1 ሳሙዔኤሌ ማፃኣፖ 15

¹ፔቴ ኬሊ ሳሙዔኤሌ ሳኣዖኦሌ ኮይላ፦ «ናንጊና ናንጋ ጎዳ ፔ ዴሮ ዒስራዔኤሌ ዑፃ ኔና ቲሽኪ ካኣታሦም ዒማና ታና ዳኬኔ፤ ሃሢ ቢያ ባኮ ዳንዳዓ ጎዳሢ ጋዓ ባኮ ዋይዜ፤ 15፡1 1ሳሙ. 10፡1።

²ዒስራዔኤሌ ዓሳ ጊብፄፓ ኬስኪ ሙካኣና ዓማሌቄ ዓሳ ጎይፆይዳ ዔያቶ ዖሊ ዖሊ ሜታሴሢሮ ናንጊና ናንጋ ጎዳ ዓማሌቄ ዓሶይዳ ፑርታ ዓጊ ኮሞ ዔካኒ ጌዔኔ። 15፡2 ኬሲ. ማፃ 17፡8-14፤ ላሚ. ዎማ 25፡17-19።

³ሃሢ ዴንዲ ዓማሌቄ ዓሶ ዖሊ ዔያቶኮ ዓኣ ባኮ ቢያ ባይዜ፤ ፔቴ ባኣዚታዎ ዓይሲፖ፤ ዓቲንቆ፥ ላኣሎ፥ ዻኮንታ ዓኣሎ ናኣቶንታ፥ ባኣቶ፥ ማራቶ፥ ጋኣላሢንታ ሃሮንታ ቢያ ዎዼ» ጌዔኔ።

⁴ዬያሮ ሳኣዖኦሌ ፔኤኮ ፖኦሊሶ ዔኤሊ ፄሌሜ ጌይንታ ቤስካ ቡኩሲ ፓይዴኔ፤ ዒማና ዒስራዔኤሌፓ ሙኬ ዖሎ ዓሳ ላምዖ ፄኤታ ሺያ፥ ዪሁዳፓ ሙኬ ዓሳ ታጶ ሺያ ማዔኔ፤

⁵ዬካፓ ዒዛንታ ፖኦሊሶንታ ዓማሌቄ ዓሶ ካታሞ ዴንዲ ፔቴ ዛሬ ካርካ ካቲ ዴዔኔ፤

⁶ዒስራዔኤሌ ዓሳ ጊብፄፓ ኬስካኣና ቄና ዓሳ ኮሺ ባኣዚ ዔያቶም ማዼሢሮ ሳኣዖኦሌ፦ «ታ ዒንሢ ዓማሌቄ ዓሶና ዎላ ኩርሱዋጉዲ ዔያቶ ባኣካፓ ኬስኪ ዴንዱዋቴ» ጌይ ኪኢታ ዳካዛ፥ ቄና ዓሳ ዓማሌቄ ዓሶ ሃሺ ዴንዴኔ።

⁷ሳኣዖኦሌ ሃዊላፓ ዓርቃዖ ዴንዲ ጊብፄ ዓጮኮ ዓባ ኬስካ ዛላ ዓኣ፥ ሹኡሬ ዔኪ ዴንዳ ጎይፆ ሄላንዳኣና ቢያ ዖሊ ዓማሌቄ ዓሶ ባሼኔ።

⁸ዒማና ዒዚ ዓማሌቄ ዓሶኮ ካኣቲ፥ ዓጋጌ ዲዒ ዔካዖ ዴሮ ቢያ ጬንቾ ዓፓሮና ዎዺ ኩርሴኔ፤

⁹ጋዓንቴ ሳኣዖኦሌና ዒዛኮ ፖኦሊሶና ካኣታሢ፥ ዓጋጌ ዎዹዋዖ ሃሼኔ፤ ዬያ ሌሊቱዋንቴ ቃራ ቃራ ማዔ ማራቶንታ ባኣቶንታ፥ ማሎ ማሎ ቡዎንታ ማራ ናኣቶንታ፤ ዬያ ዬያጉዴ ኮዦ ባኮ ቢያ ዎዺ ባይዚባኣሴ፤ ዔያታ ዒማና ዎዺ ባይዜሢ ዔኤቢ ማኣዳ ባኣዚባኣ ባኮ ሌሊኬ።

¹⁰ናንጊና ናንጋ ጎዳ ሳሙዔኤሌም፦

¹¹«ሳኣዖኦሌ ታና ሃሼኔ፤ ዒዚ ታኣኮ ዓይሢፆ ካፒባኣሢሮ ዒዛ ታ ካኣታሢፆና ዒና ታኣኮ ዖዬኔ» ጋዓዛ፥ ሳሙዔኤሌ ዬያሮ ዻጋዺ ዬኤኪ ዬኤኪ ፆኦሲ ሺኢቄ ጎይሣ ዬኖ ዋንቶ ዎርቄኔ፤

¹²ዬካፓ ዒዚ ጉቴ ዓማ ዔቂ ሳኣዖኦሌ ዴንቃኒ ኮይ ዴንዴኔ፤ ዒዞ ኬሎ ሳኣዖኦሌ ዒዚ ፔኤኮ ዖሎና ባሺፆ ዔርዛኒ ዻኣቦ ዻኣቤ፥ ቄርሜሎሴ ካታሞ ሄላዖ ማዒ ጊንሣ ጌልጌላ ዴንዴሢ ዋይዜኔ፤

¹³ዬያ ዋይዛዖ ዒዚ ሳኣዖኦሌ ኮራ ሙካዛ፥ ሳኣዖኦሌ፦ «ሳሙዔኤሌ! ናንጊና ናንጋ ጎዳ ኔና ዓንጆንጎ፤ ታኣኒ ናንጊና ናንጋ ጎዳኮ ዓይሢፆ ማዺ ኩንሤኔ» ጌዔኔ።

¹⁴ሳሙዔኤሌ ዒማና፦ «ሂዳዖ ሃይ ታ ሃሢ ዋይዛ፥ ባኣቶንታ ማራቶ ዺቦንታኮ ዑኡዛ ዓይጎዳዖ?» ጌይ ሳኣዖኦሌ ዖኦጬኔ።

¹⁵ሳኣዖኦሌ ማሃዖ፦ «ዬይ ታኣኮ ዖሎ ዓሳ ዓማሌቄ ዓሶፓ ዲዒ ዔኬሢኬ፤ ዔያታ ቃሮ ቃሮ ባኣቶንታ ማራቶንታ ናንጊና ናንጋ ጎዳ ማዔ ኔኤኮ ፆኦዛሢም ሚቺ ዒንጎ ዒንጊሢ ማሂ ሺኢሻኒ ዔኪ ሙኬኔ፤ ሃንጎ ባኮ ቢያ ጋዓንቴ ቢያ ኑ ዎዺ ባይዜኔ» ጌዔኔ።

¹⁶ዬያሮ ሳሙዔኤሌ፦ «ሃሼ ጊዳንዳኔ፤ ናንጊና ናንጋ ጎዳ ታኣም ሂኖ ዋንቴ ፔጋሲ ኬኤዜ ባኣዚ ታ ኔኤም ኬኤዞም» ጌዔኔ።

¹⁷ዬካፓ ሳሙዔኤሌ ዒዛም፦ «ኔ ኔና ‹ዻካ ዓሲኬ› ጌይ ማሌቴያ ዒስራዔኤሌ ፃጶኮ ሱኡጌ ኔ ማዒባኣዓዳ? ናንጊና ናንጋ ጎዳ ኔና ዶኦሚ ዒስራዔኤሌ ዓሶ ዑፃ ካኣታሤኔ፤

¹⁸ሃሣ ዬያቶ ጎማዼ፥ ዓማሌቄ ዓሶ ዎዺ ኔ ባይዛንዳጉዲ ኔና ዒ ዳኬኔ፤ ኔ ዔያቶ ጋፕዲ ኩርሳንዳጉዲ ኔና ዒ ዓይሤኔ።

¹⁹ሂዳዖ ዎይታዛ ኔ ዒዛኮ ዓይሢፆ ኩንሢባኣይ? ዲዒንቲ ዔውቴ ባኮ ሚጪንቲ ጎጋይቂ ናንጊና ናንጋ ጎዳ ዎዛሱዋ ማዾ ኔ ዓይጎሮ ማዼይ?» ጌዔኔ።

²⁰ሳኣዖኦሌ ማሃዖ፦ «ናንጊና ናንጋ ታ ጎዳሢኮ ዓይሢፆ ታ ኩንሢ ማዼኔ፤ ዒ ታና ዓይሤ ጎይፆና ኬስኪ ታ ዖሌኔ፤ ካኣታሢ ዓጋጌ ሌሊ ታኣኒ ዓይሲ ዲዒ ዔኪ ዬዓዖ ሃንጎ ዓማሌቄ ዓሶ ቢያ ታ ዎዼኔ፤

²¹ጋዓንቴ ታኣኮ ዖሎ ዓሳ ዲዒ ዔኬ፥ ቃሮ ቃሮ ማራቶንታ ባኣቶንታ ዎዺባኣሴ፤ ዬያይዲፆ ኑኡኒ ሃሺ ዔኪ ሙኬሢ ናንጊና ናንጋ ጎዳ ማዔ ኔ ፆኦዛሢም ጌልጌላይዳ ሚቺ ዒንጎ ዒንጊሢ ማሂ ሺኢሻኒኬ» ጌዔኔ።

²²ዬማና ሳሙዔኤሌ፦ «ናንጊና ናንጋ ጎዳ ናሽካሢ ዓይጎ ኔኤም ማላይ? ዓይሢንቲሢሞ ሜሌ ዒንጎ ባኮና ሚቺ ዒንጎ ባኮናዳይ? ዒዛም ዓይሢንቲፃ፦ ቃራ ማራይ ሹኪ ሚቺ ሺኢሾ ዒንጊፃፓ ባሼኬ፤

²³ፆኦሲም ዋይዚ ዒፂሢ፦ ማርሻ ማርሺሢጉዲኬ፤ ዖቶርቂ ጌኤታዺሢያ፦ ሜሌ ፆኦዞ ካኣሽኪ ጎሜ ማዺሢጉዴያኬ፤ ኔኤኒ ናንጊና ናንጋ ጎዳኮ ዓይሢፆ ሃሼሢሮ ማይ ካኣታዺ ዴዑዋጉዲ ዒዚያ ኔና ሃሼኔ» ጌዔኔ።

²⁴ዬያሮ ሳኣዖኦሌ፦ «ሂዮ ጎኔኬ፤ ታ ጎሜ ማዼኔ፤ ናንጊና ናንጋ ጎዳ ዓይሤ ዓይሢፆንታ ኔ ታኣም ኬኤዜ ባኮዋ ካፒ ታ ኩንሢባኣሴ፤ ታኣኒ ታኣኮ ፖኦሊሶ ዒጊጪ ዔያታ ኮዔ ጎይፆ ቢያ ታ ማዼኔ፤

²⁵ጋዓንቴ ሃሢ ታ ኔና ሺኢቃኔ ዬያ ጎሞ ታኣኮ ዓቶም ጌዔ፤ ታኣኒ ጌልጌላይዳ ናንጊና ናንጋ ጎዳ ዚጊ ካኣሽኮም ታኣና ዎላ ማዒ ዒኢካ ቢሬ» ጌዔኔ።

²⁶ሳሙዔኤሌ ዒማና፦ «ታኣኒ ኔኤና ዎላ ዴንዳዓኬ፤ ኔኤኒ ናንጊና ናንጋ ጎዳኮ ዓይሢፆ ማዺ ኩንሦ ሃሼኔ፤ ማይ ኔኤኒ ዒስራዔኤሌኮ ካኣቲ ማዒ ዴዑዋጉዲ ዒዚ ኔና ሃሼኔ» ጌዔኔ።

²⁷ያዺ ጋዓዖ ሳሙዔኤሌ ዒዛ ኮይላፓ ዴንዳኒ ሺሬኔ፤ ሳኣዖኦሌ ጋዓንቴ ሳሙዔኤሌ ዴንዱዋጉዲ ዒ ማኣዒ ዓኣ ዼኤፖ ኮኦቶኮ ዓጮ ዓርቄም ኮኦታ ዳርዓዛ፥

²⁸ሳሙዔኤሌ ሳኣዖኦሌ ኮራ፦ «ናንጊና ናንጋ ጎዳ ዒስራዔኤሌይዳ ኔ ካኣታዼ ካኣቱሞ ኔ ኩጫፓ ሃኖ ዳርዚ ዔኪ ሜሌ ቃራ ዓሲም ዒንጌኔ፤ 15፡28 1ሳሙ. 28፡17፤ 1ካኣቶ. ማ 11፡30-31።

²⁹ዒስራዔኤሌኮ ቦንቾ ማዔ ፆኦዛሢ፦ ሉኡቃያቱዋሴ፤ ሃሣ ‹ዓይጋ ታ ዬያይዴይ?› ጋዓያቱዋሴ፤ ዒዚ ዓሲጉዲቱዋሢሮ ፔኤኮ ማሊፆ ጊንሣ ሺርሹዋሴ» ጌዔኔ።

³⁰ዬያሮ ሳኣዖኦሌ፦ «ጎኔኬ ታ ዻቤኔ፤ ያዺ ማዔቴያ ሜሌ ባካ ዓቶንጎ ታ ዴሮኮ ሱኡጎና ዒስራዔኤሌ ዴሮና ቤርቶይዳ ታና ቦርሲሲፖ፤ ናንጊና ናንጋ ጎዳ ማዔ ኔኤኮ ፆኦዛሢ ታ ዚጊ ካኣሽካንዳጉዲ ታኣና ዎላ ዴንዴቴራ» ጌይ ሺኢቄኔ።

³¹ያዺ ጌይ ዒ ሺኢቃዛ ሳሙዔኤሌ ዒዛና ዎላ ጌልጌላ ዴንዴኔ፤ ሳኣዖኦሌያ ናንጊና ናንጋ ጎዳ ዚጊ ካኣሽኬኔ።

³²ዬካፓ ሳሙዔኤሌ፦ «ካኣታሢ፥ ዓጋጌ ታኣም ሃኒ ዔኪ ዬዔ!» ጌይ ዓይሣዛ፥ ዓጋጌ ዒጊቹሞና ጎጋይቂ ጎጋይቂ ዒዛ ኮይላ ሙኬኔ፤ ዓጋጌ ዒማና፦ «ሃይቢ ሃያጉዴ ፑርታ ባኣዚዳ!» ጌይ ፔ ዒኖና ማሌኔ።

³³ሳሙዔኤሌ ዒዛ ኮይላ፦ «ኔኤኮ ጬንቾ ዓፓራ ሚርጌ ናኣቶ ዒንዶ ናይ ባኣያ ማሄሢጉዲ ኔ ዒንዳኣ ናይ ባኣያ ማዒ ዓታንዳኔ» ጌዔኔ። ጌልጌላይዳ፥ ናንጊና ናንጋ ጎዳም ዒንጎ ባኮ ዒንጎ ቤዞኮ ቤርቶ ዛላ ዒዛ ቲቂ ቲቂ ኬኤሬኔ።

³⁴ያዺዴስካፓ ሳሙዔኤሌ ራኣማ ዴንዴኔ፤ ካኣታሢ፥ ሳኣዖኦሌያ ጊቢዓ ማዒ ዴንዴኔ።

³⁵ዬማፓ ዓርቃዖ ሳሙዔኤሌ ናንጌ ዎዶ ቢያይዳ ካኣታሢ፥ ሳኣዖኦሌ ዛጊ ቤቂባኣሴ፤ ጋዓንቴ ናንጊና ናንጋ ጎዳ ዒስራዔኤሌ ዓሶ ዑፃ ሳኣዖኦሌ ካኣታሲፆና ዖዬሢሮ ሳሙዔኤሌ ዬያ ዛሎ ዖዪ ዖዪ ዬኤካኔ።