Matayo 7

¹“Sikumuwataguse wanhu wayagwe, avo na mweye sikumutagusigwe na Imulungu.

²Kwavija vimuwatagusa wanhu wayagwe, na mweye motagusigwa vivo. Imulungu kowatendela vivija vimuwatendela wayagwe.

³Habali kolola kibanzi kili mdisiso da ndugu yako, lakini hulola biki dili mdisiso jako?

⁴Hebu kodahaze kumulongela ndugu yako, ‘Chonde leka nikulave kibanzi kili mdisiso jako,’ na kuno gweye mwenyego mdisiso jako mna biki?

⁵Gweye kwa mtapitapi! Tanhu lava biki dili mdisiso jako, abaho kodaha kulola goya na kulava kibanzi kili mdisiso da ndugu yako.

⁶“Sikumuwagwee umbwa vinhu vilavigwe kwa Imulungu, kwavija owahinduka na kuwaluma. Hebu sikumuwapigisile nguluwe lulu zenu, kwavija ozibojoga.

⁷“Puleni, na mweye mogweleligwa, zahileni, na mweye movona, gong'ondeni ulwivi, na mweye movugulilwa.

⁸Kwavija munhu yoyose yompula Imulungu kogweleligwa, na munhu yoyose yozahila kopata, na munhu yoyose yogong'onda ulwivi kovugulilwa.

⁹Vino kuna munhu yoyose kumwenu mweye kamba mwanage yahampula gate komgwaa dibwe?

¹⁰Hebu yahampula somba komgwaa zoka?

¹¹Kamba mweye mmemile nzambi mojuwa kuwagwaa wanenu vinhu vinogile, avo Tataenu yeli kuulanga kowagwaa ng'hani vinhu vinogile wanhu waja ompula.

¹²“Avo watendeleni wayagwe gaja gose gomulonda mweye kutendeligwa, kwavija dino dijo fambulo da Malagizo ga Musa na mafundizo ga watula ndagu wa Imulungu.

¹³“Ingileni kubitila lwivi msisili, kwavija lwivi lwa kwingilila kuna ukupotela lugazi, na nzila ilongoza kuko ibuha, na wanhu wengi obitila nzila ayo.

¹⁴Lakini nzila ilongoza kuugima ni ndodo na sisili, wanhu kidogo awo oyona.

¹⁵“Iteganyeni na watula ndagu wa uvizi. Owezila kwa kukoneka kwa kunze kamba ng'hondolo, lakini mgati mmwao waigala na mbwizi.

¹⁶Mowajuwa kwa sang'hano zao, mkese haudaha kulela fulu na mgude haudaha kulela ngama.

¹⁷Vivija kila biki dinogile dolela matunda ganogile, na biki dihile dolela matunda gehile.

¹⁸Biki dinogile hadilela matunda gehile, na biki dihile hadilela matunda ganogile.

¹⁹Kila biki hadilela matunda ganogile dokanhigwa na kwasigwa muumoto.

²⁰Avo mowajuwa watula ndagu wa uvizi kwa kija kiwosang'hana.

²¹“Siyo kila munhu yong'hema, ‘Mndewa, Mndewa’ kokwingila mna Undewa wa kuulanga, ila waja waiyeka otenda gaja goyolonda Tatangu yeli kuulanga.

²²Siku ya nhaguso yahavika, wanhu wengi onongela, ‘Mndewa, Mndewa! Kwa twaga jako tuwapetela wanhu usenga wa Imulungu, na kwa twaga jako tuwalava wanhu vinyamkela na kutenda unzonza!’

²³Abaho nowalongela, ‘Ka, mweye siwajuwile bule. Segeleni kumwangu, mweye wanhu mutenda gehile!’

²⁴“Munhu yoyose yohulika mbuli zangu na kuzigoga, ayo kaigala na munhu mbala yazengile ng'anda yake mdibwe kulu.

²⁵Mvula itowa, vizanda vimema mazi, beho dibuma na kuitowa ng'anda ija, lakini hailagale bule, kwavija chandusilo chake kizengwa mdibwe.

²⁶“Lakini munhu yoyose yohulika mbuli zangu na kolema kuzigoga, ayo kaigala na munhu mbozi yazengile ng'anda yake mumsanga.

²⁷Mvula itowa, vizanda vimema mazi, beho dibuma na kuitowa ng'anda ija, nayo igwa kwa nguvu.”

²⁸Yesu viyamambukize kulonga avo, lunhu lose lwa wanhu lukanganya kwa mafundizo gake,

²⁹kwavija hafundize kamba wafundiza wao wa Malagizo ga Musa, lakini kafundiza kwa udahi.