1Mndewa Daudi viyakalile kokala mng'anda yake ya undewa, Mndewa Imulungu kamtenda yawe na tindiwalo na iwanhu omwihila mhande zose.
2Mndewa Daudi kamulongela mtula ndagu Natani, “Niye nokala mng'anda izengigwe na mibiki ya mielezi, lakini sanduku da lagano da Imulungu dokala mkibanda.”
3Natani kamulongela mndewa, “Tenda chochose chuugesa mmoyo wako, kwavija Mndewa Imulungu kahamoja na gweye.”
4Lakini kilo kikija mbuli ya Mndewa Imulungu imwizila Natani imulongela,
5“Genda kamulongele msang'hanaji wangu Daudi kamba Mndewa Imulungu kolonga, ‘Vino gweye iyo yonda unizengele ng'anda ya kukala?
6Niye sinakala mng'anda tangu siku viniwalavile Waizilaeli kulawa Misili mbaka lelo. Lakini nihama kulawa hema dimoja mbaka hema diyagwe na nika ukazi wangu.
7Hanhu hohose hanicholile hamoja na wanhu wa Izilaeli, nimulongela kilongozi yoyose inimulagize kuwasusila wanhu zangu, habali hunizengele ng'anda ya mielezi?’”
8Avo, Imulungu kagendelela kulonga, “Avo, mulongele Daudi msang'hanaji wangu mbuli zino, Mndewa Imulungu yeli na udahi wose kolonga vino, ‘Nikusola kulawa mdizizi na kulawa kususila ng'hondolo ili uwalongoze wanhu zangu wa Izilaeli.
9Nikala hamoja na gweye kila hanhu kuucholile na niye niwasegesa iwanhu okwihila wakalile kuulongozi wako. Avo noditenda twaga jako diwe kulu kamba wakulu wayagwe okala mwiisi yose.
10Na niye nowagwaa wanhu zangu wa Izilaeli hanhu, ili wawe na hanhu hao wenyego ha kukala na sikuwagazigwe kabili. Iwanhu wehile hawawagaza kabili kamba viwatendile ako kuchugu.
11Na kamba viikalile tangu vinisagule wasemi wa wanhu zangu wa Izilaeli. Niye nokuhumuza kulawa kwa iwanhu okwihila. Vivija niye Mndewa Imulungu nokulongela kamba nokugwaa ulelo.
12Siku zako zahesha kodanganika na koilumba na iwahenga zako, niye nomwinula ulelo wako imoja wa wanago nomtenda yawe mndewa, na niye nougangamiza undewa wake.
13Heyo ayo yonda yazenge ng'anda kwa twaga jangu, na niye nokigangamiza kigoda cha undewa wake milele.
14Niye nokuwa tatake na heyo kokuwa mwanangu. Yahatenda gehile, nomzuma kwa mbalati kamba wanhu viwowazuma wanao.
15Lakini sisegesa ng'o unogelo wangu kumwake, kamba viniusegese kwa Sauli, vinimsegese haulongozi wako.
16Na ing'anda yako na undewa wako na kigoda chako cha undewa vogangamala milele.’”
17Kwa mbuli zose na kwa gose gayonile Natani kamulongela Daudi.
18Abaho mndewa Daudi kengila mng'anda na kakala kuulongozi wa Mndewa Imulungu kalonga, “Go Mkulu Mndewa Imulungu, niye na nani na wanhu wa mng'anda yangu kina nani mbaka kunivikiza hano hanili?
19Mbuli ino ikala ndodo mgameso gako, Go Mkulu Mndewa Imulungu, kulonga mbuli ya siku zikwiza za ng'anda ya msang'hanaji wako, kumbe vivo utendaga kwa iwanhu, go Mndewa Imulungu wangu!
20Avo nonge choni kubanza gago niye Daudi? Kwavija gweye konjuwa goya, niye msang'hanaji wako, Go Mkulu Mndewa Imulungu.
21Mbuli ya kuiduwila kwako na kwa kulonda mwenyego, kunhendela mbuli zose ng'hulu ili niye msang'hanaji wako nhambule.
22Gweye kwa imkulu go Mkulu Mndewa Imulungu, na haduhu Imulungu iyagwe ila gweye, kamba vituhulike kwa magwiti getu.
23Nani yeli kamba wanhu wako Waizilaeli, awo gweye kuchola kuwagombola ili wawe wanhu zako mwenyego. Kuitendela twaga mbuli yako mwenyego na kutenda unzonza mkulu na wa kudumbiza kwa kuwawinga wanhu wa isi ziyagwe na imilungu yao kulawa kuulongozi wa wanhu wako, awo uwagombole kulawa Misili.
24Kuwasagula wanhu wako Waizilaeli mbuli yako mwenyego, ili wawe wanhu wako milele, na gweye Mndewa Imulungu kuwa Imulungu wao.
25“Avo, Mndewa Imulungu ugatende gaja gaulongile mbuli ya msang'hanaji wako na ulelo wake gasigale milele na utende kamba vuulongile,
26ili twaga jako ditogoligwe milele, na wanhu walonge, ‘Mndewa Imulungu yeli na udahi wose, Imulungu wa Izilaeli,’ na ulelo wa niye msang'hanaji wako Daudi ogangamala kuulongozi wako.
27Kwavija gweye Mndewa Imulungu uli na udahi wose, Imulungu wa Izilaeli, kungubulila niye msang'hanaji wako, kulonga, ‘Noutenda ulelo wako uwe na wanhu wakulu mwiisi,’ avo mmsang'hanai wako kapata moyo wa kupula kuulongozi wako.
28“Go Mkulu Mndewa Imulungu, gweye iyo Imulungu, na mbuli zako za ukweli, na gweye kunilongela niye msang'hanaji wako kinhu acho kinogile.
29Avo, nokupula kamba vokunogela, uutambikile ulelo wa msang'hanaji wako ili ulelo wangu usigale milele, kwavija gweye Mkulu Mndewa Imulungu kulonga, avo kwa ganogile gako, ulelo wa msang'hanaji wako otambikiligwa milele.”