Walawi 8

¹Mndewa Imulungu kamulongela Musa,

²“Mkeme Haluni na wanage weze hana ulwivi lwa dihema da mting'hano, sola iviwalo, mavuta ga kuwagidila, ng'ombe bigalo wa nhosa ya kusegesa nzambi, ng'hondolo wa kimbigalo wabili na kigelo cha magate hagageligwe hamila.

³Abaho wakeme wanhu wose wa Izilaeli weze hana ulwivi lwa dihema da mting'hano.”

⁴Musa katenda kamba viyalagizwe na Mndewa Imulungu, kawakema wanhu wose wa Izilaeli weze hana ulwivi lwa dihema da mting'hano.

⁵Musa kawalongela wanhu wa Izilaeli, “Gano gago gayalagize Mndewa Imulungu gatendigwe.”

⁶Abaho Musa kawagala kuulongozi Haluni na wanage, kawasunha kwa mazi.

⁷Abaho kamvaza kanzu Haluni, na kadifunga na mkwiji, na kamvaza kanzu diyagwe na kikoti na kakifunga mkwiji ulukigwe goya mkigudi chake.

⁸Abaho keka ikikoba mmhambaga ya Haluni na mgati kagela gamabwe8:8 Kwa Kiebulania gago gamabwe gokemigwaUlimu na Tumimu. gomtenda yajuwe goyolonda Mndewa Imulungu yatende.

⁹Abaho kamvaza Haluni kilemba mdipala, kuulongozi wa kilemba acho keka ulung'andi lwa zahabu, lulagusa kamba heyo kalavigwa kwa Imulungu kamba Mndewa Imulungu viyamulagize.

¹⁰Abaho Musa kasola gamavuta, kadibaka dihema da mting'hano na kavibaka vinhu vose vikalile mgati na kavilava vinhu avo vose kwa Mndewa Imulungu.

¹¹Mavuta gayagwe kagamiza muupango wa nhosa miyanza saba, na vivija kavimizila viya vose visang'haniligwa, dibakuli na mgimbo wake, vose kavilava kwa Mndewa Imulungu.

¹²Vivija Musa kamgidila Haluni gamavuta mdipala ili kumulava kwa Mndewa Imulungu.

¹³Abaho Musa kawasola wanage Haluni kawavaza makanzu na kawafunga mikwiji mvigudi, na kawavaza kofia kamba Mndewa Imulungu viyamulagize.

¹⁴Abaho Musa kamgala ing'ombe wa nhosa ya kusegesa nzambi, na heyo Haluni na wanage weka makono gao mdipala da ng'ombe ayo.

¹⁵Musa kamchinja ng'ombe ayo, kazabika kidole chake mwiidamu, kazibaka zimhembe nne za uupango wa kulavila nhosa na damu isigale kaigida hasi ya dako da upango wa nhosa. Kwa kutenda avo kautenda uupango ung'ale na kaulava kwa Mndewa Imulungu.

¹⁶Abaho kasola mavuta gose gakalile muusapi na hanhu hanogile ha maini na zifigo mbili na mavuta gake, vose kavisoma moto muupango wa nhosa.

¹⁷Lakini nyama ya ing'ombe ayo na ing'hwembe yake na mavi gake, kavisoma moto kunze ya ing'hambi kamba Mndewa Imulungu viyamulagize.

¹⁸Abaho Musa kagala ing'hondolo wa kimbigalo wa nhosa ya kusoma moto. Haluni na wanage weka makono gao mdipala da ng'hondolo ayo.

¹⁹Musa kamchinja ng'hondolo ayo na idamu yake kaimiza mzibanzi zose za upango wa kulavila nhosa.

²⁰Kamkanha vihande vihande ayo ing'hondolo, kavisoma moto hamoja na dipala na mavuta gake.

²¹Musa viyamambukize kusunha uusapi na imigong'ho kwa mazi, kavisoma moto muupango wa nhosa hamoja na ivinhu viyagwe vose va ing'hondolo ayo kamba nhosa ya kusoma moto. Nhosa ayo inung'hila goya na imnogeza Mndewa Imulungu. Musa katenda kamba viyalagizwe na Mndewa Imulungu.

²²Abaho kamgala ng'hondolo iyagwe wa kimbigalo, ili Haluni na wanage walavigwe kwa Mndewa Imulungu. Haluni na wanage weka makono gao mdipala da ng'hondolo ayo.

²³Musa kamchinja ng'hondolo ayo na kasola idamu kambaka Haluni kumgwazo wa gwiti jake da mkono wa kudila, vivija kambaka idamu mdidole ng'hulu da mkono wa kudila na mdidole ng'hulu da mgulu wa kudila.

²⁴Vivija kawabaka idamu iwana wa Haluni kumgwazo wa magwiti gao ga mkono wa kudila, na imidole ng'hulu ya makono gao ga kudila na imidole ng'hulu ya magulu gao ga ukudila. Damu iyagwe kaimiza mzibanzi zose za upango wa kulavila nhosa.

²⁵Vivija kasola mavuta gose na mavuta geli mumkila, na mavuta gose geli muusapi na hanhu hanogile ha maini na zifigo mbili na mavuta gake na ikihili cha mgulu wa kudila wa ayo ing'hondolo.

²⁶Abaho kulawa mkigelo cha magate kikigwe kuulongozi wa Mndewa Imulungu, kalava gate dimoja hadigeligwe hamila, na gate dimoja dili na mavuta na kigate kimoja kisisili, vose kavika uchanha ya gamavuta na ikihili.

²⁷Musa kawagwaa vinhu avo vose Haluni na wanage, na wavinula uchanha kamba kilaguso cha kumulavila Mndewa Imulungu.

²⁸Abaho Musa kavisola mmakono gao vinhu avo vose na kavisoma moto muupango wa nhosa hamoja na inhosa. Ino ayo nhosa ya kuwalava wanhu kwa Mndewa Imulungu wawe walava nhosa, nhosa inung'hila goya na imnogeza Mndewa Imulungu, ino ayo nhosa ilavagwa kwa moto.

²⁹Abaho Musa kasola ikidali kakinula uchanha kamba kilaguso cha kumulavila Mndewa Imulungu. Hanhu ha nyama ayo ya ing'hondolo wa nhosa ya kuwalava wanhu kwa Mndewa Imulungu, mwenyego Musa kamba vija Mndewa Imulungu viyalagize.

³⁰Abaho Musa kasola gamavuta gang'alile na idamu kulawa muupango wa nhosa, kawamizila Haluni na wanage vivija kavimizila iviwalo vao. Avo Musa kawalava Haluni na wanage na iviwalo vao kwa Mndewa Imulungu.

³¹Musa kamulongela Haluni na wanage, “Telekeni nyama ino aho hana ulwivi lwa dihema da mting'hano na muije yose aho hamoja na gate dili mkigelo cha nhosa za kuwalava wanhu kwa Mndewa Imulungu, tendeni kamba Mndewa Imulungu viyanilagize, kamba vinhu avo vodigwa na Haluni na wanage.

³²Someni moto gate jojose donda disigale hebu nyama yonda isigale.

³³Sikumulawe kunze ya dihema da mting'hano kwa siku zose saba, mbaka zimale siku zenu za kulavigwa kwa Mndewa Imulungu.

³⁴Mndewa Imulungu katulagiza tuwatendele kamba vitutenda sambi ili nzambi zenu ziloholigwe.”

³⁵Mukale hano hana ulwivi lwa dihema da mting'hano imisi na ikilo kwa siku saba, mwahalema mofa. Vivo viyanilagize Mndewa Imulungu.

³⁶Avo, Haluni na wanage watenda kila kinhu kamba Musa viyalagizwe na Mndewa Imulungu.