ዎጋንዳያ ኮይሳኔ፤

¹⁹ዎጎ ዎጊፆ ዎቢሲፖቴ፤ ዓሲ ዱማሲ ዛጊ ዎጊፖቴ፤ ዓሲ ጌሺፖቴ፤ ዴሚና ዔኮ ሚኢሼ ዔኪፖቴ፤ ዬያጉዴ ሚኢሻ ዔሮ ዓሶኮ ዓኣፖ ባይዚ ዎቦ ዎጌ ዎጊሳኔ። 16፡19 ኬሲ. ማፃ 23፡6-8፤ ሌዊ. ዓኬ 19፡15።

²⁰ናንጊና ናንጋ ጎዳ ዒንሢም ዒንጋ ዓጮ ዻካሊ ሼምፔና ናንጋኒ ፔዜ ዎጌ ሌሊ ዎጉዋቴ» ጌዔኔ።

²¹«ናንጊና ናንጋ ጎዳ ማዔ ዒንሢኮ ፆኦዛሢም ሚቺ ዒንጎ ቤዞ ዒንሢ ኮሻሢኮ ኮይላ ዓሼራ ጌይንታ ፆኦዜሎኮ ማላታ ማዓ ሚሢ ዾቂፖቴ፤ ሃሣ ቱኪፖቴ። 16፡21 ኬሲ. ማፃ 34፡13።

²²ናንጊና ናንጋ ጎዳ ማዔ ዒንሢኮ ፆኦዛሢ ዒፃያ ማዔ ካኣሽኮ ዻኣቦዋ ዒኢካ ዻኣቢፖቴ» ጌዔኔ። 16፡22 ሌዊ. ዓኬ 26፡1።