2 ፆኦሲ ዓሶ ሃይሶ 27

¹ዒዮዓታሜኮ ሌዓ ላማታሚ ዶንጎ ማዓኣና ካኣታዼኔ፤ ዒዚ ዬሩሳላሜይዳ ናንጊ ታጶ ላሆ ሌዔ ዎይሤኔ፤ ዒንዳ ዒዛኮ ዪሩሻ ጌይንታያ ሳዶቄ ናዎኬ።

²ዒዮዓታሜ ዓዴ ማዼ ጎይፆ ናንጊና ናንጋ ጎዳ ዎዛሳ ባኣዚ ማዼኔ፤ ዓዴ ጌኤዦ ማኣሮይዳ ዑንጆ ጩቢሺ ማዼ ጎሞ ማዺባኣሴ፤ ዴራ ጋዓንቴ ጎሞ ማዺፆ ሃሾ ዒፄኔ።

³ዒዮዓታሜ ጌኤዦ ማኣሮኮ ኬዶ ዛሎ ካሮ ላሚ ዓካሲ ኮሼኔ፤ ሃሣ ጊንሣ ዖፔሌ ጌይንታ ጌሜራዻ ቤዞ ዙሎ ኬልቂ ዲርቂ ሚርጌ ማዾ ማዼኔ፤

⁴ዬያጉዲ ሃሣ ዪሁዳ ዓጫ ጌሜራ ዓኣ ካታሞ፥ ዴኤሎ ካያ ሚርጌ ዓኣ ቤዞኮዋ ዋርዲያንታ ኬኤሌ ዲሢያ ኮሼኔ።

⁵ዒዚ ዒማና ዓሞኦኔ ካኣቲንታ ዖሎ ዓሶዋ ዖሊ ባሼኔ፤ ዬያሮ ዓሞኦኔ ዓሳ ሃይሦ ሌዔ ጉቤ ሌዓ ሌዓ ሃይሦ ሺያና ዖይዶ ፄኤታ ኪሎ ማዓ ሹቺ ቢራ፤ ፔቴ ሚሎኔ ኪሎ ማዓ ዛርጌና ፔቴ ሚሎኔ ኪሎ ማዓ ዔልዓኣ ጊኢሬኔ።

⁶ዒዮዓታሜ ናንጊና ናንጋ ጎዳ ማዔ ፔኤኮ ፆኦዛሢም ጉሙርቂንታያ ማዔሢሮ ዎልቄ ዴንቂ ዶዲ ዶዲ ዓኣዼኔ።

⁷ዒዮዓታሜ ካኣታዼ ዎዶና ማዺንቴ ሜሌ ባካ ቢያ፥ ዒ ዖሌ ዖሎንታ ዒ ዎይሤ ዎይሢፃ ቢያ ዒስራዔኤሌንታ ዪሁዳንታ ካኣቶ ሃይሳ ፃኣፒንታ ማፃኣፓ ፃኣፒንቴኔ፤

⁸ዒዮዓታሜ ካኣታዻኣና ሌዓ ዒዛኮ ላማታሚ ዶንጎኬ፤ ዒዚ ዬሩሳላሜይዳ ናንጊ ታጶ ላሆ ሌዔ ዎይሤኔ፤

⁹ዬካፓ ዒዚ ሃይቂ፥ ዳውቴ ካታማ ዱኡቴኔ፤ ዒዛ ቤዛ ዒዛኮ ናኣዚ ዓካኣዜ ካኣታዼኔ።