1Yoabu mwanage Seluya, kajuwa kamba mndewa kasulukila kumona mwanage Abisalomu.
2Yoabu katuma wanhu ako Tekoa ili wakamzahile mtwanzi mbala. Viwamgalile, kamulongela, “Uitende kamba vija kuna lusikisiki. Vala viwalo va kufiligwa, sambi uibake mavuta, lakini uitende kamba mtwanzi yafiligwe kipindi kitali.
3Abaho uchole kwa mndewa ukamulonge gano gonikulagiza.” Avo Yoabu kamulongela ga ukulonga.
4Ija imtwanzi wa Tekoa kachola kwa mndewa, kafugama hasi kingubanguba haulongozi wa mndewa, kalonga, “Go mndewa nitaze!”
5Mndewa kamuuza, “Nikutaze choni?”
6Niye msang'hanaji wako ng'hala na wana wabili wa kimbigalo. Siku dimoja viwakalile kumuhulo wasonga kugomba. Kwavija kukala kuduhu munhu wakuwagombeleza, imoja kamkoma miyage.
7Avo lukolo lwangu lose lunihinduka niye msang'hanaji wako, olonda nimulave kumwao imwana yamkomile miyage ili wamkome, na heyo ayo imuhazi wangu. Wahamkoma okuwa wasegesa ngama yangu initamanila, mbigalo wangu kokuwa kabule twaga hebu mwana mwiisi.”
8Mndewa kamulongela, “Genda ukae noilola goya mbuli yako.”
9Lakini ija imtwanzi kulawa Tekoa kamulongela, “Go mndewa, nzambi zangu ziwe kumwangu na ziwe mulukolo lwa tatangu. Gweye na undewa wako sambi uwe na kitala.”
10Mndewa kamulongela, “Kamba hana munhu yoyose yokulonga vihile mgale kumwangu na honda yabwelele kabili kukugaza.”
11Ija imtwanzi kamulongela, “Chonde mndewa, mhulila kwa Mndewa Imulungu wako, ili ija indugu yangu yolonda kumkoma mwanangu sambi yamkome.”
12Ija imtwanzi kamulongela, “Nokupula nhogolela niye msang'hanaji wako nilonge mbuli imoja kumwako gweye mndewa wangu.”
13Ija imtwanzi kalonga, “Habali kolonda kutenda mbuli kamba ino kwa wanhu wa Imulungu? Kwavija kwa kutenda mbuli ayo koitagusa mwenyego kamba kuna kitala kwavija humbweza mwanago ukae kulawa kuja kuyakimbilile.
14Siye wose todanganika. Siye kamba vija mazi getike hasi hagadahika kuzoleka kabili. Lakini Imulungu halonda iwe vivo, ila kotenda nzila ili wose wakimbile sikuwagendelele kukala kutali na heyo.
15Niye niza nilonge na gweye mndewa wangu, kwavija wanhu wakala ondumbiza. Avo msang'hanaji wako, nigesa vinoga nonge na gweye mndewa, sengine konhendela gaja gonilonda niye msang'hanaji wako.
16Kwavija mndewa kunitegeleza na kunigombola kulawa mmakono ga wanhu wehile walondile kunibananga niye kwa kumkoma mwanangu na kuusegesa uhazi uyatugwelele Imulungu.
17Na niye msang'hanaji wako nigesa, mbuli ya mndewa wangu yonitenda niwe na tamanilo mmoyo mmwangu, kwavija gweye mndewa wangu kuigala na msenga wa Imulungu kuna ukufambula ganogile na gehile. Mndewa Imulungu, Imulungu wako yawe hamoja na gweye.”
18Abaho mndewa kamulongela yuja imtwanzi, “Sikuunifise kinhu nahakuuza.”
19Mndewa kamuuza, “Hamuilumbile na Yoabu mzimbuli zino?”
20Msang'hanaji wako Yoabu katenda vino ili yahindule mbuli vizili hagati ya gweye na mwanago Abisalomu. Lakini gweye mndewa wangu kuna nzewele nyingi kamba msenga wa Imulungu kogajuwa gose ga mwiisi.”
21Avo, mndewa kamulongela Yoabu, “Tegeleza notogola uchole ukambweze Abisalomu.”
22Yoabu kagwa kingubanguba kampulila kwa Mndewa Imulungu yamtambikile. Yoabu kalonga, “Go mndewa, lelo niye msang'hanaji wako nojuwa mhata ng'hekewa mgameso gako kwavija kunitogolela kija kinikupulile.”
23Avo, Yoabu kachola kumsola Abisalomu ako Geshuli na kumbweza kudibuga da Yelusalemu.
24Lakini mndewa kalonga, “Abisalomu yakale ukayake, sambi yeze kunyona.” Avo Abisalomu kachola kukala ukayake na hamonile bule mndewa Daudi.
25Mwiisi yose ya Izilaeli kukala kuduhu munhu yoyose yanogile kamba Abisalomu. Kusongela kudipala mbaka mulugayo hakalile na kilema chochose.
26Kila kimambukizo cha mwaka kakala yobea mvili zake kwavija mvili zake zikala nzito, kazipima zikala na uzito wa kilo mbili kwa kipimo cha kindewa.
27Abisalomu kakala na wana wadatu wa kimbigalo na mndele imoja twaga jake Tamali. Tamali kakala yanogile.
28Abisalomu kakala miyaka mibili ako Yelusalemu bila kumona mndewa Daudi.
29Avo Abisalomu kamtumila usenga Yoabu, ili yachole kwa mndewa, lakini Yoabu kalema kuchola kwa Abisalomu. Abisalomu katuma usenga uyagwe lakini Yoabu vivija kalema.
30Avo, Abisalomu kawalongela wasang'hanaji zake, “Yoabu kana mgunda wa shaili behi na mgunda wangu. Gendeni mukaugele moto.” Avo wasang'hanaji wa Abisalomu waugela moto mgunda wa Yoabu.
31Yoabu kachola ukae kwa Abisalomu kamuuza, “Habali wasang'hanaji zako waugela moto mgunda wangu?”
32Abisalomu kamulongela, “Nikutumila usenga, wize ili nikutume kwa mndewa ukauze, ‘Habali nibwela kulawa Geshuli? Vinoga nahakalile ukuja’. Avo nolonda kumona mndewa, na kamba nina kitala nikomigwe.”
33Avo Yoabu kachola kumulongela mndewa mbuli zose zija, mndewa kamkema Abisalomu. Abisalomu kengila mng'anda kaidulika mbaka hasi na heyo mndewa kamnonela.