1Niye Paulo mwenyego, wanhu wayagwe olonga namuhole kipindi nahawa na mweye, lakini nahawa kutali na mweye namsabalu. Nowapula kwa bazi na moyo unogile wa Kilisito,
2vondanize sikumunhende niwe msabalu, kwavija nojuwa nodaha kuwa msabalu kwa waja olonga tokala kamba viwokala wanhu wa mwiisi ino.
3Ona, tokala mwiisi, lakini hatuitowa kamba viwoitowa wanhu wa mwiisi.
4Silaha zituitowela siye siyo silaha za mwiisi ino, lakini nguvu ya Imulungu, itulaga ng'hambi zose. Tobananga mbuli zose za uvizi,
5togabananga magoda gose gotenda viyagwe na nzewele ya kumjuwa Imulungu. Togaboka magesa gose na kugatenda gamtegeleze Kilisito.
6Mwahagoga kila kinhu, siye tuitanda kumtagusa munhu yoyose yoleka kugoga.
7Mweye molola mbuli za kunze. Kamba munhu yoyose kogesa heyo munhu wa Kilisito, kolondigwa yagese kabili kuwa siye twa wanhu wa Kilisito kamba viyali heyo.
8Niye sikona kinyala hata kamba nibanza kuigoda mbuli ya udahi uyatugwelele Mndewa, katugwaa udahi wa kuwazenga mweye siyo wa kuwabomola.
9Silonda mweye mugese nolonda kuwagela bwembwe kwa baluwa zangu.
10Kwavija olonga, “Baluwa za Paulo zizama na zimema mbuli ng'hulu, lakini yahawa hamoja na siye konyolila, na ulonzi wake siyo kinhu chochose!”
11Wanhu kamba awo olondigwa wajuwe kamba vose vibili sawa, gaja gatwandika kipindi twahawa kutali na gaja gonda tusang'hane twahawa hamoja na mweye.
12Siye hatudaha kuika hamoja hebu kuigala na wanhu waja oitogola wenyego. Wanhu oitenda wenyego kinhu cha kupimila na wanhu oilinga wao kwa wao, wanhu awo wabule nzewele!
13Lakini siye hatuigoda ng'hani, kuigoda kwetu kokuwa mna isang'hano iyatugwelele Imulungu, vivija sang'hano ayo, iyo itusang'hana kumwenu.
14Siye hatunabanza kuigoda, kamba vija hatunakwiza kumwenu, kwavija siye twiza kumwenu na tuwagalila Mbuli Inogile ya Kilisito.
15Avo siye hatubanza kuigoda mbuli ya sang'hano itendigwe na wanhu wayagwe. Lakini tololela kuwa kumtamanila kwenu Imulungu kogendelela na sang'hano yetu kumwenu yokuwa ng'hulu kwa kukweleleza viyolonda Imulungu.
16Abaho todaha kuipeta Mbuli Inogile mziisi ziyagwe, zili kutali na mweye. Kwavija hatulonda kuigodela sang'hano imalile kusang'hanigwa na munhu iyagwe hanhu aho.
17Lakini, kamba vigolonga Maandiko Gang'alile, “Munhu yolonda kuigoda, yaigodele kija kiyasang'hane Mndewa.”
18Kwavija munhu yotogoligwa siyo ija yoitogola mwenyego, lakini ija yotogoligwa na Mndewa.