1Abaho makabila gose ga Izilaeli gamcholela Daudi ako Hebuloni gamulongela, “Siye twa ndugu zako wa usungu na damu yako.
2Ako umwaka Sauli viyakalile mndewa, gweye ayo uwalongoze Waizilaeli kung'hondo, na Mndewa Imulungu kakulongela, ‘Gweye kowasusila wanhu wangu wa Izilaeli, na gweye kokuwa mtawala wao.’ ”
3Wavele wose wa Izilaeli wamcholela Daudi ako Hebuloni, na heyo mndewa Daudi katenda lagano na hewo kuulongozi wa Mndewa Imulungu, na hewo wamgidila mavuta Daudi yawe mndewa wa Izilaeli.
4Daudi viyasongile kutawala, kakala na miyaka malongo madatu na katawala kwa miyaka malongo mane.
5Ako Hebuloni katawala wanhu wa Yuda kwa miyaka saba na nusu, na ako Yelusalemu katawala wanhu wa Izilaeli na Yuda kwa miyaka malongo madatu na ndatu.
6Siku dimoja mndewa Daudi na wanhu zake wachola Yelusalemu kuwatowa Wayebusi wakalile wenekae wa buga dijo. Lakini wao wamulongela Daudi, “Hukwingila ng'o muno, hata wasuwameso na mbetembete okuwinga.” Kwavija wagizaga Daudi hadaha kwingila mdibuga dijo.
7Lakini, Daudi kaisola ingome ya Sayuni5:7 Sayuni ajo twaga diyagwe da Yelusalemu. ikalile izunguluswe luwa lwa mabwe, ako kumwande ijuwigwa kamba buga da Daudi.
8Siku dijo Daudi kalonga, “Munhu yoyose yonda yawahume Wayebusi yabitile mmuloka wa gamazi ili yawavikile wasuwameso na mbetembete awo omwihila Daudi.” Lekaavo olonga, “Wasuwameso na mbetembete hawengila mng'anda ya kindewa.”
9Daudi kakala mdibuga dijo, na kadikema, “Buga da Daudi.” Daudi kadizengela luwa buga dijo, kusongela Milo na kwingila mgati.
10Daudi kagendelela kuwa na udahi ng'hani kwavija Mndewa Imulungu, Imulungu yeli na udahi wose, kakala hamoja na heyo.
11Abaho Hilamu mndewa wa Tilo katuma wasenga kwa Daudi, wamgalila mibiki ya mielezi na mafundi selemala na mafundi ozenga kwa kutumia mabwe na wamzengela Daudi ng'anda ya kindewa.
12Baho, Daudi kajuwa kamba Mndewa Imulungu kamgangamiza yawe mndewa wa Izilaeli na kautenda undewa wake ujuwike mbuli ya wanhu wake Waizilaeli.
13Daudi viyasegele ako Hebuloni, kagendelela kusola watumwa wa kitwanzi kamba wehe na wehe wayagwe ako Yelusalemu, wamulelela wana wengi wa kimbigalo na wa kitwanzi.
14Gano gago matwaga ga wanage Daudi wa kimbigalo waleligwe ako Yelusalemu. Shamua na Shobabu na Natani na Sulemani,
15na Ibuhali na Elishua na Nefegi na Yafia,
16na Elishama na Eliada na Elifeleti.
17Wafilisiti viwahulike kamba Daudi kagidiligwa mavuta ili yawe mndewa wa Izilaeli, Wafilisiti wose wachola kumzahila Daudi, lakini Daudi kakala yapatile usenga kahumuluka kaifisa mwiimhango.
18Avo Wafilisiti wavika na wapwililika kudikonde da Lefaimu.
19Daudi kamuuza Mndewa Imulungu, “Vino, ny'hole kuwavamila Wafilisiti? Vino, kowagela mmakono gangu?”
20Avo, Daudi kachola mbaka Baali Pelasimu na kawahuma Wafilisiti. Kalonga, “Mndewa Imulungu kawameza wanhu omwihila kamba mazi ga masika vigochola himahima.” Avo hanhu aho wahakema Baali Pelasimu.
21Wafilisiti waileka minyago ya imilungu yao hanhu aho, Daudi na wanhu zake waisola.
22Abaho Wafilisiti wabwela kabili wapwililika kudikonde da Lefaimu.
23Avo Daudi kamuuza Mndewa Imulungu, Mndewa Imulungu kamwidika, “Sikuuwavamile baho kuwili, lakini wazunguluke kukisogo uwavamile umwambu uilola na mibiki ya mifolosadi.
24Wahahulika sauti ya visindo va magulu kuzinhembeti za mibiki ya mifolosadi, genda kawavamile kwavija Mndewa Imulungu kakulongolela kuwatowa iwakalizi wa Wafilisiti.”
25Avo Daudi katenda kamba viyalagizwe na Mndewa Imulungu, kawatowa wakalizi wa Wafilisiti kusongela Geba mbaka Gezeli.