2 ፆኦሲ ዓሶ ሃይሶ 5

¹ካኣቲ ሴሎሞኔ ጌኤዦ ማኣሮ ማዾ ቢያ ማዺ ጋፒሴስካፓ ዒዛኮ ዓዴ፥ ዳውቴ ናንጊና ናንጋ ጎዳም ዱማሴ ቢሮንታ ዎርቆንታ፤ ዬያጉዲ ሃሣ ሜሌ ባኮዋ ቢያ ጌኤዦ ማኣሮይዳ ዓኣ ሜሆ ጌሦ ማኣሮ ጌልዜኔ። 5፡1 2ሳሙ. 8፡11፤ 1ፆኦሲ. ዓሃኬ 18፡11።

²ዬካፓ ካኣቲ ሴሎሞኔ ናንጊና ናንጋ ጎዳኮ ጫኣቁሞ ሳኣፂኖ ዳውቴ ካታሞ ማዔ፥ ፂዮኔይዳፓ ሃንጋ ጌኤዦ ማኣሪ ዔኪ ሙካንዳንጉዲ ኬኤዛኒ ዒስራዔኤሌ ዓሶኮ ጋርቾ ዓሶና ፃጶ ፃጶንታ ማኣሮ ማኣሮንታኮ ሱኡጎ ቢያ ዬሩሳላሜይዳ ቡኩሴኔ። 5፡2 2ሳሙ. 6፡12-15፤ 1ፆኦሲ. ዓሃኬ 15፡25-28።

³ዒስራዔኤሌ ዓሳ ላንካሳ ዓጊኖይዳ ዉልሾ ዴማ ቦንቻ ቦንቾና ካኣቲ ዔኤሌ ዓሳ ቢያ ዬሩሳላሜይዳ ሙኪ ቡኬኔ፤

⁴ዒማና ካኣቲ ሴሎሞኔንታ ዴሮንታ ቢያ ጫኣቁሞ ሳኣፂኖኮ ቤርቶ ዛላ ሙኪ ቡኬኔ፤ ሚርጉማፓ ዔቄያና ፓይዲንታኒ ዳንዳዑዋ ዺቢ ማራይንታ ባይንታ ዒንጎ ባኣዚ ማሂ ናንጊና ናንጋ ጎዳም ዔያታ ሺኢሼኔ።።

⁵ቄኤሳ ናንጊና ናንጋ ጎዳኮ ጫኣቁሞ ሳኣፂኖ ጌኤዦ ማኣሪ ዔኪ ጌላዖ ዑሣ ዓኣዼ ዱማዼ ጋሮይዳ ዓኣ ኪሩቤሌ ጋኣዞ ዴማ ጌሤኔ።

⁶ዒማና ፒሺንቲ ዓኣ ኪሩቤኤሎኮ ጋኣዛ ጫኣቁሞ ሳኣፂኖንታ ሳኣፂኖ ኬዶና ዛጳሢ ሚፆንታ ካንቂ ዓኣቼኔ።

⁷ዛጳሢ ሚፃ ኮሺ ዖዶሲታሢሮ ዑሣ ዓኣዼ ዱማዼ ጋሮኮ ቤርቶ ዛላ ዔቄ ዓይጎ ዓሲያማዖም ዴንቃኒ ዳንዳዓኔ፤ ጋዓንቴ ሜሌ ዛላና ዔቄ ዓሲ ፔቴታዖ ዴንቃኒ ዳንዳዑዋሴ፤ ዬንሢ ዛጶ ሚፆንሢ ሃኖ ሄላንዳኣና ዒኢካ ዓኣኔ።

⁸ዬያ ጫኣቁሞ ሳኣፂኖ ጋራ ዒስራዔኤሌ ዴራ ጊብፄይዳፓ ኬስኬንቴ ናንጊና ናንጋ ጎዳ ዔያቶና ዎላ ጫኣቁሞ ጫኣቄያና ሙሴ ሲና ዹኮይዳ ጫኣቁሞ ሳኣፂኖ ጋራ ጌሤ ላምዖ ሹጮ ዓርሶናዞንሢዳፓ ዓታዛ ሳኣፂኖ ጋራ ሜሌ ዓኣ ባኣዚ ባኣሴ። 5፡10 ላሚ. ዎማ 10፡5።

⁹ቄኤሳ ጌኤዦ ማኣራፓ ኬስኬኔ፤ ዬያታ ቄኤሳ ቢያ ዔያቶ ማዾንጎ ጎዖና ኬሎ ማዒባኣቴያ ቢያሢ ፔና ጌኤሺ ናንጊና ናንጋ ጎዳም ዱማሴኔ።

¹⁰ፆኦሲ ቦንቾም ዓይኑሞ ዓይናዻ ሌዊ ዓሳ ቢያሢ፥ ዓሳኣፔ፥ ሄማኔንታ ዪዱታኔንታ፤ ዔያቶኮ ዓቲንቆ ናኣቶንታ ዒጊኖንታ ቢያ ሚዛጲ ሻኣዣ ማኣዖ ማይንቲ ዓኣኔ፤ ሌዊ ዓሳ ዒማና ዑኡቱቡሎንታ ፔቴ ሻሺ ዴንሢ ዋርቆ ጎኦሎዋ ዔኪ ናንጊና ናንጋ ጎዳም ዒንጎ ባኮ ሺኢሾ ቤዞኮ ዓባ ኬስካ ዛሎና ዔቂ ዓኣኔ።