1Yoshua kaidamuka imitondo hamoja na Waizilaeli, wose wasonga mwanza wa kusegela Shitimu. Viwavikile kulwanda lwa Yolidani, weka ng'hambi aho, wang'hali hawanaloka.
2Vizibitile siku ndatu, vilongozi wabita hagati ya ing'hambi,
3wawalongela iwanhu, “Mwahajona sanduku da lagano da Mndewa Imulungu, Imulungu wenu, dipapigwa na Walawi, iwalava nhosa, baho musonge kusegela na mudikweleleze,
4ili muijuwe inzila yonda mubite kwavija hamnaibita bule nzila ino. Lakini sikumudikwesele behi avo kulawa disanduku kudili na mweye hawe na utali wa kilometa imoja.”
5Yoshua kawalongela iwanhu, “Muihunge kwavija mayo Mndewa Imulungu kotenda unzonza hagati yenu.”
6Abaho Yoshua kawalongela iwalava nhosa, “Dipapeni disanduku da lagano, na mulongole najo kuulongozi wa iwanhu.” Avo wadipapa disanduku da lagano na walongola kuulongozi wa iwanhu.
7Abaho Mndewa Imulungu kamulongela Yoshua, “Lelo nosonga kukwinula mgameso ga Waizilaeli ili wajuwe kamba nokuwa hamoja na gweye kamba vinikalile hamoja na Musa.
8Avo gweye uwalagize iwalava nhosa odipapa disanduku da lagano, ‘Vonda muvike mwiingema ya lwanda lwa Yolidani, mwime aho mgamazi.’”
9Avo Yoshua kawalongela iwanhu wa Izilaeli, “Kweseni behi mutegeleze mbuli ziyolonga Mndewa Imulungu, Imulungu wenu.”
10Yoshua kawalongela, “Sambi mojuwa kamba Imulungu yeli mgima ka hagati yenu na heyo halemelwa kinhu, kowaswaswanya mgameso genu Wakanaani na Wahiti na Wahivi na Wapelizi na Wagiligashi na Waamoli na Wayebusi.
11Loleni sanduku da lagano da Mndewa Imulungu wa isi yose, dobita kuulongozi wenu kuchola mgati kulwanda lwa Yolidani.
12Avo saguleni wanhu longo na wabili kulawa mna gamakabila ga Izilaeli, kila kabila munhu imoja.
13Kipindi magulu ga iwalava nhosa wadipapile disanduku da lagano da Mndewa Imulungu, Mndewa wa isi yose, gahakanyaga gamazi ga lwanda lwa Yolidani, gamazi ga lwanda lwa Yolidani goleka kukilima na gamazi gokilima kulawa mwambu wa uchanha goilundiza hamoja.”
14Avo, wanhu wasegela kuna izing'hambi ili wachole kuloka ulwanda lwa Yolidani, na iwalava nhosa wadipapile disanduku da lagano walongola kuulongozi wa iwanhu.
15Kipindi cha kusenga lwanda lwa Yolidani lumemaga mazi mbaka mzingema. Avo aho awo iwalava nhosa wadipapile disanduku da lagano viwavikile Yolidani, na magulu gao vigakanyage gamazi geli mwiingema,
16gamazi gakalile gokilima kulawa mwambu wa uchanha gema na gailundiza hamoja kutali ako Adamu, dibuga dili behi na Saletani, na mazi gaja gokilimila kulongoza ibahali ya Alaba, Ibahali ya Mkele, gasegela gose. Iwanhu waloka umwambu uilola na buga da Yeliko.
17Avo iwalava nhosa wakalile odipapa disanduku da lagano da Mndewa Imulungu wema wima mna iisi inyalile hagati ya ulwanda lwa Yolidani, na Waizilaeli wose waloka mna iisi inyalile mbaka iwanhu wose viwamambukize kuloka ulwanda lwa Yolidani.