1Viibitile mbuli ayo, Daudi kamuuza Mndewa Imulungu, “Vino, ny'hole kudibuga dimoja mna gamabuga ga Yuda?”
2Avo Daudi kachola Hebuloni hamoja na wehe zake wabili, Ahinoamu wa Yezileeli na Abigaili yakalile mwehe wa Nabali, yalawile buga da Kalimeli.
3Kachola na wakalizi zake, kila imoja na iwanhu wa mng'anda mmwake, na wakala kudibuga da Hebuloni na ivijiji vake.
4Wanhu wa Yuda wachola Hebuloni kwa Daudi ili wamgidile mavuta yawe mndewa wao.
5avo kawatuma wanhu wakawalongele wanhu wa Yabeshi Gileadi, “Mndewa Imulungu yawatendele ganogile, kwavija mutenda goya kumzika mndewa wenu Sauli.
6Mndewa Imulungu yawalagusile kamba heyo kotamaniligwa na unogelo wake hawishaga, na niye vivija nowatendela ganogile kwa mbuli inogile imutendile.
7Avo muwe na nguvu na mugangamale, kwavija mndewa wenu Sauli kadanganika, wanhu wa kabila da Yuda wangwaa niye undewa kwa kunigidila mavuta niwe mndewa wao.”
8Abeneli mwanage Neli, mkulu wa wakalizi wa Sauli, kamsola Ishibosheti mwanage Sauli na kamgala ako Mahanaimu,
9ako, Abineli kamtenda yawe mndewa wa isi ya Gileadi, Ashulu, Yezileeli, Efulaimu, Benjamini na Izilaeli yose.
10Ishibosheti viyasongile kuitawala Izilaeli kakala na miyaka malongo mane, heyo katawala kipindi cha miyaka mibili. Lakini wanhu wa kabila da Yuda wamuwinza Daudi.
11Daudi kakala mndewa wa kabila da Yuda kwa kipindi cha miyaka saba na nusu, kakala yokala ako Hebuloni.
12Abeneli mwanage Neli, hamoja na wasang'hanaji wa Ishibosheti mwanage Sauli, wasegela Mahanaimu wachola Gibeoni.
13Yoabu mwanage Seluya na wasang'hanaji wayagwe wa Daudi, hewo wachola kuiting'hana na Abeneli hamoja na wanhu yakalile nao hana dilamba dili ako Gibeoni. Bumbila dimoja dikala mwambu umoja wa lamba na diyagwe dikala mwambu uyagwe wa lamba.
14Abeneli kamulongela Yoabu, “Watogolele wabwanga zako waitowe na wabwanga zangu kuulongozi wetu.”
15Avo awo iwabwanga wema wapetigwa, kulawa kwa Ishibosheti mwanage Sauli yalawile mdikabila da Benjamini, wabwanga longo dimoja na mbili na kulawa kwa Daudi wabwanga longo dimoja na mbili.
16Kila imoja kamgoga miyage yomwihila mdipala na kumuhoma na sime mulubavu, wose wabili wagwa hasi wadanganika. Avo hanhu haja hakemigwa Helikati Hazulimu2:16 Kwa Kiebulania Helikati Hazulimu fambulo jake mgunda wa sime.. Hanhu aho ako Gibeoni.
17Siku dijo ng'hondo ikala ng'hulu ng'hani, Abeneli hamoja na wanhu zake wa Izilaeli wahumwa na wanhu wa Daudi.
18Wana wadatu wa Seluya, Yoabu, Abishai na Asaheli wakala baho. Asaheli kakala na mbio kamba kigunga.
19Asaheli kamkimbiza Abeneli dimwe kwa dimwe bila kulola kumoso hebu ukudila.
20Abeneli viyahinduke kukisogo kamona Asaheli, kamuuza “Gweye Asaheli?”
21Abeneli kamulongela, “Hinduka kumoso hebu ukudila, umgoge mbwanga imoja usole vinhu vake na undeke niye.” Lakini Asaheli kakala yogendelela kumkimbiza.
22Abeneli kamulongela kabili Asaheli, “Leka kunikimbiza, habali kolonda nikukome? Nomulola vilihi ndugu yako Yoabu?”
23Lakini Asaheli kalema kuhinduka. Avo Abeneli kamuhoma na sina ya mgoha mwiinda kwa kukisogo, isina ya umgoha ilawilila kumgongo, Asaheli kagwa bahaja kadanganika. Wanhu wose wavikile aho hayadanganikile Asaheli wema.
24Lakini Yoabu na Abishai wamkimbiza Abeneli. Zuwa vidikalile dohonga wavika kulugongo lwa Ama, uli mwambu wa kudilawila zuwa wa Gia, mna inzila ichola kuluwala lwa Gibeoni.
25Wanhu wa kabila da Benjamini waiting'hana hamoja, wakala kukisogo cha Abeneli, wema uchanha ya lugongo.
26Abaho Abeneli kamkema Yoabu kamulongela, “Vino, toitowa siku zose? Vino, hukona kamba uhelelo wake okwiha ng'hani? Lini vonda uwalongele wanhu zako waleke kuwakimbiza ndugu zao?”
27Yoabu kamulongela, “Noiduwila kamba Imulungu viyokala kamba hulongile mbuli ayo wanhu zangu wahagendelele kuwakimbiza ndugu zao mbaka mayo imitondo.”
28Avo Yoabu katowa mhalati na wanhu zake waleka kuwakimbiza wanhu wa Izilaeli, na hawaitowile kabili.
29Abeneli na wanhu zake wabita konde da Alaba ikilo waloka lwanda lwa Yolidani, wagendelela imitondo yose mbaka wavika Mahanaimu.
30Avo Yoabu viyabwelile kulawa kumkimbiza Abeneli, kawating'haniza wanhu zake wose, kajuwa kamba wakalizi longo na tisa wa Daudi wakala habule hamoja na Asaheli.
31Lakini wakalizi wa Daudi wawakoma wanhu magana madatu na malongo sita wa Abeneli kulawa kabila da Benjamini.
32Yoabu na wanhu zake walusola lukuli lwa Asaheli, waluzika behi na panga da tatake, dili ako Beselehemu. Yoabu na wanhu zake wachola kilo kwa kilo, usiku vuuchile wavika kudibuga da Hebuloni.