1Loleni, Tata viyatunogele ng'hani, mbaka tokemigwa wana wa Imulungu! Ona vivo vitwili. Lekaavo wanhu wa mwiisi hawatujuwile siye, kwavija hawamjuwile heyo.
2Ndugu zangu, sambi twa wana wa Imulungu, na hatujuwa vondatuwe. Lakini tojuwa Kilisito yahabwela toigala nayo, kwavija tomona kamba viyali.
3Munhu yoyose yomtamanila Kilisito koisunha, kamba vija Kilisito viyaisunhile.
4Munhu yoyose yotenda nzambi kobena malagizo ga Imulungu, kwavija kutenda nzambi kuko kubena malagizo ga Imulungu.
5Mojuwa kamba Kilisito keza kuzisegesa nzambi zetu, na mgati mmwake mduhu nzambi yoyose.
6Avo munhu yoyose yokala kwa kuilumba na Kilisito hatenda nzambi, lakini munhu yoyose yogendelela kutenda nzambi hamonile na vivija hamjuwile Kilisito.
7Avo wanangu, sikumutogole kuviziligwa na munhu yoyose. Munhu yotenda gaja galondigwa na Imulungu komnogeza heyo kamba vija Kilisito viyamnogeze heyo.
8Munhu yoyose yotenda nzambi munhu ayo wa Mwenembago, kwavija Mwenembago katenda nzambi toka mwanduso. Lakini Mwana wa Imulungu keza mwiisi kuzinanga sang'hano za Mwenembago.
9Yeli mwana wa Imulungu hagendelela kutenda nzambi, kwavija kavumbuka na Imulungu na Imulungu kamgwaa ugima wa sambi, avo hadaha kugendelela kutenda nzambi.
10Vino avo vituwajuwa wana wa Imulungu na wana wa Mwenembago, munhu yoyose hatenda gaja gomnogela Imulungu hebu hamnogela ndugu yake, munhu ayo hali mwana wa Imulungu.
11Na usenga umuuhulike toka haichanduso awo uno, tuinogele wenyego.
12Sikumuigale na Kaini, yalongozigwe na ija Imdumuka, na kamkoma ndugu yake Habili. Vino habali kamkoma? Kwavija gaja gayakalile yosang'hana geha, lakini gaja gayasang'hane ndugu yake gakala ganogile mgameso ga Imulungu.
13Avo ndugu zangu, sikumukanganye kamba wanhu wa mwiisi ino owehila mweye.
14Siye tojuwa kamba tumala kulawa mwiiifa na twingila muugima, kwavija towanogela ndugu zetu. Munhu yoyose yelibule unogelwa kosigala mkufa.
15Munhu yoyose yomwihila ndugu yake mkomaji, na mweye mojuwa munhu yoyose mkomaji kabule ugima wa milele mgati mmwake.
16Vino avo vitujuwa unogelwa viwili, Kilisito kaulava ugima wake mbuli ya siye. Vivija na siye tuulave ugima wetu mbuli ya ndugu zetu!
17Kamba munhu yoyose kana vinhu va mwiisi ino, abaho kamona ndugu yake kabule kinhu chochose na hamonela bazi bule, vino kodahaze kulonga komnogela Imulungu?
18Wanangu, unogelwa wetu sikuuwe kwa mulomo wiiyeka, ila uwe unogelwa wa kweli na ulagusigwe kwa kusang'hana.
19Vino avo vitujuwa kamba siye twa mna ikweli, na honda tunyawenyawe mgameso ga Imulungu.
20Hata kamba mizoyo yetu yotutagusa kamba tubananga, Imulungu mkulu kubanza mizoyo yetu na kojuwa kila kinhu.
21Ndugu zangu, kamba mizoyo yetu haitutagusa, todaha kugangamala mgameso ga Imulungu.
22Kumwake tobokela chochose kitumpula, kwavija togagoga malagizo gake na kutenda gaja gomnogeza heyo.
23Lagizo jake dijo dino, tumtogole Mwanage Yesu Kilisito, na tuinogele wenyego kamba viyatulagize.
24Munhu yoyose yogagoga malagizo ga Imulungu kokala mgati mmwake. Tojuwa kamba Imulungu kokala mgati mmwetu, kubitila Loho Yang'alile iyatugwelele.