1Na rĩrĩ, Jehova akĩarĩria Musa arĩ Hema-inĩ ya Gũtũnganwo kũu Werũ-inĩ wa Sinai mũthenya wa mbere wa mweri wa keerĩ, mwaka-inĩ wa keerĩ kuuma andũ a Isiraeli moima bũrũri wa Misiri. Akĩmwĩra atĩrĩ:
2“Tara kĩrĩndĩ gĩothe kĩa andũ a Isiraeli, ũmatare na mbarĩ ciao, na nyũmba ciao ũrĩa itariĩ, mũndũ mũrũme o mũndũ mũrũme andĩkwo rĩĩtwa rĩake.
3Wee mũrĩ na Harũni mũtare ikundi cia arũme othe arĩa marĩ Isiraeli, arĩa makinyĩtie mĩaka mĩrongo ĩĩrĩ na makĩria, arĩa mangĩhota gũthiĩ ita-inĩ.
4Mũndũ ũmwe kuuma o mũhĩrĩga, na akorwo arĩ mũtongoria wa nyũmba yao, nĩo mekũmũteithia.
5Maya nĩmo marĩĩtwa ma andũ arĩa marĩmũteithagĩrĩria:
6kuuma mũhĩrĩga wa Simeoni, nĩ Shelumieli mũrũ wa Zurishadai;
7kuuma mũhĩrĩga wa Juda, nĩ Nahashoni mũrũ wa Aminadabu;
8kuuma mũhĩrĩga wa Isakaru, nĩ Nethaneli mũrũ wa Zuaru;
9kuuma mũhĩrĩga wa Zebuluni, nĩ Eliabu mũrũ wa Heloni;
10kuuma ariũ a Jusufu:
11kuuma mũhĩrĩga wa Benjamini, nĩ Abidani mũrũ wa Gideoni;
12kuuma mũhĩrĩga wa Dani, nĩ Ahiezeri mũrũ wa Amishadai;
13kuuma mũhĩrĩga wa Asheri, nĩ Pagieli mũrũ wa Okirani;
14kuuma mũhĩrĩga wa Gadi, nĩ Eliasafu mũrũ wa Deueli;
15kuuma mũhĩrĩga wa Nafitali, nĩ Ahira mũrũ wa Enani.”
16Acio nĩo andũ arĩa maathuurirwo kuuma kũrĩ kĩrĩndĩ gĩa Isiraeli, marĩ atongoria a mĩhĩrĩga ya maithe mao ma tene. Nĩo maarĩ atongoria a mĩhĩrĩga ya Isiraeli.
17Musa na Harũni makĩoya andũ acio maaheetwo marĩĩtwa mao.
18Magĩcooka magĩĩta kĩrĩndĩ gĩothe hamwe mũthenya wa mbere wa mweri wa keerĩ. Andũ makĩonania rũruka rwao kũringana na mbarĩ na nyũmba ciao, nao arũme arĩa maakinyĩtie mĩaka mĩrongo ĩĩrĩ na makĩria makĩandĩkwo, o mũndũ o mũndũ na rĩĩtwa rĩake,
19o ta ũrĩa Jehova aathĩte Musa. Nĩ ũndũ ũcio akĩmatara marĩ kũu Werũ-inĩ wa Sinai:
20Kuuma njiaro-inĩ cia Rubeni, mũriũ wa irigithathi wa Isiraeli:
21Kuuma mũhĩrĩga wa Rubeni maarĩ andũ 46,500.
22Kuuma njiaro-inĩ cia Simeoni:
23Kuuma mũhĩrĩga wa Simeoni maarĩ andũ 59,300.
24Kuuma njiaro-inĩ cia Gadi:
25Kuuma mũhĩrĩga wa Gadi maarĩ andũ 45,650.
26Kuuma njiaro-inĩ cia Juda:
27Kuuma mũhĩrĩga wa Juda maarĩ andũ 74,600.
28Kuuma njiaro-inĩ cia Isakaru:
29Kuuma mũhĩrĩga wa Isakaru maarĩ andũ 54,400.
30Kuuma njiaro-inĩ cia Zebuluni:
31Kuuma mũhĩrĩga wa Zebuluni maarĩ andũ 57,400.
32Kuuma kũrĩ ariũ a Jusufu:
33Kuuma mũhĩrĩga wa Efiraimu maarĩ andũ 40,500.
34Kuuma njiaro-inĩ cia Manase:
35Kuuma mũhĩrĩga-inĩ wa Manase maarĩ andũ 32,200.
36Kuuma njiaro-inĩ cia Benjamini:
37Kuuma mũhĩrĩga wa Benjamini maarĩ andũ 35,400.
38Kuuma njiaro-nĩ cia Dani:
39Kuuma mũhĩrĩga wa Dani maarĩ andũ 62,700.
40Kuuma njiaro-inĩ cia Asheri:
41Kuuma mũhĩrĩga wa Asheri maarĩ andũ 41,500.
42Kuuma njiaro-inĩ cia Nafitali:
43Kuuma mũhĩrĩga wa Nafitali maarĩ andũ 53,400.
44Acio nĩo andũ arĩa maatarirwo nĩ Musa na Harũni na atongoria arĩa ikũmi na eerĩ a Isiraeli, o ũmwe wao arũgamĩrĩire nyũmba yake.
45Andũ othe a Isiraeli arĩa maakinyĩtie mĩaka mĩrongo ĩĩrĩ kana makĩria, arĩa mangĩahotire gũthiĩ ita-inĩ, magĩtarwo kũringana na nyũmba ciao.
46Andũ acio othe marĩ hamwe maarĩ 603,550.
47No rĩrĩ, andũ a nyũmba ya mũhĩrĩga wa Lawi matiataranĩirio hamwe na andũ arĩa angĩ a Isiraeli.
48Jehova nĩeerĩte Musa atĩrĩ,
49“Mũtigatare andũ a mũhĩrĩga wa Lawi kana mũmataranĩrie na andũ arĩa angĩ a Isiraeli.
50Handũ ha ũguo-rĩ, amũrai Alawii matuĩke arori a hema ya Ũira, mamenyagĩrĩre indo ciothe ciayo, na kĩndũ o gĩothe kĩa hema ĩyo. Nĩo marĩkuuaga hema ĩyo o na indo ciothe ciayo; na mamĩmenyagĩrĩre na mamĩthiũrũrũkagĩrie na hema ciao.
51Rĩrĩa rĩothe hema ĩyo ĩgũthaamio, Alawii acio nĩo marĩmĩambũraga, na rĩrĩa rĩothe hema ĩyo ĩĩkwambwo-rĩ, Alawii acio nĩo marĩmĩambaga. Mũndũ ũngĩ o na ũrĩkũ angĩkamĩkuhĩrĩria nĩakooragwo.
52Andũ a Isiraeli marĩambaga hema ciao kũringana na ikundi ciao, o mũndũ kambĩ-inĩ yake harĩa bendera yake ĩrĩ.
53No rĩrĩ, Alawii marĩambaga hema ciao mathiũrũrũkĩirie hema ya Ũira nĩgeetha kĩrĩndĩ kĩu kĩa Isiraeli gĩtigakorererwo nĩ mangʼũrĩ ma Ngai. Alawii nĩo marĩĩhokagĩrwo ũmenyereri wa hema ĩyo ya Ũira.”
54Nao andũ a Isiraeli magĩĩka maũndũ macio o ta ũrĩa Jehova aathĩte Musa.