1Mndewa Imulungu kamulongela Musa, “Izoni kumwangu gweye na Haluni na Nadabu na Abihu hamoja na wavele wa Izilaeli malongo saba, na mnitambikile kwa kutali.
2Gweye Musa wiiyeka ayo yonda wize behi yangu, lakini wayagwe sikuweze behi yangu na wanhu sikuwakwele kulugongo hamoja na gweye.”
3Musa kachola kuwalongela wanhu wose mbuli ziyalongeligwe na ziyalagizwe. Wanhu wose wedika, “Tosang'hana kila kinhu kiyatulongele Mndewa Imulungu.”
4Musa kandika mbuli zose ziyalagizwe na Mndewa Imulungu. Imitondo yake kazenga upango wa kulavila nhosa hasi ya ulugongo na kasimika mabwe longo na mbili, kamba vigeli makabila longo na mabili ga Izilaeli.
5Abaho kawatuma wabwanga longo wa Izilaeli wamulavile Mndewa Imulungu nhosa za kusoma moto na nhosa za ng'ombe wambigalo kamba nhosa za kugala kuilumba.
6Musa kasola nusu ya damu ya awo iwanyama kaigida mdibakuli, na iyagwe kaimizila muupango wa kulavila nhosa.
7Abaho kasola ikitabu cha lagano da Mndewa Imulungu, kawasomela wanhu kuulongozi wao, nao walonga, “Totenda kila kinhu kiyatulagize Mndewa.”
8Musa kasola ija idamu ikalile mdibakuli kawamizila wanhu kuno kolonga, “Ino ayo damu ya lagano diyatendile Mndewa Imulungu na mweye viyawagwelele malagizo gano.”
9Abaho Musa na Haluni na Nadabu na Abihu na wavele malongo saba wa Waizilaeli wakwela kulugongo,
10na wamona Imulungu wa Izilaeli. Hasi ya magulu gake honeka kamba sakafu ya mabwe gokwaka, ikala buluu kamba ulanga.
11Imulungu hawalumize bule vilongozi awo wa wanhu wa Izilaeli, wamona Imulungu na waja na kung'wa.
12Mndewa Imulungu kamulongela Musa, “Izo kumwangu uchanha kulugongo, ukale hano, nokugwelela vibao vibili va mabwe mumo nyandika malagizo na gaja golondigwa ili gawafunze Waizilaeli.”
13Musa kasegela na mtazaji wake Yoshua, Musa kakwela kulugongo lwa Imulungu.
14Musa kawalongela waja iwavele, “Tubeteni hano mbaka vonda tubwele. Haluni na Huli wabaha hamoja na mweye, munhu yoyose yahawa na mbuli yomgaza yawacholele hewo.”
15Avo, Musa kakwela kulugongo lwa Sinai, na wingu diugubika ulugongo,
16na ukulu wa Mndewa Imulungu ukala uchanha ya ulugongo lwa Sinai. Wingu diugubika ulugongo kwa siku sita, na siku da saba Mndewa kamkema Musa kulawa kudiwingu dijo.
17Ukulu wa Mndewa Imulungu oneka kwa wanhu wa Izilaeli kamba moto okwaka uchanha ya ulugongo.
18Musa kengila mgati ya dija diwingu, viyakalile kokwela kulugongo. Kakala kuko siku malongo mane imisi na ikilo.