1Musa kagendelela kulonga, “Ago gose gahawapata, ukumweda na makungu, ganiwekileni kuulongozi wenu, na mwahagakumbuka mmizoyo yenu mna iziisi azo zonda yawapwililisile Mndewa Imulungu, Imulungu wenu,
2na mombwelela Mndewa Imulungu, Imulungu wenu, mweye na wanenu, na kugoga gose ganiwalagize lelo kwa mizoyo yenu yose na kwa loho zenu zose,
3baho Mndewa Imulungu, Imulungu wenu kowabwezela gaja gose ganogile na kowonela bazi na koweka hamoja kulawa mziisi zose ziyawapwililisile.
4Na hata kamba mupwililika mna ziisi za kutali, Mndewa Imulungu, Imulungu wenu, koweka hamoja na kowabweza.
5Mndewa Imulungu, Imulungu wenu, kowagala mna iisi iwaisolile iwahenga zenu, na mweye moisola isi ayo, na kowatendela ganogile ng'hani na mokuwa wanhu wengi ng'hani kubanza iwahenga zenu.
6Mndewa Imulungu, Imulungu wenu koikosha mizoyo yenu30:6 Kwa Kiebulania olonga, Mndewa Imulungu, Imulungu wenu koingiza kumbi mizoyo yenu. na mizoyo ya ulelo wenu, ili mumnogele Mndewa Imulungu, Imulungu wenu kwa mizoyo yenu yose na kwa loho zenu zose avo muwe wagima.
7Mndewa Imulungu, Imulungu wenu kowakutulila makungu gano gose iwanhu owehila, awo wawadununze.
8Na mweye momtegeleza Mndewa Imulungu na kugoga malagizo gake gose goniwalagiza lelo.
9Mndewa Imulungu, Imulungu wenu kowatendela ganogile mna ikila kinhu kimtenda, mokuwa na wana wengi na ng'ombe wengi na migunda yenu yolela ndiya nyingi. Kwavija Mndewa Imulungu konogelwa kabili kuwatendela ganogile kamba viyanogelwe kuwatendela ganogile iwahenga zenu,
10kamba mwahamtegeleza Mndewa Imulungu, Imulungu wenu na kugoga malagizo na mafundizo gandikigwe mna ikitabu cha malagizo na kumbwelela Mndewa Imulungu, Imulungu wenu kwa mizoyo yenu yose na kwa loho zenu zose.
11“Malagizo goniwagwaa lelo si madala bule kumwenu, na hageli kutali na mweye.
12Hagali kuulanga mbaka mulonge, ‘Nani yonda yakwele kuulanga yatugalile ili tugategeleze na tugagoge?’
13Vivija hagali umwambu wa bahali mbaka mulonge, ‘Nani yonda yaloke ibahali yatugalile ili tugategeleze na tugagoge?’
14Aka, imbuli ya behi yenu, ya mmilomo yenu na mmizoyo yenu ili muigoge.
15“Loleni lelo niwekila kuulongozi wenu, ugima na ganogile, ifa na gehile.
16Kamba mwahagagoga malagizo ga Mndewa Imulungu, Imulungu wenu, goniwalagiza lelo, kwa kumnogela Mndewa Imulungu, Imulungu wenu, kwa kukweleleza nzila zake na kugoga malagizo gake na mafundizo gake na gaja golondigwa, avo mokuwa wagima na mokongezeka na Mndewa Imulungu, Imulungu wenu, kowatendela ganogile mwiisi imukwingila kuisola.
17Lakini mwahahinduka na kulema kumtegeleza, na mwahakwegigwa kuitambikila imilungu iyagwe na kuisang'hanila,
18niye nowalongela lelo kamba mokomigwa. Honda mukale kwa siku nyingi mna iisi yumuchola kuisola, umwambu wa lwanda lwa Yolidani.
19Lelo noukema ulanga na isi viwalole mweye, kamba niwekila kuulongozi wenu ugima na ifa, kumweda na makungu. Avo saguleni ugima, mweye na ulelo wenu ili mukale wagima,
20mumnogele Mndewa Imulungu, Imulungu wenu, na mumtegeleze na mumgoge heyo. Kwavija heyo ayo ugima wenu na heyo ayo yowagwaa siku nyingi za kukala wagima, ili mukale mwiisi Mndewa Imulungu iyaiduwile kuwagwaa iwahenga zenu, Abulahamu na Isaka na Yakobo.”