1Sauli viyeshile kumuuza Daudi, Yonatani mwanage Sauli kamnogela ng'hani Daudi, kamnogela kwa moyo wake wose kamba viyainogele heyo mwenyego.
2Tangu siku dijo Sauli kamsola Daudi na kukala nayo mng'anda yake, na hamtogolele kubwela ukae kwa tatake.
3Kwavija Yonatani kakala komnogela Daudi na kamwika muumoyo wake, katenda lagano na heyo.
4Kavula kanzu jake kamgwaa Daudi hamoja na vinhu vake va kuitowela, sime, upinde na mkwiji wake.
5Chochose kiyatumigwe Daudi na Sauli kutenda kakitenda goya, avo Sauli kamtenda yawe mkulu wa iwakalizi, mbuli ayo iwanogeza wanhu hamoja na wasang'hanaji wa Sauli.
6Daudi viyamkomile ija Imfilisiti, wakalizi viwakalile obwela ukae hamoja na Daudi, watwanzi kulawa mmabuga gose ga Izilaeli wachola kumbokela Sauli kuno otowa kilongelonge na kigoma kidodo na kwimba nyila za deng'ho.
7Vivija wakala okwimba nyila za kuigomelela kamba vino,
8Sauli hanogeligwe na mbuli za lwila ulo, kagevuzika ng'hani. Kawalongela, “Mumgwaa Daudi maelufu longo lakini niye munigwa maelufu gaiyeka. Kisigale mumgwee na uundewa.”
9Tangu siku dijo Sauli kakala yomonela migongo Daudi.
10Imitondo yake ija iloho yehile kulawa kwa Mndewa Imulungu kamwizila bahaja Sauli kamba munhu mwene lukwale kakala yohaluka haluka, Daudi kamba viyatendaga kakala yotowa bango. Sauli kakala yagogile mgoha.
11Avo Sauli kampigisila mgoha Daudi miyanza mibili kuno kogelegeza, “Nombandagiza mkiwambaza.” Lakini Daudi kakwepa miyanza yose mibili.
12Sauli kakala yomdumba Daudi kwavija Mndewa Imulungu kamuleka heyo na kakala hamoja na Daudi.
13Kwa mbuli ayo, Sauli kamtenda Daudi yawe mkulu wa wakalizi elufu imoja, Daudi kawalongoza kuna ing'hondo.
14Daudi kila kinhu kiyatendile kakala yodaha kwavija Mndewa Imulungu kakala hamoja na heyo.
15Sauli viyonile kila kiyatendile Daudi kinoga, kakala yodumba.
16Lakini wanhu wose wa Izilaeli na Yuda wamnogela Daudi, kwavija kawalongoza goya mna ing'hondo na kuhuma.
17Sauli kamulongela Daudi, “Ino hano mndele wangu imkulu Melabu, nokugwaa umsole kwa malagano mabili, uwe mkalizi wangu galu, na uitowe ng'hondo ya Mndewa Imulungu.” Kwavija Sauli kagelegeza, “Niye simkoma bule kwa mkono wangu, leka Wafilisiti wamkome.”
18Daudi kamulongela Sauli, “Niye na nani mbaka mndewa Sauli yawe tata mkwe yangu? Lukolo lwa tatangu halujuwika mwiisi ya Izilaeli.”
19Lakini kipindi vikivikile cha Melabu mwanage Sauli kusoligwa na Daudi, kasoligwa na Adilieli yolawa buga da Mehola.
20Avo Mikali mndele wa Sauli kakala yomnogela Daudi. Sauli viyalongeligwe mbuli ayo kadeng'helela ng'hani.
21Sauli kagelegeza, “Beta nimgwelele Daudi mndele wangu, ili yawe mtego kumwake, ili Wafilisiti wamkome.” Avo Sauli kamulongela Daudi kabili, “Sambi kokuwa mkwe yangu.”
22Sauli kawalongela wasang'hanaji zake, “Mulongeleni Daudi kinyelegezi, mndewa kanogelwa na gweye na vivija wasang'hanaji zake wose wanogeligwa na gweye, avo togola uwe mkwe wa mndewa.”
23Waja iwasang'hanaji wa Sauli wabwelela kumulongela Daudi mbuli azo, Daudi kawalongela, “Niye na mkiwa na sijuwigwa bule, mweye mwigizaga mbuli ndodo mndewa yawe tata mkwe yangu?”
24Waja iwasang'hanaji wa Sauli wamulongela vija viyawalongele Daudi.
25Sauli kawalongela, “Mulongeleni vino Daudi, mndewa halonda kinhu chochose kwa zengele da mndele wake, ila kolonda migovi gana ya Wafilisiti ili yawabwezele iwanhu omwihila.” Avo ivo Sauli viyapangile ili Daudi yakomigwe na Wafilisiti.
26Waja iwasang'hanaji wa Sauli viwamulongele Daudi mbuli azo, Daudi kadeng'helela kuwa mkwe wa mndewa. Ing'hali hata hainavika siku ya dizengele,
27Daudi hamoja na wanhu zake wachola kuwakoma Wafilisiti magana mabili na waisola migovi yao na kumgalila Sauli. Kagapeta kuulongozi wa mndewa, ili Daudi yamsole mndele wa mndewa. Avo Sauli kamgwaa Daudi mndele wake Mikali yawe mwehe wake.
28Lakini Sauli viyajuwile kamba Mndewa Imulungu kakala hamoja na Daudi, na mndele wake Mikali kamnogela ng'hani Daudi,
29Sauli kagendelela kumdumba Daudi, na kumwihila siku zose.
30Wakalizi wa Wafilisiti wachola kuitowa na Waizilaeli, lakini kila viwakalile oitowa ng'hondo, Daudi kakala yohuma kubanza wasang'hanaji wa Sauli, avo twaga da Daudi dibanza kujuwigwa.