2 ሳሙዔኤሌ ማፃኣፖ 6

¹ዳውቴ ላሚ ሃሣ ዒስራዔኤሌ ዓጮ ቢያይዳፓ ሃይሢታሚ ሺያ ፖኦሊሴ ዶኦሪ ቡኩሴኔ፤

²ዳውቴንታ ዒዛና ዎላ ዓኣ ዓሶንታ ካኣቱሞ ዖይቶ ማሂ ኪሩቤኤሎይዳ ዴዔ፥ ቢያ ባኮ ዎይሣ ጎዳ ሱንፆና ዔኤሊንታ፥ ፆኦሲኮ ጫኣቁሞ ሳኣፂኖ ዔኪ ሙካኒ ዪሁዳይዳ ዓኣ ቤዓላ ዴንዴኔ። 6፡2 ኬሲ. ማፃ 25፡22።

³ዔያታ ጫኣቁሞ ሳኣፂኖ ጌሜሮይዳ ዓኣ፥ ዓቢናዳኣቤ ማኣራፓ ኬሲ ዔኪ ዓኪ ሳርጌላ ዖይታይዳ ጌሣዖ ዑዛና ዓሂዮ ጌይንታ ዓቢናዳኣቤ ናይስኬንሢና ዬያ ሳርጌሎኮ ቤርታ ቤርታ ዴንዳንዳጉዲ ዓይሤኔ፤ 6፡3 1ሳሙ. 7፡1-2።

⁴ዓሂዮ ዒማና ጫኣቁሞ ሳኣፂኖኮ ቤርታ ቤርታ ዴንዳኔ።

⁵ዳውቴና ዒስራዔኤሌ ዓሶና ጋዓንቴ ጎኦላንታ ፔቴ ሻሺ ጎኦላኣ ዋርቂ ዋርቂ፥ ካራቤያ ባዒ ባዒ፥ ዑኡቱቡሎንታ ሂቾንታ ዖልሲ ዖልሲ ናንጊና ናንጋ ጎዳ ቦንቺ ዓይናዺሢና ጉቤ ዒኔፓ ዓጊፂ ዓጊፂ ኮርጋኔ።

⁶ዔያታ ናኮኔ ጌይንታ ሃኣኮ ሺርኮ ቆይዳስኬኖ ሄላዛ ሳርጌሎ ጎቻ ጌማታ ዹቂንቲ ዲቃቴም ጫኣቁሞ ሳኣፂና ዶዓኒ ዎኦቴሢሮ ዑዛ ኩቻ ዓርቄኔ፤

⁷ናንጊና ናንጋ ጎዳ ማዔ ፆኦዛሢ ኔጊያ ኔጉዋዖ ዻጋዺ ዑዛ ዎዼኔ፤ ዑዛ ዒጊጩዋዖ ጫርቂ ዓርቄሢሮ ዒኢካ ጫኣቁሞ ሳኣፂኖ ኮይላ ሃይቄኔ።

⁸ዬማፓ ዓርቃዖ ዬና ቤዜላ «ፔሬፅ ዑዛ» (ዑዛም ዓጎና ሜቶ) ጌይንቲ ናንጋኔ፤ ናንጊና ናንጋ ጎዳ ዻጋዺ ዑዛ ዎዼሢሮ ዳውቴ ሚርጌና ዖዬኔ።

⁹ዳውቴ ናንጊና ናንጋ ጎዳ ዒጊጬሢሮ፦ «ያዺ ማዓቴ ጫኣቁሞ ሳኣፂኖ ዎዲ ታ ዔኪ ዴንዳንዳይ?» ጌዔኔ።

¹⁰ዬያሮ ዒዚ ጫኣቁሞ ሳኣፂኖ ዬሩሳላሜ ዔኪ ዓኣዺፆ ሃሺ ጊንሣ ዔኪ ማሃዖ ጋኣቴ ካታሞይዳ ናንጋ፥ ዖቤድዔዶኦሜ ጌይንታ ዓሲስኬያ ማኣሪ ጌልዜኔ፤

¹¹ዬካፓ ጫኣቁሞ ሳኣፂና ዒኢካ ሃይሦ ዓጊኒ ዴዔኔ፤ ናንጊና ናንጋ ጎዳ ዒማና ዖቤድዔዶኦሜንታ ማኣሮ ዓሶዋ ዓንጄኔ። 6፡11 1ፆኦሲ. ዓሃኬ 26፡4-5።

¹²ፆኦሲኮ ጫኣቁሞ ሳኣፂኖ ዛሎና ዖቤድዔዶኦሜ ማኣሮንታ ዓኣ ባኮዋ ቢያ ናንጊና ናንጋ ጎዳ ዓንጄሢ ካኣቲ፥ ዳውቴ ዋይዜኔ፤ ዬያሮ ጫኣቁሞ ሳኣፂኖ ዼኤፒ ዎዛና ዬሩሳላሜ ዔኪ ሙካኒ ዖቤድዔዶኦሜ ማኣራፓ ዴንዲ ዔኬኔ።

¹³ዒማና ጫኣቁሞ ሳኣፂኖ ኬዴ ዓሳ ላሆ ታኣኪሢ ታኣካማና ታኣካማና ዔቂሲ ፔቴ ዎፓናና ፔቴ ማሊ ሶቦሪና ናንጊና ናንጋ ጎዳም ዒንጎ ዒንጊሢ ማሂ ሹኪ ዒዚ ሺኢሻኔ።

¹⁴ዳውቴ ሻኣዣ ፓቲሌና ዹዖና ዓፒላ ኬርና ማራዖ ናንጊና ናንጋ ጎዳ ቦንቺ ጉቤ ዒናፓ ዓጊፂ ዓጊፂ ኮርጋኔ፤

¹⁵ዬያይዲ ዳውቴንታ ዒስራዔኤሌ ዓሶንታ ዒላሺ ዒላሺ ዛዬያ ዋርቂ ዋርቂ ጫኣቁሞ ሳኣፂኖ ዬሩሳላሜ ዔኪ ዴንዴኔ።

¹⁶ዔያታ ጫኣቁሞ ሳኣፂኖ ዔኪ ካታሞ ጌላኣና ሳኣዖኦሌኮ ናኣ ሜልኮኦላ ካኣቲ፥ ዳውቴ ባይዲ ባይዲ ኮርጋሢ ኬኤፆኮ ፑልቶና ዴንቃዖ ፔ ዒኖና ዒዛ ቦሄኔ፤

¹⁷ዔያታ ጫኣቁሞ ሳኣፂኖ ዔኪ ሙኪ ዳውቴ ጊኢጊሼ ዓፒሎና ማዦና ማኣሮ ጋራ ጌሣኒ ማሊንቴ ቤዛ ጌሤኔ፤ ዬካፓ ዳውቴ ሚቺ ዒንጎ ዒንጊፆና ፔቱሞና ዒንጎ ዒንጊፆ ናንጊና ናንጋ ጎዳም ሺኢሼኔ።

¹⁸ዳውቴ ዬያ ዒንጎ ባኮ ሺኢሼስካፓ ቢያ ባኮ ዎይሣ ጎዳሢ ሱንፆና ዴሮ ዓንጄኔ፤

¹⁹ዬያይዴስካፓ ቢያሢም ሙኡዚ ዒንጌኔ፤ ዒስራዔኤሌይዳ ዓኣ ፔቴ ፔቴ ዓቲንቆና ላኣሎናም ካሣንታ ፔቴ ፔቴ ዓሽኪ ቲቂሢ ሚቾናያንታ ፔቴ ፔቴ ዎይኔ ቃንጫልቂ ሜልዞናያ ዒንጌኔ፤ ዬካፓ ቢያሢ ፔ ማኣሪ ማኣሪ ዴንዴኔ።

²⁰ዳውቴ ዒማና ማኣሮ ዓሶ፦ «ዒንሢ ዎዚ ዓኣይ?» ጌይ ዖኦጫኒ ጋሮ ጌላዛ ሳኣዖኦሌ ናኣ፥ ሜልኮኦላ ዒዛ ጎይሣ ዔካኒ ኬስካዖ፦ «ዒስራዔኤሌ ካኣቲ ሃኖ ቦቦንቺንቲባኣዓ! ኔ ዶንዞኮ ማዾ ማዻ ላኣሎ ቤርታ ዣኣዦ ዓሲጉዲ ዑሢ ካሎ ኮኦሚፃ ዎዎይቲፆዳዖ?» ጌዔኔ። 6፡20 1ፆኦሲ. ዓሃኬ 16፡43።

²¹ዳውቴ ማሃዖ፦ «ታኣኒ ዓጊፂ ኮርጌሢ ዒዛ ዴሮ ዒስራዔኤሌኮ ሱኡጌ ታና ማሃኒ ኔ ዓዶንታ ዒዛኮ ማኣሮ ዓሶንታ ዛሎ ታና ዶኦሬ ናንጊና ናንጋ ጎዳ ቦንቾምኬ፤ ሃሢ ማዔቴያ ዒዛ ቦንቾም ባይዲ ኮርጊፆ ታ ሃሻዓኬ፤

²²ዬያይዳፓ ዑሣ ዓኣዼ ታና ታ ሂርኪዲ ላኣፒሳንዳኔ፤ ኔኤም ማላ ጎይፆ ታ ቦሂንቴ ዓሲ ማዔቴያ ‹ዬያቶ ቤርታ ኔና ኔ ላኣፒሴኔ› ኔ ጋዓ ላኣሎ ቤርታ ሚርጌና ታ ቦንቺንቴያ ማዓንዳኔ!» ጌዔኔ።

²³ዬያ ዒዛ ጌዔሢሮ ሳኣዖኦሌኮ ናኣ፥ ሜልኮኦላ ሃይቃንዳያ ሄላንዳኣና ናይ ሾውዋዖ ዞኦኮ ማይ ዓቴኔ።