1 ሳሙዔኤሌ ማፃኣፖ 11

¹ፔቴ ዓጊኒኮ ጊንፃ ዓሞኦኔ ዓጮ ካኣቲ፥ ናዖሴ ጌሌዓዴይዳ ዓኣ ያቤሼ ካታሞ ዖሊ ዓርቃኒ ዖልዚ ዓሲና ማንጌኔ፤ ዬያሮ ያቤሼ ዓሳ ናዖሴ ኮራ፦ «ኑ ኔኤና ዎላ ጊኢጊ ናንጋኒ ጫኣቃንዳኔ፤ ኑኡኒ ኔኤኮ ዓይሌ ማዓንዳኔ» ጌዔኔ።

²ናዖሴ ማሃዖ፦ «ታ ዒንሢና ዎላ ጫኣቃኒ ዳንዳዓሢ ፔቴ ባኣዚ ዒንሢ ዔኤዔቴኬ፤ ዬና ዓይጎዳይ ጌዔቴ ዒንሢ ፔቴ ፔቴሢኮ ሚዛቆ ዓኣፖ ታኣኒ ዋቂ ኬሲ ዒስራዔኤሌ ዓሶ ጋፒንሢ ቦርሲሳንዳኔ» ጌዔኔ።

³ዒማና ያቤሼ ዓጮ ሱኡጋ፦ «ዒስራዔኤሌ ዓጮ ጉቤ ኪኢታ ዓሲ ኑ ዳካንዳጉዲ ላንካይ ኬሊ ኑም ዒንጌ፤ ኑና ዓውሳንዳ ዓሲ ባይቄቴ ኔኤም ኑ ኩጮ ዒንጋንዳኔ» ጌዔኔ።

⁴ዔያታ ዳኬ ኪኢቶ ዓሶንሢ ሳኣዖኦሌ ዓኣ ቤዞ፥ ጊቢዓ ሙካዖ ሃይሶ ኬኤዛዛ ዴራ ቢያ ካራ ባይዚ ዒላቲና ዬኤፒ ዓርቄኔ።

⁵ሳኣዖኦሌ ዒማና ዋኣፃ ጌማይ ዒሺ ፔኤኮ ጎዣፓ ማዒ ሙካኔ፤ ዒዚ ዬያ ዋይዛዖ፦ «ሃይ ዓይጎዳይ? ዓሳ ቢያ ዓይጎሮ ዬኤካይ?» ጌይ ዖኦጫዛ፥ ያቤሼፓ ሙኬ ዓሳ ጌዔ ባኮ ዒዛም ዓሳ ኬኤዜኔ።

⁶ሳኣዖኦሌ ዬያ ዋይዛዛ ፆኦሲኮ ዓያና ዎልቄና ዒዛይዳ ኬዴኔ፤ ሃሣ ሚርጌና ዒ ዻጋዼኔ።

⁷ዬካፓ ዋኣፆ ጌማቶንሢ ሹኪ ዓሽኮ ዺቢ ቤሲ ቲቂ ቲቂ ፓቄኔ፤ ዬያ ዓሽኮ ዔኪ፦ «ሳኣዖኦሌና ሳሙዔኤሌና ጊንፆ ዖልዚሮ ኬስኩዋ ዓሲ ዓኣቴ ዬኖ ዓሶኮ ጌማታ ሃማዺ ቲቂንታንዳሢ ዔሩዋቴ!» ጌይ ኪኢታ ዓሲ ዒስራዔኤሌ ዓጮ ቢያ ዳኬኔ።

⁸ሳኣዖኦሌ ዔያቶ ቤዜቄ ጌይንታ ቤዛ ቡኩሳዛ ዔያቶኮ ፓይዳ፦ ዒስራዔኤሌፓ ሙኬ ዓሶኮ ሃይሦ ፄኤታ ሺያ፤ ዪሁዳይዳፓ ሙኬ ዓሳ ሃይሢታሚ ሺያኬ።

⁹ዬካፓ ዔያታ ያቤሼፓ ሙኬ ኪኢቶ ዓሶም፦ «ዚሮ ዓባ ሳዛ ሄላንዳሢኮ ቤርታ ኑ ሙኪ ዔያቶ ዓውሳንዳሢ ዒንሢኮ ዴሮም ኬኤዙዋቴ» ጌዔኔ። ዬንሢ ኪኢቶ ዓሶንሢ ዴንዲ ያቤሼ ዴሮም ኬኤዛዛ ዔያታ ሚርጌና ዎዛዼኔ።

¹⁰ዬያሮ ያቤሼ ዓሳ ዓሞኦኔ ዓሶም፦ «ዚሮ ኩጮ ኑ ዒንሢም ዒንጋንዳኔ፤ ዒንሢ ኑጊዳ ኮዔ ባኣዚ ማዹዋቴ» ጌዔኔ።

¹¹ዚሮ ጉቴሎ ዓማ ሳኣዖኦሌ ዔቂ ፖኦሊሶ ሃይሦ ቤሲ ፓቄኔ፤ ዬያይዴስካፓ ዴንዲ ዓሞኦኔ ዓሶ ጉርዶ ጌሊ ዖልዚ ዓርቄኔ፥ ዓባ ዴንዲ ሳዛ ሄላንዳኣና ዓሞኦኔ ዓሶፓ ሚርጌ ዓሲ ዎዼኔ፤ ሃይባፓ ቶሌ ዓሳ ላምዖ ዓሲታዎ ዎላ ማዓኒ ዳንዳዑዋ ጎይሢ ጳሽኪ ፑኒ ፑኒ ዴንዴኔ።

¹²ዒማና ዒስራዔኤሌ ዓሳ ሳሙዔኤሌ ኮይላ፦ « ‹ሳኣዖኦሌ ኑ ዑፃ ካኣታዾፓ› ጌዔ ዓሳ ዖናንሢዳይ? ዔያቶ ኑም ዓኣሢ ዒንጌ ኑ ዎዻንዳኔ!» ጌዔኔ።

¹³ሳኣዖኦሌ ጋዓንቴ፦ «ናንጊና ናንጋ ጎዳ ዒስራዔኤሌ ዓሶ ሃናኣ ኬሎይዳ ዓውሴሢሮ ዓይጎ ዓሲያ ዎዺንታንዳያ ኮይሱዋሴ» ጌዔኔ።

¹⁴ዬካፓ ሳሙዔኤሌ ዴሮም፦ «ቢያሢ ኑ ጌልጌላ ዓኣዺ ሳኣዖኦሌ ኑኡኮ ካኣቲ ማዔሢ ላሚ ሃሣ ፔጋሲ ኑ ዔርዞም» ጌዔኔ።

¹⁵ዬያሮ ቢያሢ ጌልጌላ ዴንዲ ዒኢካ ናንጊና ናንጋ ጎዳም ዱማዼ ቤዞይዳ ሳኣዖኦሌ ካኣቲ ማዔሢ ዔርዜኔ፤ ዒኢካ ናንጊና ናንጋ ጎዳም ፔቱሞና ዒንጎ ባኣዚ ሺኢሼኔ፤ ሳኣዖኦሌንታ ዒስራዔኤሌ ዴሮ ቢያሢንታ ዬኖ ቦንቾ ኬሎ ዼኤፒ ዎዛና ቦንቼኔ።