1 ሳሙዔኤሌ ማፃኣፖ 27

¹ዳውቴ ፔ ዒኖና፦ «ፔቴ ዓቢ ሳኣዖኦሌ ታና ዎዹዋ ዓታዓኬ፤ ዬያሮ ታኣኒ ማዻንዳያ ኮይሳሢ ቤቲ ፒሊስፄኤሜ ዓሶ ዓጮ ዴንዲሢኬ፤ ዬካፓ ሳኣዖኦሌ ዒስራዔኤሌ ዓጮይዳ ታና ኮይፆ ሃሼም ኮሺ ናንጊ ታ ናንጋኒ ዳንዳዓኔ» ጌይ ማሌኔ።

²ዳውቴ ዒዛና ዎላ ዓኣ፥ ላሆ ፄኤቶ ዓሶ ዔኪ ኔጉዋዖ ጋኣቴ ካታሞ ካኣቲ ማዖኬ ናኣዚ ዓኪሼ ኮይላ ዓኣዼኔ፤

³ያኣዼይዲ ዳውቴንታ ዒዛ ዓሶንታ ፔ ማኣሮ ዓሶና ዎላ ጋኣቴ ዓጮይዳ ዴዔኔ፤ ዒማና ዳውቴኮ ላምዖ ላኣላ ዒዛና ዎላኬ፤ ዔያታ፦ ዒይዚራዔኤሌ ካታማ ሾይንቴ ዓሂኖዓሜንታ ቄርሜሎሴ ካታማ ሾይንቴሢ ናኣባኣሌኮ ማቾ፥ ዓቢጋይሎንታኬ፤

⁴ዳውቴ ጋኣቴ ቤቲ ዴንዴሢ ሳኣዖኦሌ ዋይዛዖ ዒዛ ዴንቃኒ ኮይ ሺሮ ሃሼኔ።

⁵ካኣቲ ዓኪሼ ኮይላ ዳውቴ፦ «ኔኤኒ ታና ናሽካያ ማዔቴ ፔቴ ዻካ ካታማይዳ ናንጋንዳጉዲ ታና ጌሤ፤ ታ ጎዳ፥ ኔኤኒ ካኣታዺ ዴዒ ዓኣ ካታሞይዳ ኔኤና ዎላ ታ ናንጋንዳያ ኮይሱዋሴ» ጌዔኔ።

⁶ዬያሮ ካኣቲ ዓኪሼ ፂቅላጌ ካታሞ ዳውቴም ዒንጌኔ፤ ዬማፓ ዓርቃዖ ፂቅላጌ ዪሁዳ ካኣቶ ዓጪ ማዒ ዓቴኔ።

⁷ዬያይዲ ዳውቴ ፒሊስፄኤሜ ዓጮይዳ ፔቴ ሌዔና ዖይዶ ዓጊኒና ዴዔኔ።

⁸ዬኖ ዎዶና ቢያ ዳውቴንታ ዒዛ ዓሶንታ ጌሪሹራ ዓሶ፥ ጌሪዛ ዓሶ፥ ዓማሌቄ ዓሶዋ ዖሌኔ፤ ዬና ዓሳ ቤርታፓ ዓርቃዖ ዴንዲ ሹሬና ጊብፄያ ሄላንዳኣና ዒኢካ ናንጋያኬ።

⁹ዒዚ ዒማና ዓቲንቆንታ ላኣሎንታ ቢያ ዎዺ ዎዺ ማራታ፥ ባኣታ፥ ሃራ፥ ጋኣላሢንታ ማኣዓሢያ ዓሶኮ ቢያ ዔካኔ፤ ዬካፓ ዳውቴ ዓኪሼ ኮይላ ሙካዛ፥

¹⁰ዓኪሼ፦ «ሃሢ ዒንሢ ዎኖ ዛሎ ዴንዲ ዖሊ ሙኬይ?» ጌይ ዳውቴ ዖኦጫኣና ዒዚ ማሃዖ፦ «ኑኡኒ ዖሌሢ ዪሁዳኮ ዾኦሎ ዛሎ ዓጮ፤ ሃሣ ዪራህሜዔኤሌ ፃጶ ዓጮንታ ቄና ዓሳ ናንጋ ዓጮንታኬ» ጋዓኔ።

¹¹ዒማና ዳውቴ ዓቲንቄ ማዔቴያ ላኣሊ ጋኣቴ ዔኪ ሙኩዋዖ ዎዎዻኔ። ዬያ ዒ ማዻሢ፦ «ዳውቴ ዬያይዴኔ» ጌይ ኬኤዛንዳሢሮኬ። ዳውቴ ፒሊስፄኤሜ ዓጫ ናንጌ ዎዶና ቢያ ዬያይዲፃ ዒዛኮ ዔርቴያኬ።

¹²ካኣቲ ዓኪሼ ጋዓንቴ ዳውቴ ጉሙርቃሢሮ ፔ ዒኖና፦ «ዒ ፔ ዒጊና ዒዛ ዒፃንዳ ባኣዚ ማዼሢሮ ዒ ናንጋ ዎዶይዳ ቢያ ታኣም ማዻያ ማዓንዳኔ» ጌይ ማላኔ።