1Avo Yoshua kakala na miyaka mingi na kakala mvele avo Mndewa Imulungu kamulongela, “Gweye sambi kuna miyaka mingi na kwa mvele, na zisigala isi nyingi zing'hali hazinasoligwa.
2Isi azo izo zino, isi yose ya Wafilisiti na isi yose ya Wageshuli,
3ndio kulonga isi ijuwigwa kamba ya Wakanaani, kusongela lwanda lwa Shiholi kuna umwambu wa kudilawila zuwa wa Misili mbaka isi ya Ekiloni ako kasikazini. Isi yose kowotawala awo iwakulu watano wa Wafilisiti, Gaza na Ashidodi na Ashikeloni na Giti na Ekiloni, na vivija Waavi watawala,
4mwambu wa kusini. Vivija isi ya Wakanaani kusongela Meala ya Wasidoni mbaka Afeka kuna imbaka ya Waamoli,
5na isi ya Wagebali na isi yose ya Lebanoni mwambu wa kudilawila zuwa, kulawa Baali Gadi hasi ya lugongo lwa Helimoni mbaka Lebo Hamati.
6Vivija isi ya iwanhu okala kuvigongo kulawa Lebanoni mbaka Misilefoti Maimu, kuwakalile Wasidoni. Niye mwenyego nowawinga hewo kuulongozi wa iwanhu wa Izilaeli, lakini gweye uwagolele Waizilaeli isi ayo iwe kamba uhazi wao, kamba vinikulagize.
7Avo uigole isi ayo kamba uhazi kwa makabila tisa, na nusu ya kabila da Manase.”
8Makabila ga Lubeni na Gadi na nusu iyagwe ya kabila da Manase, awo wagweleligwa na Musa isi yao kamba uhazi ako umwambu wa kudilawila zuwa wa lwanda lwa Yolidani kamba Musa imsang'hanaji wa Mndewa Imulungu viyawagwelele.
9Isi yao ikala kusongela Aloeli kumgwazo wa bonde da Alinoni na dibuga dili hagati ha konde na isi yose ya kudibawe kulawa Medeba mbaka Diboni,
10na gamabuga gose ga Sihoni imndewa wa Waamoli yatawale ako Heshiboni mbaka kuna imbaka ya Waamoni,
11na isi ya Gileadi na isi ya Wageshuli na isi ya Wamaaka na ulugongo lwa Helimoni na isi yose ya Bashani mbaka Saleka,
12na undewa wose wa Ogu, ayo yakalile yotawala ako Ashitaloti na Edilei ako Bashani, Ogu yaiyeka ayo yasigale mna Iwalefai. Musa kawahuma awo wose na kawawinga.
13Iwanhu wa Izilaeli hawawawingile bule Wageshuli hebu Wamaaka lakini Wageshuli na Wamaaka wakala hagati ya Waizilaeli mbaka lelo.
14Musa hawagwelele bule isi yoyose kamba uhazi wao iwanhu wa kabila da Lawi. Lakini zinhosa zilavagwa kwa kusoma moto kwa Mndewa Imulungu, Imulungu wa Izilaeli, azo uhazi wao, kamba Mndewa Imulungu viyamulongele Musa.
15Musa kawagwaa uhazi iwanhu wa kabila da Lubeni kamba viweli mzing'holo zao.
16Isi yao ikala kusongela Aloeli, ayo ikalile kumgwazo wa bonde da Alinoni, na buga dikalile hagati ya bonde na bawe jose dili behi na Medeba,
17na isi ya Heshiboni na mabuga gose geli kudibawe, Diboni na Bamoti Baali na Beti Baali Meoni,
18na Yahasa na Kedemoti na Mefaati,
19na Kiliataimu na Sibima na Seleti Shahali kulugongo lwa kubonde,
20na Beti Peoli na umtelemuko wa Pisiga na Beti Yeshimoti.
21Vivija na mabuga gose ga kudibawe, na undewa wose wa Sihoni imndewa wa Waamoli yakalile yotawala ako Heshiboni, Musa kakala yamuhumile Sihoni na ivilongozi watawale Midiani, wakalile Evi na Lekemu na Suli na Huli na Leba, awo watawala hanhu ha mndewa Sihoni.
22Vivija Waizilaeli wamkoma mna ing'hondo Balaamu mwanage Beoli, ayo yakalile yolagula.
23Imbaka ya isi ya iwanhu wa kabila da Lubeni ikala ulwanda lwa Yolidani. Gago gamabuga na ivijiji awo ukalile uhazi wa iwanhu wa kabila da Lubeni kamba viweli mzing'holo zao.
24Vivija Musa kawagwelela isi kamba uhazi kwa iwanhu wa kabila da Gadi kamba viweli mzing'holo zao.
25Isi yao ikala Yazeli, na mabuga gose ga Gileadi na nusu ya isi ya Waamoni mbaka Aloeli ili umwambu wa kudilawila zuwa wa Laba,
26na kulawa Heshiboni mbaka Lamati Misipa na Betonimu na kulawa Mahanaimu mbaka kuna imbaka ya Debili,
27na kubonde da Beti Halamu na Beti Nimula na Sukoti na Safoni na isi isigale ikalile ya Sihoni imndewa wa Heshiboni, imbaka yake ikala ulwanda lwa Yolidani mbaka kuihelela ibahali ya Kineleti.
28Gago gamabuga na ivijiji, awo ukalile uhazi wa iwanhu wa kabila da Gadi kamba viweli mzing'holo zao.
29Musa kawagwaa uhazi nusu ya kabila da Manase. Kawagwelela nusu ya iwanhu wa kabila da Manase kamba viweli mzing'holo zao.
30Isi yao ikala kulawa Mahanaimu mbaka isi yose ya Bashani na undewa wose wa Ogu imndewa wa Bashani, na mabuga gose malongo sita ga Yaili, gakalile ako Bashani,
31na nusu ya Gileadi na Ashitaloti na Edilei na mabuga gose ga undewa wa Ogu ako Bashani. Isi ayo wagweleligwa nusu ya iwanhu wa ulelo wa Makili mwanage Manase kamba viweli mzing'holo zao.
32Awo uwo uhazi uwagolile Musa ako kudibawe da Moabu, mwambu wa kudilawila zuwa wa lwanda lwa Yolidani uilola na buga da Yeliko dikalile umwambu wa ulwanda.
33Lakini kwa iwanhu wa kabila da Lawi Musa hawagwelele isi yoyose kamba uhazi wao. Mndewa Imulungu, Imulungu wa Izilaeli ayo uhazi wao kamba viyawalongele.