1Ndugu zetu, tolonda mujuwe, Imulungu viyavigwelele ng'hekewa vibumbila va wanhu wamtogole Kilisito ako Makedonia.
2Wanhu awo wagaya ng'hani, lakini deng'ho jao dikala kulu, na wakala na moyo wa kulava vinhu vao hamoja wakiwa ng'hani.
3Nowalongela ukweli, walava ng'hani, na walava kubanza viwadahile. Kwa kulonda wenyego,
4watupula ng'hani vivija na wao wengile mwiisang'hano ino inogile ya kuwataza wanhu wa Imulungu.
5Wasang'hana kubanza vitugesile! Tanhu wailava wenyego kwa Mndewa, abaho wailava kumwetu, kamba viyalondile Imulungu.
6Avo tumpula Tito yaisongile sang'hano ino ya kulava kwa moyo unogile, vivija yawataze kuimambukiza kumwenu.
7Mweye mna vinhu bwando, kumtamanila Imulungu, ulonzi unogile, nzewele, kuwamba ng'hani kutenda ganogile na unogelwa wenu kumwetu. Avo vivija towalonda mweye muwe na moyo unogile ng'hani mwiisang'hano ino ya kulava.
8Niye siwagwaa lagizo bule, lakini nolonda kuwalagusila mweye wayagwe viwowamba kuwataza wanhu, ili nijuwe unogelwa wenu viwili wa ukweli.
9Kwavija muijuwa ng'hekewa ya Mndewa wetu Yesu Kilisito, hamoja kakala na kila kinhu, lakini kaitenda mkiwa mbuli yenu mweye, ili kubitila ukiwa wake mweye muwe na kila kinhu.
10Kwa mbuli ino, niye vinigesa vinoga mweye mwahamambukiza gaja gamusongile mwaka ubitile. Mweye mukala wanhu wa ichanduso siyo kulava kwiiyeka, lakini vivija kwa moyo wa kulonda kulava.
11Avo mambukizeni sang'hano ayo ya kulava kwa moyo unogile, kamba vija vimusulukile ng'hani kuisang'hana, avo isang'haneni sambi kwa kija kimulinacho.
12Kamba munhu kana moyo wa kulava, Imulungu kobokela kija kiyalinacho, halola kija kiyebule.
13Niye silonda kuwadikwa mweye mizigo abaho wayagwe wabwihile, lakini mweye mose muwe sawa.
14Vinhu vingi vimulinavo sambi viwataze waenu welibule, ili na wao vonda wawe na vinhu vingi viwataze mweye kipindi mwabule kinhu. Baho mose mokuwa sawa.
15Kamba Maandiko Gang'alile vigolonga, “Ija yakubile kingi hapatile kingi ng'hani, na ija yasolile kidogo hahungukilwe kinhu.”
16Nomgwaa nhogolwa Imulungu kwa kumgwaa Tito moyo wa kuwataza mweye kamba moyo unilinao niye!
17Siyo kwavija siye tumulongela, lakini vivija kakala kosulukila ng'hani kuwataza, kwa kulonda mwenyego keza kumwenu.
18Tomtuma ndugu imoja hamoja nayo, yotegelezigwa ng'hani mna ivibumbila vose va wanhu wamtogole Yesu, kwa sang'hano yake ya kuwapetela wanhu Mbuli Inogile.
19Vivija, ndugu ayo kasaguligwa na vibumbila va wanhu wamtogole Yesu yange na siye kipindi vitugala sente zino, sente zigala ukulu kwa Mndewa na zilagusa moyo wetu wa kuwataza wanhu.
20Toiteganya wanhu sikuwatuyalalile vitwika hamoja na kugola sente zino zilavigwe kwa moyo unogile.
21Siye tolonda kusang'hana ganogile siyo mgameso ga Mndewa yaiyeka, lakini vivija mgameso ga wanhu.
22Vivija tomtuma hamoja nao ndugu yetu, miyanza mingi tumgeza na tumona kana moyo wa kuwataza wanhu. Sambi kana moyo wa kuwataza ng'hani wanhu kwavija kowatamanila mweye ng'hani.
23Tito ayo miyangu, tosang'hana hamoja mbuli ya mweye. Ndugu zetu wayagwe okwiza hamoja nayo, wao wasenga wa vibumbila va wanhu wamtogole Yesu na ogala ukulu kwa Kilisito.
24Avo walagusileni unogelwa wenu, ili vibumbila va wanhu wamtogole Yesu wajuwe totenda goya vituigodela mweye.