1 ፆኦሲ ዓሶ ሃይሶ 3

¹ዬንሢ ላሆ ናኣቶ ዒ ሾዔሢ ኬብሮኦኔይዳ ናንጌ ዎዶናኬ፤ ዳውቴ ኬብሮኦኔይዳ ናንጊ ላንካይ ሌዔና ዛላና ዓጮ ዎይሤኔ።

²ዬኖ ቤዞይዳኣ ዒዚ ሚርጌ ዓቲንቄ ናይ ሾዔኔ።

³ዬንሢ ሌሊቱዋንቴ ሜሌ ዒዛኮ ታዞጳ ዓቲንቄ ናይያኣ ዓኣኔ፤ ዬያታ፦ ዪብሃሬ፥ ዔሊሹዓ፥ ዔሊፓሌፄ፥

⁴ኖጋሄ፥ ኔፔጌ፥ ያፒዓ፥

⁵ዔሊሻማዓ፥ ዔሊያዳዔና ዔሊፔሌፄ ጌይንታያኬ፤

⁶ሃሣ ዬንሢዳፓ ሜሌ ሃንጎ ላኣሊና ሾዖና ዓቲንቄ ናይ ዓኣኔ፤ ዒዛኮ ቲዕማሮ ጌይንታ ዉዱሮ ናይስኬናኣ ዓኣኔ።

⁷ካኣቲ፥ ሴሎሞኔኮ ሾይንቶ ዜርፃ ዎሊ ሄሌ ጎይፆ ሃካፓ ዴማ ፓይዲንታኔ፤ ሴሎሞኔ፥ ሮቢዓሜ፥ ዓቢያ፥ ዓኣሳ፥ ዒዮሳፒፄ፥

⁸ዒዮራሜ፥ ዓካዚያሴ፥ ዒዮዓሴ፥

⁹ዓሜሲያሴ፥ ዓዛሪያሴ፥ ዒዮዓታሜ፥

¹⁰ዓካኣዜ፥ ሂዚቂያሴ፥ ሚናኣሴ፥

¹¹ዓሞኦኔንታ ዒዮሲያሴንታኬ፤

¹²ዒዮሲያሴኮ ናኣዚ ቶይዲ ዮሃናኔ፤ ሄሌ ጌኤዚ ዒዮዓቄሜ፤ ሃይሣሳሢ ሴዴቂያሴ ማዓዛ ዖይዳሳሢ ሻሉሜኬ፤

¹³ዒዮዓቄሜ ዒኮኒያኔና ፄዴቂያ ጌይንታ ላምዖ ዓቲንቄ ናይ ሾዔኔ።

¹⁴ባብሎኔ ዓሳ ዖሎና ባሺ ዲዒ ዔኪ ቱኡሲ ዓሲ ማሄ ካኣቲ፥ ዮዓኪኔኮ ዜርፃ ሃይማፓ ዴማ ዓኣዞንሢኬ፤ ዒዚ፥ ዮዓኪኔ ላንካይ ዓቲንቄ ናይ ሾዔኔ፤ ዔያታኣ፦ ሳላቲያሌ፥

¹⁵ማልኪራሜ፥ ፔዳያ፥ ሼናፃሬ፥ ዪቃሚያ፥ ሆሻማዓና ኔዳቤ ጎዖዞንሢኬ።

¹⁶ፔዳያ ዜሬባቡሌና ሺምዒ ጌይንታ ላምዖ ዓቲንቄ ናይ ሾዔኔ፤ ዜሬባቡሌኮ ሃሣ ሜሹላሜና ሃናኒያ ጌይንታ ላምዖ ዓቲንቄ ናይና ሼሎሚቶ ጌይንታ ዉዱሮ ናይያኣ ዓኣኔ።

¹⁷ዬያጉዲ ሃሣ ፔዳያኮ ሜሌ ዶንጎ ዓቲንቄ ናይ ዓኣያ ማዓዛ ዔያታ፦ ሃሹባ፥ ዓሄሌ፥ ቤሬኪያ፥ ሃሳድያና ዩሻብሄሴዴ ጌይንታያኬ።

¹⁸ሃናኒያ ፔላፂና ዪሻዕያ ጌይንታ ላምዖ ዓቲንቄ ናይ ሾዔኔ፤ ዪሻዕያ ሬፓያ፤ ሬፓያ ዓርናኔ፤ ዓርናኔ ዓብዲዩኔ፥ ዓብዲዩኔያ ሼካኒያ ሾዔኔ።

¹⁹ሼካኒያ ሼማዒያ፤ ሼማዒያ፦ ሃፁሼ፥ ዩጋሌ፥ ባሪያሄ፥ ኔዓሪያና ሻፓፄ ጌይንታ ዶንጎ ዓቲንቄ ናይ ሾዔኔ፤ ዬያሮ ሼካኒያኮ ዜርፃ ዎሊ ዑፃ ላሆኬ፤

²⁰ኔዓሪያ፦ ዔልዮዔናዬ፥ ሂዚቂያሴንታ ዓዝሪቃሜ ጌይንታ ሃይሦ ዓቲንቄ ናይ ሾዔኔ፤

²¹ዔልዮዔናዬያኣ፦ ሆዳውያ፥ ዔሊያሺቤ፥ ፔላያ፥ ዓቁቤ፥ ዮሃናኔ፥ ዴላያንታ ዓናኒ ጌይንታ ላንካይ ዓቲንቄ ናይ ሾዔኔ።