1Loho Yang'alile kolonga fulu ipile kuwa baho kumwande wanhu wayagwe oleka kutamanila, na ozitegeleza loho za uvizi na kugoga mafundizo ga vinyamkela.
2Mafundizo kamba gago gogaligwa na wanhu watapitapi na wavizi, mizoyo yao ileka kuwatagusa kuwa wabananga isomigwa na zuma da moto.
3Wanhu awo ofundiza kamba havinogile kusola na kuja ndiya fulani. Lakini Imulungu kalumba vinhu vose vidigwe na vibokeligwe kwa kumgwaa nhogolwa na awo wamtogole Yesu na kujuwa ukweli.
4Kila kinhu kiyaumbile Imulungu kinoga, kuduhu kilondigwa kulemigwa, lakini kila kinhu chobokeligwa kwa kumgwaa nhogolwa Imulungu,
5kwavija imbuli ya Imulungu na kumpula votenda kinhu acho kitogoligwe na Imulungu.
6Kamba uhawagwaa mafundizo gano wanhu wamtogole Yesu, kokuwa msang'hanaji yanogile wa Yesu Kilisito na uhagendelela kukula kiloho kwa mbuli za kutamanila na mafundizo gaukweli gaukweleleze.
7Iteganyeni na simo hazili mna ukutamanila na zabule kinhu. Izoweze kukala muugima wa kumgwaa ukulu Imulungu.
8Mazoezi galukuli ganoga, lakini kukala kwa kumnogeza Imulungu kunoga ng'hani, kwavija kotwikila ugima wa sambi na wa kuko kumwande.
9Ulonzi awo wa ukweli na olondigwa kutogoligwa.
10Siye toiyoha kusang'hana ng'hani, kwavija tomulolela Imulungu yeli mgima, Mkombola wa wose na ng'hani ng'hani kwa hewo wamtogole Yesu.
11Uwalagize na uwafunze mbuli azo.
12Sikuutogole munhu yakubeze kwavija gweye kwa mbwanga, lakini uwe kilaguso kwa wanhu wamtogole Yesu, kwa ulonzi wako na sang'hano zako na unogelwa wako na kutamanila kwako na ugima unogile.
13Mbaka vondanize, sang'hanila kipindi chako kwa kusoma Maandiko Gang'alile mgameso ga wanhu na kuwapetela wanhu na kuwafundiza.
14Sambiuileme nhunza ya Loho Yang'alile ili mgati mmwako, yuugweleligwe kubitila mbuli za wavele za ulaguzi viwakwikile makono gao.
15Gesa goya kwa sama ya mbuli azo na uzisang'hane ili kugendelela kwako koneke na wanhu wose.
16Uiteganye mwenyego na mafundizo gako. Gendelela kusang'hana mbuli zino, kwavija uhasang'hana koikombola mwenyego na waja okutegeleza.