1Vizibitile siku sita, Yesu kamsola Petulo na Yakobo na Yohana ndugu yake Yakobo, kachola nao waiyeka kulugongo lutali.
2Viwakalile olola, Yesu kagaluka. Kihanga chake king'ala kamba zuwa, na viwalo vake vikala vizelu chuwee kamba mulenge.
3Baho wanahina waja wadatu wamona Musa na Eliya olonga na Yesu.
4Petulo kamulongela Yesu, “Mndewa, vinoga siye tukale hano! Kamba wahalonda nozenga viheha vidatu, kimoja chako gweye, kimoja cha Musa na kimoja cha Eliya.”
5Viyakalile yang'hali kolonga, wingu ding'alile diwagubika na sauti ilawa mdiwingu ilonga, “Ino ayo Mwanangu inimnogele. Mumtegeleze!”
6Wanahina zake viwahulike vivo, wadumba ng'hani wagwa kingubanguba.
7Yesu kawacholela kawakwasa kawalongela, “Inukeni, sikumudumbe!”
8Viwalolile uchanha, hawamonile munhu ila Yesu yaiyeka.
9Viwakalile ohumuluka kulugongo, Yesu kawazuma, “Sikumumulongele munhu yoyose mbuli zino zimone, mbaka Mwana wa Munhu vonda yazilibuke kulawa kwa wafile.”
10Abaho wanahina wamuuza, “Habali wafundiza Malagizo ga Musa olonga Eliya kolondigwa yeze tanhu?”
11Yesu kawedika, “Kweli, Eliya kokwiza tanhu, nayo kokwiza kutanda kila kinhu.
12Lakini nowalongeleni, Eliya kamala kwiza na wanhu hawamjuwile bule, wamtendela viwalondile. Vivo vonda wamdununze Mwana wa Munhu.”
13Abaho wanahina zake wajuwa kamba Yesu kakala kolonga mbuli ya Yohana Mbatizaji.
14Viwaluvikile lunhu lwa wanhu, munhu imoja kamcholela Yesu, kamfugamila,
15kamulongela, “Go mkulu, monele bazi mwanangu, kana kisango na kogaya ng'hani. Miyanza mingi kogwa muumoto hebu mgamazi.
16Nimgala kwa wanahina zako, lakini hawadahile bule kumuhonya.”
17Yesu kawedika, “Mweye lukolo lwihile na mulibule kutamanila! Ng'hale na mweye mbaka lini? Nogela kitumbe kumgongo mbaka lini? Mgaleni hano imbwanga!”
18Yesu kamkomhokela ikinyamkela, nayo kamulawa mbwanga ayo, bahaja kahona.
19Abaho wanahina zake wamcholela Yesu kinyelegezi wamuuza, “Habali siye hatudahile kumulava ikinyamkela?”
20Yesu kawedika, “Kwavija mutamanila kidogo. Nowalongeleni ukweli, mwahawa na kutamanila kidogo kamba mbeyu ndodo ya haladali, modaha kukilongela kigongo kino, ‘Segela hano uchole haja!’ nacho chochola. Mwahatendile kila kinhu!”
21Kinyamkela kamba ino hadaha kulawa mbaka upule na kufunga kuja.
22Wanahina viwakalile hamoja kuko Galilaya, Yesu kawalongela, “Mwana wa Munhu kogeligwa mmakono ga wanhu,
23nao omkoma, lakini siku da kadatu kozilibuka.”
24Yesu na wanahina zake viwavikile Kapelinaumu, wabokela kodi wa Ng'anda ya Imulungu wamcholela Petulo, wamuuza, “Vino mfundiza wenu kalihaga kodi ya Ng'anda ya Imulungu?”
25Petulo kawedika, “Ona, kalihaga.”
26Petulo kamwidika, “Kwa wanhu baki.”
27Lakini hatulonda kuwagevuza wanhu wano. Avo chola kudilamba tega ndoano. Msole somba yonda yalongole kunamata, mbabazule umulomo na mgati yake kokona sente ya kuliha kodi ya Ng'anda ya Imulungu, yangu niye na gweye. Isole kalihile kodi yetu.”