1Mndewa Imulungu kamulongela Yoshua, “Sikuudumbe na sikuunyawenyawe. Wasole iwanhu oitowaga kuing'hondo uchole nao kudibuga da Ai. Lola nimgela mmakono gako imndewa wa Ai na iwanhu zake na buga jake na isi yake yose.
2Ditendeleni buga da Ai na mndewa wake kamba vimuditendele buga da Yeliko na mndewa wake, lakini vinhu vake hamoja na fugo yake vonda musole vokuwa venu. Choleni mukaifise ili mudivamile buga dijo kubitila kukisogo.”
3Avo Yoshua na iwanhu oitowaga kuing'hondo wasegela wachola kudibuga da Ai. Yoshua kasagula iwanhu weli magalu elufu selasini na kawatuma ikilo.
4Kawalagiza, “Mweye muifise ili mudivamile dibuga kubitila umwambu wa kukisogo. Sikumuchole kutali na dibuga lakini muitande.
5Niye hamoja na wanhu wose weli na niye todicholela dibuga. Waheza kuitowa na siye kamba viwatendile aho haichanduso, siye towakimbila.
6Na hewo otukweleleza mbaka vonda wawe kutali na buga jao. Kwavija olonga, ‘Hewo otukimbila kamba aho haichanduso.’ Siye towaleka watukimbize.
7Baho mweye molawilila na kudivamila dibuga, kwavija Mndewa Imulungu, Imulungu wenu, kowagwaa buga dijo.
8Bahaja vonda mudisole dibuga mudisome moto. Mutende kamba Mndewa Imulungu viyalongile. Loleni niye niwalagiza.”
9Avo Yoshua kawatuma na hewo wachola ihanhu ha kuifisa na wakala hagati ya Beseli na Ai, mwambu wa kudihongela zuwa wa Ai, lakini Yoshua kakala kilo acho hamoja na iwanhu.
10Yoshua kaidamuka imitootondo ng'hani, kawating'haniza iwanhu abaho kachola kudibuga da Ai, heyo na iwavele wa Izilaeli walongola kuulongozi wa iwanhu.
11Iwanhu wose oitowaga kuna ing'hondo wakalile hamoja na heyo wachola mbaka behi ya dibuga na weka ng'hambi mwambu wa kasikazini wa buga da Ai, aho kukala na bonde hagati yao na buga da Ai.
12Abaho kawasola wanhu kamba elufu tano na kaweka waifise hagati ya Beseli na Ai wadivamile dibuga mwambu wa kudihongela zuwa.
13Avo kaweka iwanhu awo, iwakalizi wengi wakala mwambu wa kasikazini wa dibuga, na waja wasigale kaweka umwambu wa kudihongela zuwa, Yoshua kachola kubonde ikilo acho.
14Mndewa wa buga da Ai viyonile avo, heyo na iwanhu zake na iwanhu wa dibuga, walopola wachola hana ihanhu hakuitowa mwambu wa Alaba wakaitowe na Waizilaeli. Lakini hajuwile bule kamba kukala na wanhu waifisile umwambu wa kukisogo wa dibuga.
15Abaho Yoshua na iwanhu wa Izilaeli waitenda kamba watoigwa na walemelwa na okimbilila umwambu wa kuluwala.
16Wanhu wose wakalile kudibuga wakemigwa wawakweleleze Waizilaeli, na viwakalile omkweleleza Yoshua wachola kutali na buga jao.
17Kuduhu mbigalo yasigale kudibuga da Ai hebu Beseli yalekile kuwakweleleza iwanhu wa Izilaeli. Wadileka dibuga na hawadihindile bule hewo wawakweleleza Waizilaeli.
18Abaho Mndewa Imulungu kamulongela Yoshua, “Lozela mgoha wako kudibuga da Ai, kwavija nodigela mmakono gako.” Avo Yoshua kaulozela mgoha wake kudibuga da Ai.
19Bahaja Yoshua viyaulozele mgoha wake kudibuga da Ai, bumbila dikalile diifisile dilawilila na dikimbila dingila mdibuga wadisola dibuga na walopola kudisoma moto.
20Wanhu wa Ai viwalolile kukisogo chao, wajona yosi dolawa kudibuga dokwela uchanha kuulanga. Nao hawadahile kukimbila mwambu uno hebu uja, kwavija Waizilaeli wawahindukila waja wakalile owakweleleza.
21Avo Yoshua na Waizilaeli wose viwonile dibumbila dikalile diifisile wadisola dibuga, na diyosi dikwela uchanha, wahinduka na wasonga kuwakoma iwanhu wa Ai.
22Wanhu wayagwe kulawa kudibuga wawezila, avo wakala hagati ya iwanhu wa Izilaeli, wayagwe mwambu uno na wayagwe mwambu uja. Waizilaeli wawakoma wose na kuduhu munhu yasigale hebu yatoloke.
23Lakini wamgoga imndewa wa Ai kuno yang'hali mgima wamgala kwa Yoshua.
24Waizilaeli viwamambukize kuwakoma iwanhu wose wa buga da Ai ako kuluwala kuwawakweleleze wabwela mgati kudibuga da Ai na kuwakoma wose wakalile mumo.
25Iwanhu wose kwa wose wakomigwe kudibuga da Ai siku dijo, wambigalo na watwanzi wakala elufu kumi na mbili.
26Yoshua hauhumuluse mkono wake ugogile umgoha uyaulozele kudibuga da Ai mbaka viwakomigwe wanhu wose wakalile mdibuga dijo.
27Lakini Waizilaeli wavisola vinhu vose na zifugo kulawa kudibuga dijo, kamba Mndewa Imulungu viyamulagize Yoshua.
28Avo Yoshua kadisoma moto dibuga da Ai na kaditenda vihame siku zose na vivo ili mbaka lelo.
29Abaho kamuwamba imndewa wa buga da Ai mdibiki mbaka ichungulo. Zuwa vidingile Yoshua kalagiza waluhumuluse hasi ulukuli kulawa mdibiki na walutupe hana ulwivi lwa dibuga abaho walundize lundo kulu da mibwe uchanha yake, lundo dijo ding'hali kuko mbaka lelo.
30Kipindi acho Yoshua kamzengela upango wa nhosa Mndewa Imulungu, Imulungu wa Izilaeli ako kulugongo lwa Ebali,
31kamba Musa msang'hanaji wa Mndewa Imulungu viyawalagize iwanhu wa Izilaeli, na kamba viyandikigwe mkitabu cha malagizo ga Musa, “Upango wa mabwe hagasongoligwe, hebu kukwasigwa na kinhu chochose cha zuma.” Na wamulavila Mndewa Imulungu uchanha ya upango awo nhosa za kusoma moto na nhosa za kugala kuilumba.
32Na baho mgameso ga Waizilaeli wose Yoshua kandika mgamabwe ukwiga gamalagizo ga Musa, gayandike.
33Waizilaeli wose, iwanhu baki na iwenekae na iwavele wao na vilongozi na iwasemi wema mwambu kwa mwambu wa disanduku na Iwalawi, iwalava nhosa wadipapile disanduku da lagano da Mndewa Imulungu, nusu wema kuulongozi wa lugongo lwa Gelizimu na nusu wema kuulongozi wa lugongo lwa Ebali kamba Musa imsang'hanaji wa Mndewa Imulungu viyalagize aho haichanduso mbuli ya kuwatambikila Waizilaeli.
34Abaho Yoshua kawasomela mbuli zose za gamalagizo, mbuli za kutambikila na mbuli za kuduwila kamba viyandikigwe mkitabu cha malagizo.
35Kuduhu mbuli yoyose Yoshua iyalagizwe na Musa kaleka kuisoma kuulongozi wa mting'hano wose wa Izilaeli, na kuulongozi wa iwatwanzi na iwana na iwanhu baki wakalile hagati yao.