1Ntɛ bətbət bɛmbəp mɔ, aloŋnɛ apɔŋ kɔ abeki, atəksɛ sariyɛ s'aSuyif kɔ aboc kiti aSuyif fəp, ŋaloŋkanɛ kəkɔtəŋnɛ ntɛ andeyɔ Yesu mɔ. Ntɛ ŋalip kəkot kɔ mɔ, kɔ ŋambɛr kɔ Pilat dəwaca.
2Kɔ Pilat eyif kɔ: «Mən'ɔyɔnɛ wəbɛ ka aSuyif ba?» Kɔ Yesu oluksɛ kɔ moloku: «Mən'oloku ti.»
3Aloŋnɛ apɔŋ ŋanatɔmpərɛ kɔ meyemsɛnɛ mɛlarəm.
4Kɔ Pilat eyif kɔ sɔ: «Məfɔloku ntɛ o ntɛ? Məne mamɛ ŋambonc am mɔ fəp!»
5Mba Yesu oluksɛ fɛ sɔ toloku ntɛ o ntɛ, ti tɛnaciyanɛ Pilat.
6Awa kəren o kəren kəsata ka Pak, Pilat ɛncsakɛ afum wəyi dəbili wəkin nwɛ ŋaŋfaŋ mɔ.
7Fum wəlɔma ɛnayi dəbili pacwe kɔ Barabas nwɛ anabɛr dəbili teta kədif fum, ntɛ ŋanayɛfɛ kəyeŋkər abɛ a dɔtɔf səbomp mɔ.
8Kɔ kənay ka afum kəmpɛ, kɔ ŋayɛfɛ kəyifət a payɔnɛ ŋa tɔkɔ ambɔt kəyɔnɛ ŋa mɔ.
9Kɔ Pilat eyif ŋa: «Isakərɛ nu wəbɛ wəka aSuyif ba?»
10Bawo Pilat ɛnacərɛ a kəraca ka aloŋnɛ apɔŋ kənasɔŋɛ ŋa kəlɛk Yesu ŋabɛr kɔ dəwaca.
11Mba kɔ aloŋnɛ apɔŋ ŋagbiŋər kənay ka afum, ntɛ tɔŋsɔŋɛ pasakɛ ŋa Barabas mɔ.
12Kɔ Pilat ɔŋgbɔkərɛ sɔ: «Cəke cɔ nəfaŋ a iyɔ nwɛ nəŋwe wəbɛ ka aSuyif mɔ-ɛ?»
13Kɔ ŋayɛfɛ kəkulɛ-kulɛ: «Məcaŋ kɔ dətɔk yɛpəmpəl!»
14Kɔ Pilat eyif ŋa: «Pəlɛc pere pɔyɔ-ɛ?» Kɔ ŋanaŋkanɛ kəkulɛ-kulɛ pəpɔŋ: «Məcaŋ kɔ!»
15Kɔ Pilat ɛncɛm-cɛmnɛ kəyɔ tɛfaŋ ta kənay ka afum: K'ɛsakɛ ŋa Barabas. Ntɛ elip kəsom pasutɛ Yesu tɔrɔŋkɔn mɔ, k'ɔsɔŋ kɔ a pacaŋ dətɔk yɛpəmpəl.
16Kɔ asɔdar ŋaŋkekərɛ Yesu nde kəlɔ kəpɔŋ ka Pilat disrɛ, kɔ ŋawe dɛŋgbɛŋk dadɔkɔ fəp.
17K'asɔdar ŋambɛr Yesu duma deyim, kɔ ŋandeŋər kɔ dəromp aŋgbɔŋkəlɔ ŋa bɛŋk yodu.
18Kɔ ŋayɛfɛ kəfani kɔ ŋacyif: «Iŋyif əm, wəbɛ ka aSuyif.»
19Kɔ ŋasutɛ Yesu domp kəmota, kɔ ŋayukər kɔ lin, ŋanut suwu teta kəfani kɔ.
20Ntɛ ŋalip kəfani kɔ mɔ, kɔ ŋawurɛ kɔ duma deyim kɔ ŋambɛr kɔ yamos yɔn. Kɔ ŋaŋkekərɛ kɔ kəkɔcaŋ kɔ dətɔk yɛpəmpəl.
21Kɔ asɔdar ŋawe fum wəlɔma nwɛ ɛnayɛfɛ dəkulum mɔ, pacwe wəkayi Simɔŋ wəka Sirɛn, papa ka Alɛksandər kɔ Rifis, kəkɔgbaŋnɛ tɔk yɛpəmpəl ya Yesu.
22Kɔ ŋaŋkekərɛ Yesu kəfo nkɛ aŋwe Kolkota mɔ, ti tɔ tatɔkɔ «Kəfo ka kəmbɛmbəlɛ».
23Kɔ asɔdar ŋafaŋ kəsɔŋ Yesu wɛn wɔnɔŋkəl acɔl nŋɛ aŋwe «mir» mɔ, mba Yesu ɛnawosɛ fɛ wi kəmun.
24Kɔ asɔdar ŋancaŋ Yesu dətɔk yɛpəmpəl, kɔ ŋayerɛnɛ yamos yɔn, ŋakotɛ ti yampuŋpuŋ nyɛ nwɛ o nwɛ eŋkekərɛ nde ndɔrɔn mɔ.
25Walaha wɛnayi ntɛ ŋanccaŋ Yesu mɔ.
26Tecicəs ntɛ tɔ ŋanacic kəmentər ka tes ntɛ tɛnasɔŋɛ k'ancaŋ kɔ mɔ: «Wəbɛ ka aSuyif.»
27Kɔ ŋancaŋ Yesu kɔ calbante mɛrəŋ, wəkin pəyi kɔ kəca kətɔt, wəkɔ pəyi kɔ kəca kəmeriya.
28[15.28 Yecicəs yokur yɔcɔkɔ-cɔkɔ yɔlɔma yɔyɔ fɛ moloku mamɛ: «Tatɔkɔ tɔ tecicəs tɛnamentərnɛ, ntɛ tɛnaloku: ‹K'ancəmbər kɔ calbante dacɔ.›» (Məmɔmən sɔ Luk 22.37 kɔ Esayi 53.12.)]
29Acepər ŋaclɔməs Mariki Yesu, ŋacdotəs səbomp səŋan. Ŋacloku: «Bafɔ mən' oŋwuŋ kəlɔ kəpɔŋ ka Kanu, məlɔ sɔ ki mata maas ba?
30Awa, məyacnɛ mənasərka, mətor dətɔk yɛpəmpəl!»
31Aloŋnɛ apɔŋ kɔ atəksɛ sariyɛ s'aSuyif, ŋa sɔ ŋancfani Yesu ŋacloku: «Ɛyac alɔma, mba nkɔnsərka, ɔfɔtam kəyacnɛ!
32Krist, wəbɛ ka Yisrayel pətor oŋ ma dətɔk yɛpəmpəl, ntɛ tɔŋsɔŋɛ sənəŋk səlaŋ sɔ ti mɔ!» Afum akɔ anacaŋ kɔ Yesu mɔ, ŋanclɔməs kɔ sɔ.
33Pəndeyi daŋ, dec dosurɛnɛ afum dəsəbomp, kɔ kubump kəntor dəntɔf fəp, tɛnabɔlɛ kətɛnc haŋ salifana.
34Salifana səndebəp, kɔ Yesu oŋkulɛ-kulɛ: «Eloyi, Eloyi, lema sabaktani?» Itɔ tatɔkɔ: «Kanu kem, Kanu kem, ta ake tɔ məsak'em-ɛ?»15.34 Yabura 22.1
35Afum alɔma akɔ ŋanayi di mɔ ŋanane ti. Ŋancloku kəfɔtɔ disrɛ: «Məcəŋkəl, Aŋnabi Eli eyi kəwe tatɔkɔ.»
36Kɔ fum wəlɔma ɛyɛksɛ, k'ɔŋkɔ pəgbət kəloto domun ndɛ andoktəs mɔ, k'ɛnɛpsər ki dəkətɔk, k'ɔsɔŋ Yesu a pəmun, pəcloku: «Nəsak kɔ, pamɔmən kɔ pəyɔnɛ a Eli endeder kədetorɛ kɔ-ɛ.»
37Mba kɔ Yesu owurɛ dim dɔpɔŋ, k'eŋgbiŋ kifir.
38Kɔ kəloto kəlel nkɛ kəŋkəŋk tɔksɔ ta kəlɔ kəpɔŋ ka Kanu mɔ kəŋgbɛrɛ dacɔ, kəyɛfɛ takəroŋ haŋ tantɔf.
39Ntɛ anəŋk ntɛ ɛnagbiŋ kifir mɔ, kɔ wəbɛ ka asɔdar tasar tin (100) nwɛ ɛnayi di pətɛfərnɛ kɔ mɔ, oloku: «Fum wəkawɛ, Wan ka Kanu yati ɛnayi.»
40Aran sɔ ŋanayi di ŋacmɔmən pəbɔlɛ, aŋɛ dacɔ: Mari wəka Makdala, Mari iya wəka Sak wəfɛt kɔ Yoses, kɔ wəran wəlɔma nwɛ ancwe Salome mɔ.
41Aran akakɔ ŋanacəmɛ Yesu darəŋ, ŋacbəcɛ kɔ ntɛ ɛnayi Kalile mɔ, kɔ aran alarəm alɔma aŋɛ ŋanapɛ kɔ nkɔn Yesu Yerusalɛm mɔ.
42Dɔfɔy dɛmbəp, mba ntɛ pənayɔnɛ dɔsɔk da kəlompəsnɛnɛ simiti dɔsɔk da kəŋesəm mɔ,
43wəka Arimate wəlɔma nwɛ ancwe Isifu mɔ ɛmbəknɛ, k'ɔŋkɔ ndena Pilat kəkɔtola kɔ kəbel ka Yesu ntɛ tɔŋsɔŋɛ pəwup ki mɔ. Isifu nwɛ fum wəpɔŋ ɛnayi aboc kiti aSuyif dacɔ, nwɛ kəder ka dɛbɛ da Kanu kənabas mɔ.
44Kɔ pənciyanɛ Pilat kəne a Yesu elip kəfi. Kɔ Pilat ewe wəbɛ wəsɔdar k'eyif kɔ, kɔ tɔyɔnɛ a Yesu efina pəwon-ɛ?
45Ntɛ wəbɛ wəsɔdar oloku kɔ tɔkɔ tɛnayi mɔ, kɔ Pilat owosɛ Isifu kəlɛk kəbel ka Yesu.
46Kɔ Isifu ɛway arɔfən, k'ontorɛ Yesu dətɔk yɛpəmpəl, k'ɛnɛpsər kɔ ŋi, k'omboc kɔ dəkufu nkɛ anayɔk dətasar mɔ. Ntɛ elip mɔ, k'embiŋkəli tasar mpɛ anasuncɛ dəkəbɛrɛ da kufu kaŋkɔ mɔ.
47Mari wəka Makdala kɔ Mari, iya ka Yoses, ŋacgbɛkərɛ nde kəfo nkɛ anabɛr kɔ mɔ.