1“ ‘Kamba munhu kogala nhosa ya kugala kuilumba, na heyo kolava ng'ombe kulawa mkibumbila chake, ng'ombe ayo yawe mtwanzi hebu mbigalo. Yamgale kuulongozi wa Mndewa Imulungu mnyama yelibule kilema chochose.
2Munhu ayo yeke mkono wake mdipala da mnyama ayo na yamchinje hana ulwivi lwa dihema da mting'hano. Abaho awo iwalava nhosa weli ulelo wa Haluni waimizile idamu banzi zose za upango wa nhosa.
3Mavuta gose geli muusapi wa mnyama ayo galavigwe nhosa ya kugala kuilumba na gasomigwe moto kamba nhosa ilavagwa kwa Imulungu kwa moto.
4Vivija yalave zifigo mbili na mavuta gake na mavuta gose gagogeleze zifigo na hanhu hanogile ha maini.
5Iwalava nhosa weli ulelo wa Haluni wavisome moto hamoja na nhosa ili mzingodi zikwaka muupango, nhosa ayo ya kusoma moto yolava mnung'ho umnogeza Mndewa Imulungu.
6“ ‘Kamba nhosa ayo ya kugala kuilumba yuumgalila Mndewa Imulungu yolawa mkibumbila cha fugo yako ya ng'hondolo hebu mbuzi, avo yasaguligwe mnyama wa kimbigalo hebu wa kitwanzi yelibule kilema chochose.
7Kamba munhu kogala nhosa ya bofu da ng'hondolo, kolondigwa yadilave kuulongozi wa Mndewa Imulungu,
8na yeke mkono wake mdipala da ng'hondolo ayo na yamchinje kuulongozi wa dihema da mting'hano. Abaho iwalava nhosa weli ulelo wa Haluni waimizile idamu banzi zose za upango wa kulavila nhosa.
9Avo mwiinhosa ayo ilavigwa kwa Mndewa Imulungu kwa moto, yalave vinhu vino kulawa kwa ng'hondolo ayo, mavuta gake, mkila uli na mavuta ukanhigwe behi na mgongo sango, mavuta gose gagubike usapi na gaja geli muusapi,
10vivija yalave zifigo mbili na mavuta gake na mavuta gose gagogeleze zifigo na hanhu hanogile ha maini.
11Mulava nhosa yavisome moto vinhu avo vose muupango wa kulavila nhosa kamba nhosa ilavagwa kwa Mndewa Imulungu kwa moto.
12“ ‘Kamba nhosa yake ni mbuzi, yamgale kuulongozi wa Mndewa Imulungu,
13yeke mkono wake mdipala da mbuzi ayo na yamchinjile kuulongozi wa dihema da mting'hano. Abaho iwalava nhosa weli ulelo wa Haluni waimizile idamu banzi zose za upango wa kulavila nhosa.
14Mna inhosa ilavigwa kwa Mndewa Imulungu kwa moto, yalave mavuta gose geli muusapi wa mbuzi ayo,
15vivija yalave zifigo mbili na mavuta gake na mavuta gose gagogeleze zifigo na hanhu hanogile ha maini.
16Mulava nhosa yavisome moto vinhu avo vose muupango wa kulavila nhosa kamba nhosa ilavagwa kwa moto, nhosa ayo yolava mnung'ho umnogeza Mndewa Imulungu. Mavuta gose ga imnyama mwenyego Mndewa.
17Digogeni lagizo dino siku zose, mweye na ulelo wenu, kokose konda mukale sikumuje mavuta hebu damu.’ ”