1 ሳሙዔኤሌ ማፃኣፖ 8

¹ዬካፓ ሳሙዔኤሌ ጋርቻዖ ፔኤኮ ላምዖ ናኣቶ ዒስራዔኤሌ ዓሶኮ ሱኡጌ ማሂ ዶኦሬኔ፤

²ዒዛኮ ቶይዶ ናዓሢኮ ሱንፃ ዒዩዔኤሌ፤ ጌኤዛሢ ሱንፃ ዓቢያ ጌይንታያ ማዓዛ ዔያታ ቤርሳቤ ካታሞኮ ሱኡጌ ማዒ ዶኦሪንቴኔ።

³ጋዓንቴ ዔያታ ዔያቶኮ ዓዴ ማዼ ጎይፆ ማዺባኣሴ፤ ዬያ ሃሺ ሚኢሼ ኮዓ ዓሲ ማዒ ዴሚና ዒንጎ ሚኢሼ ዔኪ ዔኪ ዓሶኮ ጌኤዞ ፒዜ ዎጉዋሴ።

⁴ዬያሮ ዒስራዔኤሌ ዓሶኮ ሱኡጋ ፔቱሞና ቡኪንቲ ሳሙዔኤሌ ዓኣ ቤዞ፥ ራኣማ ሙካዖ፦

⁵«ዋይዜ! ኔ ሃሢ ጋርቼኔ፤ ኔኤኮ ናኣታ ኔና ማሊ ኔ ማዼሢ ጎይፆ ማዹዋኣሢሮ ሜሌ ዓጮይዳ ማዺንታሢጉዲ ኑና ዎይሣንዳ ካኣቲ ኑም ካኣታሴ» ጌዔኔ። 8፡5 ላሚ. ዎማ 17፡14።

⁶ካኣቲ ዔያቶም ዒ ካኣታሳንዳጉዲ ዓሳ ዒዛ ዖኦጬሢሮ ሳሙዔኤሌ ዖዪ ናንጊና ናንጋ ጎዳ ሺኢቄኔ፤

⁷ዬያሮ ናንጊና ናንጋ ጎዳ ሳሙዔኤሌም፦ «ዴራ ጋዓ ባኮ ቢያ ዋይዜ፤ ዔያታ ኔናቱዋንቴ ታኣኒ ዔያቶ ዑፃ ካኣታዺ ናንጉዋጉዲ ዔያታ ታና ቶኦቼኔ።

⁸ታኣኒ ዔያቶ ጊብፄ ዓጫፓ ኬሴስካፓ ዓርቃዖ ዔያታ ታና ሃሺ ሜሌ ፆኦዞ ካኣሽኪ ካኣሽኪ ናንጌኔ፤ ዬያሮ ዔያታ ታኣም ማዼ ጎይፆ ኔኤማኣ ማዺሢ ዓርቄኔ፤

⁹ዓካሪ ሃሢ ዔያታ ጋዓ ባኮ ዋይዜ፤ ጋዓንቴ ዔያቶኮ ካኣታ ሃጊ ዔያቶም ማዻንዳ ባኮ ቢያ ፔጋሲ ላቲ ዔያቶም ኬኤዜ» ጌዔኔ።

¹⁰ሳሙዔኤሌያ ካኣቲ ካኣታሣንዳጉዲ ዖኦጬ ዴሮም ናንጊና ናንጋ ጎዳ ጌዔ ባኮ ቢያ ኬኤዜኔ፤

¹¹ዒ ኬኤዛዖ፥ «ዒንሢኮ ካኣቲ ዒንሢም ማዻንዳ ባካ ያዺኬ፦ ዒንሢኮ ዓቲንቆ ናኣቶ ዒ ዔኪ፥ ሳርጌሎ ዖይቶና ፓራሢናይዳ ዴዒ ዖላ ዖልዚ ዓሲ ማሃንዳኔ፤ ሃሣ ፓራሢኮዋ ቤርታ ዓኣዻያ ዔያቶ ዒዚ ማሃንዳኔ፤

¹²ዔያቶይዳፓ ፔቴ ፔቴሢ ዖሎ ዖላ ሺዮ ዓሶ ዓይሣያ፤ ዛሎ ሃሣ ዖሎ ዖላ ዶንጊታሞ ዓሶ ዓይሣያ ማሂ ዔያቶ ዒ ዶኦራንዳኔ፤ ሃንጎዋቶ ሃሣ ካኣቲኮ ጎዦ ጎሽካ ዓሶና ሃኣኮ ቡኩሳ ዓሶ ማሃንዳኔ፤ ዛሎ ጊንሣ ዖሎ ዓንጋሞ ኮሻያና ሳርጌሎ ዖይቶ ኮሻያ ማሃንዳኔ፤

¹³ዬያጉዲ ዉዱሮ ናኣታ ዒንሢኮ ካኣቲም ሳውቃ ቲዦ ጊኢጊሻያና ዎፄ ዎፃያና ካሣ ካሣያ ማዓንዳኔ።

¹⁴ዒንሢኮ ማሎ ማሎ ጎዦንታ ዎይኖ ቱኮ ቤዞንታ ዛይቶ ሪሚቶንታ ቢያ ዔኪ ዒዛኮ ዶንዞም ዒንጋንዳኔ።

¹⁵ዒንሢኮ ሃኣኮንታ ዎይኖኮዋ ታጳፓ ፔቴማ ዔኪ ዔኪ ዒዛኮ ዶንዞና ቶኮናም ዒዚ ዒንጋንዳኔ።

¹⁶ዒንሢም ማዾ ማዻ ዓቲንቆንታ ላኣሎንታ፤ ዬያጉዲ ዒንሢኮ ባኣቶንታ ሃሮንታፓ ሚዛጶ ሚዛጶ ዔኪ ፔኤም ዒ ማሃንዳኔ።

¹⁷ማራቶና ዋኣሮናኮዋ ታጶይዳፓ ፔቴማ ዒዚ ዔካንዳኔ፤ ዒንሢያ ዒዛም ካራሚ ማዓንዳኔ።

¹⁸ዬይ ያዺ ማዔ ዎዶና ዒንሢ ናሽኪ ዶኦሬ ካኣታሢ ማዻ ጌኖ ማዾሮ ዒንሢ ዒላታንዳኔ፤ ናንጊና ናንጋ ጎዳ ጋዓንቴ ዒንሢኮ ዒላቶ ዋይዛዓኬ» ጌዔኔ።

¹⁹ዬይ ያዺ ማዔቴያ ሳሙዔኤሌ ኬኤዛ ባኮ ቢያ ዴራ ዔኤቢኬ ጌይባኣሴ፤ ዔያታ ዒማና፦ «ዬያ ኔኤሮ ሃሼ! ኑ ኑኡኮ ካኣቲ ዓኣያ ማዓንዳጉዲ ኮዓኔ፤

²⁰ኑ ያዺዴም ሜሌ ዴራ ማዻ ጎይፆ ዬይ ካኣታ ኑና ዎይሣያ፤ ኑኡኒ ሞርኮና ዎላ ዖልታኣና ዔኪ ኬሲ ዖሊሳንዳ ካኣቲ ኑኡኮ ዓኣያ ማዓንዳኔ» ጌዔኔ።

²¹ዬያሮ ሳሙዔኤሌ ዴራ ጋዓ ባኮ ቢያ ዋይዛዖ ዴንዲ ናንጊና ናንጋ ጎዳም ኬኤዜኔ፤

²²ናንጊና ናንጋ ጎዳ ሳሙዔኤሌም፦ «ዔያታ ኔና ዖኦጬ ጎይፆና ካኣቲ ዔያቶም ካኣታሴ» ጌዔኔ፤ ዬካፓ ሳሙዔኤሌ ዴራ ፔኤኮ ማኣሪ ማኣሪ ዴንዳንዳጉዲ ዳኬኔ።