1Kukimambukizo, ndugu, tupulileni kwa Imulungu ili usenga wa Mndewa wenele himahima na ubokeligwe goya kamba vija viikalile kumwenu.
2Vivija tupulileni kwa Imulungu yatukombole kulawa mmakono ga wanhu wehile, kwavija siyo kila munhu kotogola usenga uno.
3Lakini Mndewa kotamaniligwa, kowagangamiza mizoyo yenu na kowahonya kulawa mmakono ga ija Imdumuka.
4Na Mndewa kotutenda tutamanile kuwa mogagoga gaja gatuwafunzile na mogendelela kutenda vivo.
5Mndewa yailongoze mizoyo yenu kuujuwa unogelwa wa Imulungu na kufunga umoyo kugaligwe na Kilisito.
6Ndugu zangu, kwa twaga da Mndewa wetu Yesu Kilisito tomulagizani muinege na wanhu wose wamtogole Yesu kuno wanyeke na hawalonda kugagoga gaja gatuwafunzile.
7Mweye wenyego mujuwa goya kuwa molondigwa kusang'hana kamba siye. Siye vitukalile na mweye hatukalile wanyeke bule,
8na hatudile ndiya ya munhu yoyose bila kumuliha, lakini tugaya kusang'hana imisi na ikilo ili sikutuwe mizigo kwa munhu yoyose kumwenu.
9Tutenda vino siyo kwavija hatulondigwa kutazigwa na mweye, ila tutenda vivo kamba kilaguso kumwenu, mutukweleleze.
10Vitukalile na mweye tukala tuwalongeleni, “Munhu yoyose yolema kusang'hana sikuyaje.”
11Tolonga vino kwavija tuhulika kamba kuna wanhu wayagwe hagati yenu wanyeke, hawatenda kinhu chochose ila oigela mzisang'hano za wanhu wayagwe.
12Kwa twaga da Mndewa Yesu Kilisito towalagiza wanhu awo na kuwazuma wakale kamba viilondigwa na wasang'hane wapate ndiya yao wenyego.
13Lakini mweye ndugu, sikumudonhe kutenda ganogile.
14Yodaha kuwa, ako kuna munhu yonda yaleke kuugoga usenga uno unyandike, yahawa kuko, muloleni goya munhu ayo na sikumuilumbe nayo, ili yagwe kinyala.
15Lakini sikumumtende munhu ayo kamba munhu yawehile, ila mumzume kamba miyenu.
16Mndewa mwenyego yogala tindiwalo, yawagwelele tindiwalo kipindi chose kwa nzila zose. Mndewa yakale na mweye mose.
17Niye Paulo nowalamusa, kwa mkono wangu mwenyego nokwandika vino, vino avo nikaga kilaguso mzibaluwa, vivo nyandikaga.
18Ng'hekewa ya Mndewa wetu Yesu Kilisito ikale na mweye mose.