1Kumbuka kuwa mna zisiku za kimambukizo kokuwa na magayo makulu.
2Wanhu okuwa na gahigahi, okuwa na magoda, oitapa, ozinogela sente, omuliga Imulungu, honda wawategeleze tata zao na mama zao, wabule asente, hawamgesa Imulungu.
3Wanhu hawanogela wayagwe, wanhu hawalonda kuilumba, wanhu owalonga wayagwe vihile, wanhu watatali, wanhu wakali, wanhu hawalonda ganogile.
4Wanhu oihinduka, wanhu otenda mbuli bila kugesa, wanhu omema bezi, wanhu ounogela ugima uno kubanza kumnogela Imulungu.
5Kwa kunze okoneka kamba omtambikila Imulungu, lakini oulema udahi wake. Muinege na wanhu kamba awo.
6Wanhu awo wayagwe ochola mzing'anda za wanhu na kuwananahiza wawategeleze watwanzi onyolila na wapapile mizigo mikulu ya nzambi, watwanzi awo olongozigwa na kusulukila kwihile.
7Watwanzi awo ogeza kuifunza siku zose, lakini hawadaha ng'o kuujuwa ukweli.
8Wanhu awo oulema ukweli kamba vija Yane na Yambule viwamulemile Musa. Wanhu awo ougula utamu wa nzewele, na wabule kutamanila kwa ukweli.
9Lakini honda wagendelele kumwande kwavija ubozi wao okoneka na wanhu wose. Vivo viikalile kwa Yane na Yambule.
10Lakini gweye Timoseo, kugagoga mafundizo gangu na kukweleleza vija vinhendile, na vija vinondile muugima wangu, kukona kutamanila kwangu, kufunga umoyo kwangu unogelwa wangu na kubetela kwangu,
11madununzo gangu na magayo gangu. Kugajuwa gose gandawilile ako Antiokia na Ikonia na Lusitila, magayo makulu ganifungile umoyo. Lakini Mndewa kamhonya nago.
12Munhu yoyose yolonda kukala na ugima umnogeza Imulungu kwa kuilumba na Yesu Kilisito kodununzigwa.
13Wanhu otenda gehile na wavizi obanza kutenda gehile ng'hani, kuwavizila wayagwe na wao wenyego oviziligwa.
14Lakini gweye gendelela mna uukweli uufundizigwe na gendelela kutogola ng'hani. Kuwajuwa waja iwakalile wafundiza wako.
15Na gweye kojuwa kuwa toka haudodo kugajuwa Maandiko Gang'alile, godaha kukugwaa nzewele zigala ukombola kubitila kumtamanila Yesu Kilisito.
16Maandiko Gang'alile gose gana mhumuzi ya Imulungu, na gofaya kwa kufundizila ukweli, gofaya kuwazuma wanhu, gofaya kugagolosa ago ganyolodoke, na gofaya kuwalanguliza wanhu wawe na ugima unogile mgameso ga Imulungu,
17avo munhu yomsang'hanila Imulungu yadahe kutenda goya, na yadahe kusang'hana kila sang'hano inogile.