2 ፆኦሲ ዓሶ ሃይሶ 11

¹ሮቢዓሜ ዬሩሳላሜ ሄላዖ ዪሁዳና ቢኢኒያሜና ፃጳፓ ዶኦሪ ዶኦሪ ኬሶና ፔቴ ፄኤታና ሳሊታሚ ሺያ ዖልዚ ዖላንዳ ጎኦባ ዓሲ ዔኪ ፔቴይዳ ቡኩሴኔ፤ ዬያ ዒ ማዼሢ ዒስራዔኤሌ ፃጶ ዖሊ ዓጮ ቢያ ፔ ዴማ ማሃኒ ማሊኬ።

²ጋዓንቴ ፆኦሲ ማሊፆ ኬኤዛ ሼማዒያም ፆኦሲ፦

³«ሮቢዓሜም፥ ዬያጉዲ ዪሁዳና ቢኢኒያሜ ፃጶ ቢያሢም፤ ሃሣ ሃንጎ ዴሮማኣ ቢያ፥

⁴‹ዒንሢኮ ዒጊኖ ዒስራዔኤሌ ዓሶ ዖላኒ ዴንዲፖቴ፤ ቢያሢ ዒንሢ ማኣሪ ማኣሪ ዴንዱዋቴ፤ ዬይ ባካ ያዺ ማዔሢ ታኣኒ ማዖንጎ ጌዔምኬ› » ጌይ ኬኤዛንዳጉዲ ዓይሤኔ። ዬያሮ ዬያታ ቢያሢ ናንጊና ናንጋ ጎዳ ጌዔ ባኮ ዋይዚ፥ ዒዮርቢዓሜ ዖሊፆ ሃሺ ፔ ማኣሪ ማኣሪ ዴንዴኔ።

⁵ሮቢዓሜ ዬሩሳላሜይዳ ናንጊ ሱንፃ ሃካፓ ዴማ ፓይዲንታ ዪሁዳና ቢኢኒያሜ ካታሞም ዶዲ ኬኤሌ ኮሼኔ፤ ዬንሢ ካታሞንሢ፦

⁶ቤኤቴሌሄሜ፥ ዔፃሜ፥ ቴቆዓ፥

⁷ቤትፁሬ፥ ሶኮ፥ ዓዱላሜ፥

⁸ጋኣቴ፥ ማሬሻ፥ ዚፔ፥

⁹ዓዶራይሜ፥ ላኪሼ፥ ዓዜቃ፥

¹⁰ፆርዓ፥ ዓያሎኔንታ ኬብሮኦኔንታኬ።

¹¹ሮቢዓሜ ዬንሢ ካታሞንሢ ዶዲሺ ኬልቂ ዲርቄኔ፤ ፔቴ ፔቴ ካታሞም ፔቴ ፔቴ ሱኡጌ ዶኦሬኔ፤ ሃሣ ፔቴ ፔቴዞንሢዳ ሃኣኮ፥ ሪሚታፓ ኮሾ ዛይቶንታ ዎይኖ ዑዦንታ፥

¹²ዬያጉዲ ሃሣ ጊቲማና ዎርሢና ቡኩሴኔ፤ ዬያይዲ ዪሁዳና ቢኢኒያሜ ዓጮ ፔ ዴማ ማሄኔ።

¹³ቄኤሶና ሌዊ ዓሶና ዒስራዔኤሌ ዓጮ ጉቤይዳፓ ዾኦሎ ዛሎና ዓኣ ዪሁዳ ዓጮ ሙኬኔ፤

¹⁴ዒስራዔኤሌ ካኣቲ ዒዮርቢዓሜና ዒዛ ቤዛ ጌሊ ካኣታዼ፥ ዒዛኮ ዜርፃ ሌዊ ዓሳ ናንጊና ናንጋ ጎዳኮ ቄኤሴ ማዒ ማዻንዳጉዲ ዓይሢንቲባኣሢሮ ሌዊ ዓሳ ዪሁዳና ዬሩሳላሜና ዔያታ ሙኬሢ ቆልሞ ሄንቆ ቤዞና ሜሌ ባኮ ቢያ ሃሺኬ።

¹⁵ዒዮርቢዓሜ ጌሜራ ጌሜራ ሜሌ ዓሳ ፔ ፆኦዞ ካኣሽካ ቤዛ ማዻንዳያ፥ ሃሣ ፃላሄና ዒዚ ፔኤም ጌማቶ ማሊሲ ኮሼ ሜሌ ፆኦዞናም ዚጊ ካኣሽካንዳ ፔ ቄኤሴ ዶኦሪናኣኮኬ። 11፡15 1ካኣቶ. ማ 12፡31።

¹⁶ዬያፓ ዔቄያና ናንጊና ናንጋ ጎዳ ማዔ ዒስራዔኤሌ ፆኦዛሢ ፒዜ ማዔ ዓያናና ካኣሽካኒ ኮዓ ዓሲ ዒስራዔኤሌ ፃጶ ቢያይዳፓ ኬስኬ ሚርጌ ዴሬ ናንጊና ናንጋ ጎዳ ማዔ ዔያቶኮ ቤርታኣ ዓዶንሢ ፆኦዛሢም ዒንጎ ባኣዚ ሺኢሻኒ ሌዊ ዓሶ ጊንፆ ዬሩሳላሜ ሙኬኔ።

¹⁷ዬይ ማዻ ዪሁዳ ካኣቲ ዶዲሼኔ፤ ሃይሦ ሌዔ ጉቤ ሴሎሞኔኮ ናኣዚ ሮቢዓሜ ዔያታ ማኣዴኔ፤ ዔያታ ካኣቲ ዳውቴና ሴሎሞኔና ማዼ ጎይፆ ማዺ ኮሺና ናንጌኔ።

¹⁸ሮቢዓሜ ማሃላቴ ጌይንታ ላኣሊስኬኖ ዔኬኔ፤ ዒዞኮ ዓዴ ያሪሞቴ ጌይንታያ ዳውቴኮ ናይ ማዓዛ፥ ዒንዳ ዒዛኮ ዓቢጋይሎ ጌይንታያ ዒሴዬኮ ናኣዚ ናዖ ዔኤሊዓቤ ናዎኬ፤

¹⁹ማሃላቴ ዪዑሼ፥ ሼማሪያና ዛሃሜ ጌይንታ ሃይሦ ዓቲንቄ ሮቢዓሜም ሾዔኔ፤

²⁰ዬካፓ ናንጊቤቃ ሮቢዓሜ ማዕካ ጌይንታ ዓቤሴሎሜ ናዎ ዔኪ፦ ዓቢያ፥ ዓታዬ፥ ዚዛና ሼሎሚቴ ጌይንታ ዖይዶ ዓቲንቄ ናይ ሾዔኔ።

²¹ሮቢዓሜኮ ዎሊ ዑፃ ታጶ ሳሊ ላኣሊና ላሂታሚ ጊንፃኣ ማቾንሢ ማዓ ላኣሊያ ዓኣኔ፤ ዔያቶይዳፓ ላማታሚ ሳሊ ዓቲንቄና ላሂታሚ ዉዱሮ ናይ ዒ ሾዔኔ፤ ዒዚ ፔኤኮ ላኣሎና ጊንፃኣ ማቾንሢ ቢያሢዳፓ ማዕካ ጋዓዞ፥ ዓቤሴሎሜ ናዎ ባሼ ናሽካኔ፤

²²ዬያጉዲ ሃሣ ፔኤኮ ናኣቶይዳፓ ቢያ ማዕካይዳፓ ሾይንቴ ዓቢያ ጎዖሢ ባሼ ዒ ናሽካኔ፤ ዬያሮ ዒዚ ፔ ቤዛ ናኣዚ ዓቢያ ካኣታዻንዳጉዲ ማሌሢሮ ዒዛ ጌርሲንሢኮ ሱኡጌ ማሂ ዒዛ ዶኦሬኔ፤

²³ሮቢዓሜ ዔራቶና ፔኤኮ ዓቲንቆ ናኣቶ ሱኡጌ ማሂሢና፥ ኬልቂ ዲርቆና ዪሁዳና ቢኢኒያሜ ካታሞ ቢያይዳ ሱኡጌ ማሂ ዶኦሬኔ፤ ዬካፓ ዔያቶም ኮይሳ ባኣዚ ቢያ ሚርጌና ዒንጌኔ፤ ሚርጌ ላኣሊያ ዔያታ ዔካንዳጉዲ ማሄኔ።