1 ካኣቶ ማፃኣፖ 14

¹ዒማና ካኣቲ፥ ዒዮርቢዓሜኮ ናኣዚ፥ ዓቢያ ሃርጊንቲ ዓኣኔ፤

²ዬያሮ ዒዮርቢዓሜ ማቾ ኮይላ፦ «ኔኤኒ ታ ላኣሌሎታሢ ዖኦኒያ ኔና ዔሩዋጉዲ ሜሌ ማኣዖ ማይንቲ፥ ሜሌ ላኣሊ ማሊጋፓ ታኣኒ ዒስራዔኤሌይዳ ካኣታዻንዳሢ ዛሎ ፆኦሲ ማሊፆ ኬኤዜ ዓኪያ ኮይላ ሴኤሎ ዴንዴ፤

³ዒዛም ታጶ ላኣዳንታ ሙኑቃ ፃኣዛና ካፂሲ ካሦና ሙሊሢ ላኣዳንታ ፔቴ ዖቲ ዔኤሲያ ዔኪ ዴንዴ፤ ናዓሢ ዎዎይንታንዳቴያ ኔኤም ዒ ኬኤዛንዳኔ» ጌዔኔ።

⁴ዬያሮ ዒዮርቢዓሜ ማቻ ዬያ ቢያ ጊኢጊሺ፥ ሴኤሎይዳ ዓኣ ዓኪያ ማኣሪ ዴንዴኔ፤ ዓኪያ ዒማና ኮሺ ጋርቺ ዓኣሢሮ ዓኣፓ ዒዛኮ ዴንቁዋያኬ፤

⁵ያዺ ማዔቴያ ዒዮርቢዓሜ ማቻ ፔኤኮ ሃርጋ ናዓሢ ዛሎ ዖኦጫኒ ሙካንዳሢና ዒዚ ዒዞም ዎዚ ጋዓንዳቴያ ናንጊና ናንጋ ጎዳ ቤርታዺ ዒዛም ኬኤዜኔ።

⁶ጋዓንቴ ፆኦሲ ማሊፆ ኬኤዛሢ፥ ዓኪያ ካራ ዒዞኮ ካኣኖ ዋይዚ፦ «ጌሌ! ኔኤኒ ዒዮርቢዓሜ ማቾታሢ ታ ዔሬኔ፤ ሜሌ ላኣሊ ማላኒ ኔኤኒ ዓይጋ ኮዔይ? ኔኤም ታ ኬኤዛንዳጉዲ ታና ዓይሦና ፑርታ ሃይሴ ዓኣኔ።

⁷ሃሢ ዒዮርቢዓሜ ኮይላ ዴንዲ ናንጊና ናንጋ ጎዳ ማዔ ዒስራዔኤሌ ፆኦዛሢ ጋዓ ባኮ ዒዛም ኬኤዜ፤ ዬይ ባካ ያዺኬ፦ ‹ኔኤኒ ካኣቶ ማኣሪ ዓሲቱዋንቴ ሜሌ ዓሶ ባኣካፓ ታ ኔና ዶኦሪ ታ ዴሮ ዒስራዔኤሌኮ ሱኡጌ ማሄኔ፤

⁸ካኣቱሞ ዳውቴ ዜርፃፓ ዔኪ ኔኤም ታኣኒ ዒንጌኔ፤ ጋዓንቴ ኔኤኒ ታኣም ጉቤ ዒናፓ ጉሙርቂንታያ ማዒ ታኣኮ ዓይሢፆ ካፓያ፥ ሃሣ ታኣኒ ዎዛዻ ባኣዚ ቢያ ማዺ፥ ታ ዓይላሢ ዳውቴጉዲ ኔ ማዒባኣሴ፤

⁹ኔኤኒ ኔኤኮ ቤርታኣ ሱኡጎ ማዔ ዓሶፓ ባሼ ፑርታ ጎሜ ማዼኔ፤ ኔኤኒ ታና ሃሺ ሜሌ ፆኦዞንታ ዓንጊና ኮሺንቴ ባኣዚያ ዚጊ ካኣሽካኒ ኮሺፆና ታኣኮ ዻጎ ዔቂሴኔ፤

¹⁰ዬያሮ ሃይሾ ሃሢ ኔ ማኣሮይዳ ፑርታ ባኣዚ ታ ዓጋንዳኔ፤ ኔ ማኣራፓ ዓይሌያ ማዖም ጉሪ ማዾ ማዻ ዓሲ፤ ዬያጉዲ ዓቲንቄ ጋዓ ባኣዚ ቢያ ዒስራዔኤሌፓ ታኣኒ ባይዛንዳኔ፤ ቡኡራ ሚቺ ባይዞጉዲ ኔ ማኣሮ ታ ባይዛንዳኔ። 14፡10 1ካኣቶ. ማ 15፡29።

¹¹ካታሞይዳ ሃይቃ ኔ ማኣሮ ዓሶ ጉቤ ካኒ ሙዓንዳኔ፤ ካታሞቱዋ ቤዛ ሃይቃ ዓሶ ኔኤኮ ሃምፑራ ሙዓንዳኔ፤ ዬያ ጋዓሢ ታና፥ ናንጊና ናንጋ ጎዳኬ› » ጌዔኔ።

¹²ዓኪያ ፆኦሲ ማሊፆ ሃሣ ኬኤዛዖ ዒዮርቢዓሜ ማቾም፦ «ዓካሪ ሃሢ ኔ ማኣሪ ማዒ ዴንዴ፤ ካታሞ ኔ ጌጌላማና ናዓ ኔኤኮ ሃይቃንዳኔ፤

¹³ዒስራዔኤሌ ዴራ ጉቤ ዖዪ ዬኤኪ ዒዛ ዱኡካንዳኔ፤ ናንጊና ናንጋ ጎዳ ማዔ ዒስራዔኤሌ ፆኦዛሢኮ ዒና ዎዛዼሢ ዒዛና ሌሊታሢሮ ዒዮርቢዓሜ ማኣራፓ ዳምቤና ዱኡታንዳሢ ኔኤኮ ዬያ ናዓሢ ሌሊኬ፤

¹⁴ናንጊና ናንጋ ጎዳ ፔኤሮ ዒዮርቢዓሜ ማኣሮ ባይዛንዳ ካኣቲ ሃሢ ካኣታሣንዳኔ።

¹⁵ናንጊና ናንጋ ጎዳ ዒስራዔኤሌ ዓሶይዳ ሜቶ ዓጋንዳኔ፤ ዬያሮ ዒስራዔኤሌ ዋኣሢዳ ባቃሊ ጎፒንታ ፒሌጉዲ ጎጋይቃንዳኔ፤ ዓሼራ ጌይንታ ላኣሎ ፆኦዜሎ ማሊሲ ካኣሽኮ ባኣዚ ማዢ ዒዛ ዔያታ ዻጋሴሢሮ ዒስራዔኤሌ ዴሮ ሃያኮ ቤርታ ዒዚ ዔያቶኮ ዓዶንሢም ዒንጌ ማሎ ዓጬሎፓ ዔፕራፂሴ ዎሮ ሱኮ ዳኪ ዔያቶ ዜርቃንዳኔ፤

¹⁶ዒዮርቢዓሜ ጎሜ ማዼሢሮ፥ ሃሣ ዒስራዔኤሌ ዓሶዋ ጎሜይዳ ዔኪ ጌልዜሢሮ ናንጊና ናንጋ ጎዳ ዒስራዔኤሌ ሃሻንዳኔ» ጌዔኔ።

¹⁷ዬካፓ ዒዮርቢዓሜ ማቻ ማዒ ቲርፃ ሙኪ ፔ ማኣሮ ካሮ ሄሄላማና ናዓ ዒዞኮ ሃይቄኔ።

¹⁸ናንጊና ናንጋ ጎዳ ፔ ዓይላሢ ማዔ፥ ዓኪያም ኬኤዜ ጎይፆ ዒስራዔኤሌ ዓሳ ዖዪ ዬኤኪ ናዓሢ ዱኡኬኔ።

¹⁹ካኣቲ፥ ዒዮርቢዓሜ ማዼ ሜሌ ባኮ ቢያሢንታ ዒዚ ዖልቴ ዖሎንታ ዒዚ ዎይሤ ዎይሢፃኣ ዎማዺታቴያ ቢያ ባካ ዒስራዔኤሌኮ ካኣቶ ሃይሶ ኬኤዛ ማፃኣፖይዳ ፃኣፒንቴኔ።

²⁰ዒዮርቢዓሜ ካኣታዺ ላማታሚ ላምዖ ሌዔ ዴዔስካፓ ሃይቂ ዱኡቴም ዒዛ ቤዛ ዒዛኮ ናኣዚ ናኣዳቤ ካኣታዼኔ።

²¹ሴሎሞኔኮ ናኣዚ፥ ሮቢዓሜ ዪሁዳይዳ ካኣታዻኣና ሌዓ ዒዛኮ ዖይዲታሚ ፔቴኬ፤ ናንጊና ናንጋ ጎዳ ዒስራዔኤሌ ዓጮ ጉቤሢፓ ዶኦሪ ዒዚ ካኣሽኪንታንዳጉዲ ጌዔ፥ ዬሩሳላሜ ካታሞይዳ ናንጊ ታጶ ላንካይ ሌዔ ሮቢዓሜ ዎይሤኔ፤ ዒዛ ዒንዶኮ ሱንፃ ናዕማ ጌይንታያ ዓሞኦኔ ዜርሢኬ።

²²ዒማና ዪሁዳ ዴራ ናንጊና ናንጋ ጎዳ ቤርታ ፑርታ ማዾ ማዺ ናንጊና ናንጋ ጎዳ ዖዪሴኔ፤ ቤርታ ዔያቶኮ ዓዶንሢ ማዼሢፓ ባሼ ፑርታ ባኣዚ ማዺ ናንጊና ናንጋ ጎዳኮ ዻጎ ዔያታ ዔቂሴኔ።

²³ዔያታ ሜሌ ፆኦዞ ካኣሽኮ ቤሲያ ጊኢጊሼኔ፤ ሃሣ ጌሜሮና ዼኤፖ ሚፆ ሺቦ ዴማኣ ዔያታ ካኣሽካንዳ ሹቺ ዾቂ ጊኢጊሾናያንታ ዓሼራኮዋ ማላሢ ማዢ ዾቄኔ፤ 14፡23 2ካኣቶ. ማ 17፡9-10።

²⁴ዬያፓ ሃሣ ዑሣ ዓኣዼ ፑርታ ማዓሢ ዓይጎዳይ ጌዔቴ፦ ዬይ ዴራ ካኣሽካ ቤዞይዳ ዓቲንቄና ላሃ ዓቲንቄንታ ዞኦስካ ኮኦማ ላኣሊያ ካኣዦሮ ጌሦናይ ዓኣኔ፤ ዒስራዔኤሌ ዓሳ ዎንዴ ቤርታ ዓጬሎ ጌላኒ ሙካኣና ናንጊና ናንጋ ጎዳ ዔያቶኮ ቤርታፓ ዳውሲ ባይዜ ዴራ ማዻ ቦርሲሳ ማዾ ቢያ ዪሁዳ ዴራኣ ማዻያ ማዔኔ። 14፡24 ላሚ. ዎማ 23፡17።

²⁵ሮቢዓሜ ካኣታዼንቴ ዶንጋሳ ሌዖና ጊብፄ ካኣቲ ሺሻቄ ዬሩሳላሜ ዖሊ፥

²⁶ጌኤዦ ማኣሮና ካኣቱሞ ማኣሮናይዳ ዓኣ ባኮ ቢያ፤ ሃሣ ሴሎሞኔ ዎርቆና ኮሺሴ ጊቲሞዋ ቡሪ ዔኪ ዴንዴኔ፤ 14፡26 1ካኣቶ. ማ 10፡16-17፤ 2ፆኦሲ. ዓሃኬ 9፡15-16።

²⁷ዬያ ዔውቴሢኮ ቤዛ ካኣቲ፥ ሮቢዓሜ ጊቲማ ሞኦና ዓንጊና ኮሺሲ ካኣቱሞ ማኣሮ ካፓ ዓሶኮ ሱኡጎም ካፓንዳጉዲ ዒንጌኔ፤

²⁸ዒማና ካኣቲ ጌኤዦ ማኣሪ ሙኪ ጌላማና ጌላማና ጌኤዦ ማኣሮ ካፓ ዓሳ ጊቲሞ ዓርቂ ሙኪ ሞኦኪ ዔካኔ፤ ዒዚ ዴንዳዛ ካፓ ዓሳ ጊቲሞ ጊንሣ ማሂ ዔያታ ካፖ ካፓ ኬኤፆይዳ ጌሣኔ።

²⁹ካኣቲ፥ ሮቢዓሜ ማዼ ሜሌ ባካ ቢያ ዪሁዳ ካኣቶ ሃይሳ ፃኣፒንታ ማፃኣፖይዳ ፃኣፒንቴኔ፤

³⁰ዒማና ቢያ ዎዴ ሮቢዓሜና ዒዮርቢዓሜና ዎላ ጋፑዋ ዖልዚ ዖልቲ ናንጋኔ፤

³¹ዬካፓ ሮቢዓሜ ሃይቂ፥ ዳውቴ ካታሞይዳ ካኣታ ዱኡታ ቤዛ ዱኡቴኔ፤ ዒዛ ቤዞይዳ ዒዛኮ ናኣዚ ዓቢያ ካኣታዼኔ። ሮቢዓሜኮ ዒንዶ ሱንፃ ናዕማ ጌይንታያ ዓሞኦኔ ዜርሢኬ።